Compassio a

Pia est ista tristicia et, si dici potest, beata miseria uiciis alienis tribulari non implicari, merere non herere, dolore contrahi non amore attrahi.

Augustinus in epistola ad Sebastinum.

Varia
Fons primus
[Back to top]

Compassio b

Cum aliene infirmitati compatimur, ualencius a nostra roboramur ut amore futurorum mens ad presencia aduersa se preparet et cruciatus corporis quos timebat expectat.

Gregorius libro VII. moralium.

Varia
Fons primus
[Back to top]

Compassio c

Tunc plena cordis nostri compassio est cum malum inopie pro proximo suscipere non metuimus ut illum a passione liberemus. Plus est aliquando compati ex corde quam dare quia quisquis indigenti perfecte compatitur, minus estimat omne quod dat. Et rem quamlibet plerumque dat qui non compatitur.

Gregorius libro XX. moralium.

Varia
Fons primus
cf. Elemosina ab & Compassio g
[Back to top]

Compassio d

Sine dolore amittitur, quicquid sine amore possidetur. Que uero ardenter diligimus habita, grauiter suspiramus ablata.

Gregorius libro XXXI. moralium.

Varia
Fons primus
Dolor c & Perfectio g
[Back to top]

Compassio e

Sic mens per compassionem doleat ut eciam larga manus affectum doloris ostendat.

Gregorius in omelia.

Varia
Fons primus
[Back to top]

Compassio f

Sicut pura ueritas non nisi puro corde uidetur, sic miseria fratris misero corde uerius sentitur.

Gregorius in quadam omelia.

Varia
Fons primus
cf. Miseria I
[Back to top]

Compassio g

Compassio est cum malum inopie pro proximo suscipere non metuimus ut eum a passione liberemus.
Gregorius in omelia.

Varia
Fons primus
cf. Compassio c
[Back to top]

Compassio h

Magne actum pietatis dispensacione cognoscimus ut is qui futurus erat pastor ecclesie in sua culpa disceret qualiter aliis misereri debuisset ut ex sua infirmitate cognosceret quam misericorditer alienam infirmitatem tolleraret.

Gregorius in omelia pasce et est I. distinctione: Considerandum.

Varia
Fontes proximus et primus
[Back to top]

Compassio i

Si doles, condoleo; si non, doleo tantum et maxime sciens a salute longius absistere membrum quod obstupuit et egrum sese non sencientem periculosius laborare.

Bernardus libro de consideracione.

Varia
Fons primus
[Back to top]

Compassio k

Non nulli dura ceruice et attrita sunt fronte ut quo magis eis compatimur, tanto magis nostra compassione et paciencia abutuntur.

Bernardus in sermone.

Varia
Fons primus
[Back to top]

Compassio l

Deuotus miles non sentit sua cum benigni ducis contuetur uulnera.

Bernardus ibidem.

Varia
Fons primus
[Back to top]

Compassio m

Impossibile est scire afflictiones afflictorum ei qui experimentum afflictionis non habuit.

Crisostomus super epistolam ad Hebreos sermone XXX.

Varia
Fons primus
[Back to top]

Compassio n

Religiosa tristicia aut alienum peccatum luget aut proprium, nec de hoc dolet quod diuina iusticia agitur, sed de eo meret quod humana iniquitate committitur ubi magis plangendus est faciens maligna quam paciens.

Leo papa tractans illud: Beati qui lugent.

Varia
Fons primus
[Back to top]

Compassio o

Triplex est modus compassionis: est quippe compassio alia ex uicio, alia ex natura, alia ex uirtute. Compassio ex uicio est quando affectus illic reprehensibili dolore tangitur ubi illicito prius amore tenebatur. Compassio ex natura est quando ex insito sibi pietatis affectu animus alienis erumpnis condolet quociens contra pietatis uel humanitatis mensuram naturam primi siue affligi uidet. Compassio ex uirtute est quando propter Deum alienis doloribus compatimur, cum scilicet iusticiam premi uel innocenciam affligi uidemus. Compassio ex uicio culpabilis est, compassio ex natura irreprehensibilis, compassio ex uirtute laudabilis; prima reprehenditur, tercia laudatur, secunda nec culpam habet quia ex natura est, nec premium quia ex uirtute non est.

Hugo de tribus uoluntatibus in Christo.

Varia
Fons primus
[Back to top]

Compassio p

Tria sunt per que probatur uera compassio, scilicet occulta beneficia, paupertas et mors. Beneficium enim, si impendatur occulte, humane laudis extinguit fauorem. Quando autem pauperi miseretur aliquis, temporalis remouet spem retribucionis. Cum pro proximo pati mortem non renuit, amorem mundi non preponit. Hec sunt enim tria illa que solent eneruare compassionis membra, humanus scilicet fauor, temporalis retribucio et amor mundi.

Hugo de claustro anime libro capitulo IX.

Varia
Fons primus
[Back to top]

Compassio q

Longitudine temporis temptacio augetur. Per triduum enim crescentibus curis paterna uiscera cruciantur, et prolixo spacio pater filium intuetur, cibum cum eo sumit, tot noctibus pendet puer in amplexu patris, cubat in gremio et per singula momenta in paterno affectu dolor occidendi filii cumulatur.

Alquinus de ymolatione Abrahe.

Varia
Fontes proximus et primus
[Back to top]

Compassio r

Cuius pectus tam ferreum, cuius cor tam lapideum ut gemitus non exprimat, lacrimas non effundat cum proximi uel amici morbum uel interitum intuetur ut pacienti non compaciatur et dolentibus non condoleat? Ipse Iesus cum uidisset Mariam et Iudeos plorantes infremuit spiritu, turbauit semetipsum et lacrimatus est.

Innocencius de uilitate condicionis humane.

Varia
Fons primus
[Back to top]

Compassio s

Vide si adhuc malus es et similibus parce.

Seneca in prouerbiis.

Varia
Fons primus
[Back to top]

Ubi

Adiutorium i
Beneficiencia g
Consalacio g
Conuicium a
Correctio b, Correctio t
Crux g
Diuicie aq
Dolor c
Elemosina ag
Excusacio n
Infirmitas a
Lacrima m
Perfectio g
Seruitus h, Seruitas i

Varia