Electio a

Quis ferat si quis diuitem eligat ad sedem honoris ecclesie, contempto paupere instructiore et sanctiore?

Augustinus super illud Iacobi II.: Nolite in personarum acceptione habere fidem Domini nostri.

Varia
Fontes proximus et primus
cf. Acceptio personarum a
[Back to top]

Electio b

Ad episcopalem dignitatem eligi non debuit qui minora officia gubernare non didicit quia cura nauis illi committi non debuit qui remum tenere non nouit.

Augustinus in quodam sermone.

Varia
Fons nondum repertus
[Back to top]

Electio c

Hec pax domestica et cohabitancium ordinata a Deo concordia et clara iusticia, ut scilicet qui excellunt racione, excellant dominacione.

Augustinus in libro sentenciarum et est in glossa columna ultima.

Varia
Fontes proximus et primi
[Back to top]

Electio d

Non statim multitudinis acquiescamus iudicio sed electi in principatum nouerimus mensuram nostram et humiliemur sub potenti manu Dei quia Dominus superbis resistens, humilibus dat graciam. Quanti panes non habentes et uestimentum cum ipsi esuriant et nudi sunt, nec habeant spiritales cibos neque Christi tunicam integram seruauerunt, aliis et alimoniam uestimentumque promittunt, et pleni uulneribus medicos esse se iactant.

Ieronymus super Ysaia libro III.: Non sum medicus et in domo mea non est panis neque uestimentum. Nolite me constituere principem.

Varia
Fons primus
[Back to top]

Electio e

Sicut in ordinacionibus malorum princeps est peccatorum qui tales constituit, sic in ordinacione sanctorum princeps est eorum iusticie qui bonos eligit.

Ieronymus super Ysaia libro VII.

Varia
Fons primus
[Back to top]

Electio f

Moyses, amicus Dei cui facie ad faciem Dominus locutus est, potuit utique successores principatus filios suos facere et posteris propriam relinquere dignitatem, sed extraneus de alia tribu eligitur Ihesus ut sciremus principatum in populos non sanguini deferendum esse sed uite. Ac cernimus nunc plurimos honorem beneficium facere ut non querant eos qui possunt ecclesie plus prodesse in ecclesia erigere columpnas sed quos uel ipsi amant, uel quorum sunt obsequiis deliniti, uel pro quibus maiorum quispiam rogauerit et, ut deteriora taceam, qui ut clerici fierent muneribus impetrarunt.

Ieronymus super illud Titum I.: Et constitues per ciuitates et cetera, et ponitur VIII. questione I. capitulo: Moyses.

Varia
Fontes proximus et primus
cf. Prelacio q
[Back to top]

Electio g

Querit: Cur non Iohannes electus est uirgo, scilicet ut esset caput ecclesie? Respondet: Etati delatum est quia Petrus senior erat ne adhuc adolescens et pene puer progresse etatis hominibus preferetur.

Ieronymus contra Iuuinianum.

Varia
Fontes primus
[Back to top]

Electio h

Res pene contra naturam est ut sine peccato aliquis sit, sed talis eligatur cuius comparacione ceteri grex dicantur.

Ieronymus in epistola ad Occeanum.

Varia
Fontes proximus et primus
[Back to top]

Electio i

Conquerebatur se ferre non posse et iuuenilem etatem incongruam sacerdocio causbatur. Sed quanto plus repugnabat, tanto magis omnium in se studia concitabat et merebatur negando quod esse nolebat, eo quod dignior erat quod se clamabat indignum.

Ieronymus ad Eliodorum.

Varia
Fons primus
[Back to top]

Electio k

Si in quibuslibet ecclesie gradibus prouidenter scienterque curandum est ut in domo Domini nichil sit inordinatum nichilque preposterum, quanto magis elaborandum est ut in electione eius qui super omnes gradus constituitur non erretur? