Christus a

Esuriuit Christus qui omnes pascit, sitiuit per quem causatur omnis potus, et qui spiritualiter panis est esuriencium fonsque sitiencium; ab itinere terrestri fatigatus est qui seipsum nobis uiam fecit in celum. Velut obmutuit et obsurduit coram conuiciantibus per quem mutus locutus est et surdus audiuit. Vinctus est qui de infirmitatum uinculis nos soluit; flagellatus est qui omnium flagella dolorum de hominum corporibus expulit; crucifixus est qui cruciatus nostros finiuit; mortuus est qui mortuos suscitauit. Sed et resurrexit nunquam moriturus ne ab illo quisquam sic discederet mortem contempnere quasi nusquam futurus.

Augustinus de cathezizandis rudibus.

Varia
Fons primus
[Back to top]

Christus b

Iacebat Christus quantum ad carnem mortuus in sepulcro, mortuos suscitans et inferno, uitam tribuens uniuersis in celo, non mundum dimittens ad celum ascendit, nec celum deserens uenit, sed uno atque eodem tempore totum totus impleuit.

Augustinus contra Felicianum.

Varia
Fons primus
[Back to top]

Christus c

Ego sum uia, ueritas et uita. Tanquam diceret: Qua uis ire? Ego sum uia. Quo uis ire? Ego sum ueritas. Vbi uis permanere? Ego sum uita.

Augustinus super Mattheum capitulo LV.

Varia
Fons nondum repertus
[Back to top]

Christus d

Ideo permittitur inimicus iuxta uiam ponere laqueos ne securitate exultationis uia deseratur et in insidias incidatur. Via Christus humilis, Christus ueritas et uita, Christus excelsus et Deus. Si ambules in humili, peruenies ad excelsum.

Augustinus ibidem.

Varia
Fons primus
[Back to top]

Christus e

Ambulare uis? Ego sum uia. Falli non uis? Ego sum ueritas. Mori non uis? Ego sum uita.

Augustinus super Iohannem.

Varia
Fons primus
[Back to top]

Christus f

Tota uita Christi in terris per hominem quem gessit disciplina morum fuit. Omnia enim bona mundi Christus contempsit que contempnenda docuit, et omnia mala sustinuit que sustinenda precepit.

Augustinus libro de uera religione.

Varia
Fontes primi
[Back to top]

Christus g

Attulit Christus ueritatem ut doctor, mansuetudinem ut liberator, iusticiam ut cognitor.

Augustinus super Iohannem.

Varia
Fons nondum repertus
[Back to top]

Christus h

Erat Christus uno atque eodem tempore totus in inferno, totus in celo; illic paciens iniuriam carnis, hic non relinquens gloriam deitatis. Erat apud inferos resurrectio mortuorum, erat apud celos uita uiuencium.

Augustinus contra Felicianum.

Varia
Fontes primi
[Back to top]

Christus i

Christus omnibus omnia factus est: pauper pauperibus, diues diuitibus, flens flentibus, esuriens esurientibus, siciens sicientibus, profluus habundantibus; in carcere cum paupere est, cum Maria flet, cum apostolis epulatur, cum Samaritana sitit, in deserto esurit ut cibus primi hominis quem preuaricatione gustauerat, ieiunio Domini solueretur.

Ambrosius super Lucam libro IIII.

Varia
Fons primus
[Back to top]

Christus k

Nemo tibi Christum potest auferre, nisi te illi auferas.

Ibidem libro V.

Varia
Fons primus
[Back to top]

Christus l

Omnia habemus in Christo et omnia in nobis Christus. Si uulnere curare desideras, medicus est; si febribus estuas, fons est; si grauaris iniquitate, iusticia est; si indiges auxilio, uirtus est; si mortem times, uita est; si tenebras fugis, lux est; si celum desideras, uia est; si cibum queris, alimentum est.

Ambrosius in quodam sermone.

Varia
Fons primus
[Back to top]

Christus m

Hic intelligendum est quod tante paupertatis fuerit Christus, et ita nulli adulatus sit ut in urbe maxima nullum hospitem, nullam inueniret mansionem.

Ieronymus super Mattheum libro I.

Varia
Fons primus
[Back to top]

Christus n

Christus sanctificatio est sine qua nemo uidebit faciem Dei, Christus redemptio, id est redemptor et precium, Christus omnia ut qui omnia propter Christum dimiserit, unum inueniat pro omnibus et possit libere clamare: Pars mea Dominus.

Ieronymus ad Paulinam.

Varia
Fons primus
[Back to top]

Christus o

Redemptor noster homo nascendo, uitulus moriendo, leo resurgendo, et ad celos ascendendo aquila factus est.

Gregorius omelia IIII.

Varia
Fons primus
[Back to top]

Christus p

Iustus quisque per rationem homo, per sacrificium mortificationis sue uitulus, per fortitudinem securitatis sue leo, per contemplationem uero efficitur aquila.

Gregorius ibidem.

Varia
Fons primus
[Back to top]

Christus q

Mors Christi a morte, uita ab errore, a peccato gracia liberauit. Et quidem mors per iusticiam suam peregit uictoriam quia iustus exsoluendo que non rapuit. Vita per sapienciam documentum discipline adimpleuit; gracia ex illa potestate peccata remisit que omnia quecumque uoluit fecit.

Bernardus de noua milicia.

Varia
Fons primus
[Back to top]

Christus r

Non consolatur Christi infancia garrulos, non consolantur Christi lacrime cachinantes, non consolantur panni eius ambulantes in stolis, non consolantur stabulum et presepe amantes primas cathedras in synagogis.

Bernardus in sermone.

