Ecclesia a

Ecclesia est quedam forma iusticie, id est commune ius omnium; in commune orat, in commune operatur, in commune temptatur. Sine ecclesie catholice societate nec baptismus alicui prodesse potest, nec opera misericordie, nisi forte ut minus torqueatur.

Augustinus de fide ad Petrum.

Varia
Fontes primi
[Back to top]

Ecclesia b

Adhuc habet ecclesia quod crescat, donec illud impleatur: dominabitur a mari usque ad mare.

Augustinus super Mattheum.

Varia
Fons primus
[Back to top]

Ecclesia c

Hoc ecclesie proprium est ut tunc uincat cum leditur, tunc intelligat cum arguitur, tunc obtineat cum deseritur.

Hylarius de trinitate libro VII.

Varia
Fons primus
cf. Ecclesia d
[Back to top]

Ecclesia d

Hoc habet proprium ecclesia: dum persequitur, floret; dum opprimitur, crescit; dum contempnitur, proficit; dum leditur, uincit; dum arguitur, intelligit; tunc stat cum superari uidetur.

Hylarius ibidem.

Varia
Fons primus
cf. Ecclesia c
[Back to top]

Ecclesia e

Non altera Romane urbis ecclesia, altera tocius orbis estimanda est, et Gallia et Britannia et Persis et Oriens et India et omnes barbare naciones unum Christum adorant, unam obseruant regulam ueritatis. Si auctoritas queritur, orbis maior est urbe. Vbicumque fuerit episcopus siue Rome siue Regio, eiusdem meriti est eiusdem sacerdocii. Potencie, diuiciarum et paupertatis humilitas uel sublimiorem uel inferiorem episcopum non facit. Ceterum omnes apostolorum successores sunt.

Ieronymus ad Euandrum presbyterum.

Varia
Fons primus
[Back to top]

Ecclesia f

Quid, inquit, Arturi nomine, qui in celi axem constitutus septem stellarum radiis fulget, nisi ecclesia uniuersalis exprimitur? Arturus, inquit, semper uersatur et nunquam mergitur; sic ecclesia persecuciones tolerat sed sine defectu perdurat.

Gregorius libro IX. moralium super illud Iob: Qui facit Arturum.

Varia
Fons primus
[Back to top]

Ecclesia g

Est, inquit, in Arturo quod consideracius possumus intueri. In septem quidem stellis uoluitur et modo quidem tres ad summa eleuat atque ad ima quattuor inclinat, modo quattuor superius erigit et tres inferius premit. Sic sancta ecclesia cum modo infidelibus trinitatis noticiam, modo uero fidelibus quattuor uirtutes, quasi rotatu predicacionis status sui speciem quodammodo inmutat.

Gregorius XXIX. moralium super illud Iob: Aut gyrum Arturi.

Varia
Fontes primi
[Back to top]

Ecclesia h

Archa cessante diluuio in monte requieuit quia uite huius corruptione cessante cum malorum operum fructus transierint, in celesti patria sancta ecclesia uelut in excelso monte requiescit.

Gregorius in epistola ad Yesanum.

Varia
Fons primus
[Back to top]

Ecclesia i

Sancta ecclesia duas uitas habet: unam qua merces colligitur, aliam in qua iam de receptis muneribus gaudet. Atque in utraque uita offert sacrificium: hic uidelicet sacrificium compunctionis, illic sacrificium laudis.

Gregorius in quadam omelia super Ezechielem.

Varia
Fons primus
[Back to top]

______________________________

Tunc sancta ecclesia ualencius in ueritate reficitur cum ardencius pro ueritate fatigatur.

Gregorius in moralibus.

Varia
Fons primus
[Back to top]

Ecclesia k

Sicut ecclesia proprias res amittere non debet, ita rapacitatis ardore alienas inuadere non debet.

Gregorius in registro.

Varia
Fons primus
[Back to top]

Ecclesia l

O uanitas uanitatum, sed non uanior quam insanior! Fulget ecclesia in parietibus et eget in pauperibus. Suos lapides auro induit et suos filios nudos deserit. De sumptibus egenorum seruitur oculis diuitum.

Bernardus in apologetico.