Varia
Fons primus
[Back to top]

Christus s

Aliud sequi Ihesum, aliud tenere, et aliud manducare. Sequi, salubre consilium; tenere et amplecti, sollempne gaudium; manducare, uita beata.

Bernardus in epistolis.

Varia
Fons primus
[Back to top]

Christus t

Gemina dulcedo suauitatis exuberat in pectore Domini Ihesu, longanimitas in expectando, et facilitas in donando. Nomen Ihesu: quam carum, quam uile! Vile sed salubre. Si uile non esset, michi non effunderetur; si salubre non esset, me non lucraretur. Ihesus mel in ore, melos in aure, iubilus in corde.

Bernardus super Cantica.

Varia
Fons primus
[Back to top]

Christus u

Putasne Filium Dei reputat Ihesum quisque ille est homo qui ipsius nec terretur comminationibus, nec attrahitur promissionibus, nec preceptis obtemperat, nec consiliis acquiescit?

Bernardus in sermone.

Varia
Fons primus
[Back to top]

Christus x

Nomen Ihesu lucet predicatum, pascit recogitatum, lenit et ungit inuocatum; qui ita exercitatos reparat sensus, uirtutes roborat, uegetat mores bonos atque honestos, castas fouet affectiones.

Bernardus super Cantica.

Varia
Fons primus
[Back to top]

Christus y

Nichil ita sicut hoc nomen Ihesus ire impetum cohibet, superbie tumorem sedat, liuoris uulnus sanat, luxurie fluxum restringit, libidinis flammam extinguit, sitim auaricie temperat, ac tocius indecoris pruriginem fugat.

Bernardus super Cantica.

Varia
Fons primus
[Back to top]

Christus z

Dignus plane est morte qui tibi, Christe, recusat uiuere et mortuus est, et qui tibi non sapit desipit, et qui curat esse nisi propter te pro nichilo est et nichil est. Propter teipsum Deus fecisti omnia et qui esse uult sibi et non tibi, nichil esse incipit inter omnia.

Bernardus super Cantica.

Varia
Fons primus
[Back to top]

Christus ab

Ne mundi gloria seu carnis uoluptatibus abducaris, dulcescat tibi pro hiis sapiencia Christus; ne seducaris spiritu mendacii et erroris, lucescat tibi ueritas Christus; ne aduersitatibus fatigeris, confortet te uirtus Dei Christus.

Bernardus super Cantica.

Varia
Fons primus
[Back to top]

Christus ac

Quis non post illum libenter atque alacriter currat, qui et ab errore liberat et errata dissimulat, qui deinde merita uiuendo tradit et premia moriendo conquirit?

Bernardus.

Varia
Fons primus
[Back to top]

Christus ad

Habemus Christum Ihesum ex Patre nascentem, in Patre cubantem, cum Patre sedentem, sub Patre pendentem, a Patre ambulantem, pro Patre stantem, sine Patre morientem.

Bernardus super Cantica.

Varia
Fons primus
[Back to top]

Christus ae

Sub Christi scapulis quattuor nobis beneficia conferuntur. Sub hiis enim abscondimur, sub hiis ab incursu accipitrum et miluorum protegimur, sub hiis umbraculum salubre nos refrigerat et nimium solis feruorem repellit, sub hiis quoque alimur et fouemur.

Bernardus in quodam sermone.

Varia
Fons primus
[Back to top]

Christus af

Nomen enim Christi exprimit unitatem persone in duabus naturis; exprimit eciam dignitatem regiam et sacerdotalem et gracie plenitudinem propter unctionis prerogatiuam.

Damascenus tractans illud Matthei XVI.: Tu es Christus Filius Dei uiuentis.

Varia
Fons primus
[Back to top]

Christus ag

Nomen Ihesu apud Hebreos a littera ioth, apud Grecos a iotha incipit que utraque in sua gente denarii est nota numeri decem obulos in precium anime sue domino offerunt qui in Ihesum Christum credentes signum nominis eius quod a denario numero incipit in fronte et professione proferunt.

Beda de tabernaculo Salomonis libro II.

Varia
Fons primus
[Back to top]

Christus ah

Non quia forma eius decore lactei coloris eluxit, aut flauo crine lampauit, aut insigni statura preminuit, sed ueraciter humano genere pulcrior fuit quia peccatum non habuit, quamuis pater Augustinus speciem decoris eius dicat fuisse laudabilem.

Cassiodorus super illud Psalmi: Speciosus forma pre filiis hominum.

Varia
Fons primus
[Back to top]

Christus ai

Sicut ligat dyabolus qui peccata connectit, ita soluit Christus qui delicta dimittit.

Cassiodorus super illud Psalmi: Dominus soluit compeditos.

Varia
Fons primus
[Back to top]

Christus ak

Refugium fugit, fortitudo formidat. Quid sibi uult euangelista? Deuoti militis est regis sui tacere fugam, narrare constanciam, aperire forcia, tacere infirma. Et sequitur quod fugit autem Christus, non fuit timoris sed misterii. Bellicosus enim si in bello fugit, artis est non timoris; insequentem non timet, sed producit ut palam uincat.

Petrus Rauennas tractans illud Matthei II.: Fuge in Egyptum.

Varia
Fons primus
[Back to top]

Christus al

Quid iugo Christi suauius, quid onere leuius, probabilem fieri, scelere abstinere, bonum uelle, amare omnes, odisse malum, eterna consequi, presentibus non capi, nolle inferre alteri quod sibi ipsi perpeti sit molestum?

Ylarius tractans illud Matthei: Iugum meum suaue est et cetera.

Varia
Fons primus
[Back to top]

Ubi

Aduentus f
Amor o, Amor t, Amor u, Amor ar, Amor bh
Anima a
Ascensio a
Beatitudo d
Decima a
Fabula b
Humilitas b
Parentes o

Varia