Varia
Fons primus
[Back to top]

Ecclesia m

O humilitas et sublimitas et tabernaculum cedar et sanctuarium Dei et terrenum habitaculum et celeste palacium et domus lutea et aula regia et corpus mortis et templum lucis et despectio denique superbis et sponsa Christi!

Bernardus super Cantica.

Varia
Fons primus
[Back to top]

Ecclesia n

Omnino proditorem se esse nouerit quicumque est ille qui uicia quelibet in hanc domum conatur inducere et templum Dei speluncam uult facere demoniorum.

Bernardus in sermone.

Varia
Fons primus
[Back to top]

Ecclesia o

Sponsa Christi nil sibi gloriosius putat quam Christi portare obprobium.

Bernardus super Cantica.

Varia
Fons primus
[Back to top]

______________________________

Ecclesia media est inter celum, quod est locus tantum bonorum, et infernum, qui est locus tantum malorum. Ipsa uero ecclesia media est quia indifferenter bonos et malos colligit quod signatum est in archa Noe ubi animalia micia simul fuerunt cum immitibus.

Crisostomus super illud Matthei XXII.: Congregauerunt bonos et malos.

Varia
Fons nondum repertus
[Back to top]

Ecclesia p

Quod habet ecclesia cum omnibus nichil habentibus debet habere commune, nec aliquid inde eis qui sibi de suo sufficiunt erogare quando nichil aliud sit habentibus dare quam perdere.

Prosper libro II. de uita contemplatiua.

Varia
Fons primus
[Back to top]

Ecclesia q

Differencia est inter synagogam et ecclesiam: synagoga congregacio, ecclesia uocacio. Possunt autem irracionabilia congregari, uocari nequaquam; et ideo uisum est doctoribus nominare ecclesiam.

Rabanus super Mattheum.

Varia
Fons nondum repertus
[Back to top]

Ecclesia r

Tria possumus assignare tabernacula, scilicet materiale, misticum et morale; id est tabernaculum Moysi, tabernaculum Christi, tabernaculum cuiuslibet iusti. Tabernaculum Moysi fuit ex diuersis generibus ornamentorum conueniens structura, tabernaculum Christi est ecclesia, tabernaculum iusti quelibet fidelis anima. Vnum fit ex lignis imputribilibus, aliud ex sanctis animabus, tercium ex donis et uirtutibus. Moyses suum erexit in heremo, Christus in mundo, iustus in animo; omnes tamen in deserto edificauerunt.

Hugo libro III. de claustro anime.

Varia
Fons primus
[Back to top]

Ecclesia s

Ecclesia est singularis fidelium uniuscuiusque ciuitatis congregacio.

Hugo.

Varia
Fons nondum repertus
[Back to top]

Ecclesia t

Nouit ecclesia beneficio Domini triumphare de suis cladibus ingrauata; persecucionibus siquidem proficit, afflictionibus semper augetur, sanguine martyrum rigatur, tristicia magis erigitur, angustia dilatatur, fletibus pascitur, ieiuniis reficitur, et inde pocius crescit, unde mundus deficit.

Cassiodorus super Psalmo I.

Varia
Fons primus
[Back to top]

Ecclesia u

Ad ecclesiam bona spiritualia peruenerunt et fidei insuperabile fundamentum, spei certissimum premium, et suaue uinculum caritatis quarum rerum nunc tenet ymagines et in futuro est perhenniter possessura uirtutes.

Cassiodorus super Psalmo V.

Varia
Fons primus
[Back to top]

Ecclesia x

Ecclesia enim magis incipit esse uberrima cum ad finem seculi erit perducta. Tunc enim passionibus electorum cito implebitur numerus beatorum.

Cassiodorus super Psalmo XC.

Varia
Fontes proximus et primus
[Back to top]

Ecclesia y

Quod enim stipiti rami, quod capiti membra, quod soli radii, quod fonti riuuli, hoc apostolice sedis eminencie debent omnes ecclesie quas ubique terrarum religio Christiana fundauit.

Petrus Rauennas.

Varia
Fons primus
[Back to top]

Ubi

Antichristus o, Antichristus r
Clericus d, Clericus e, Clericus f, Clericus k, Clericus l, Clericus n
Mundus u
Seruicium h, Seruicium i
Superbia am

Varia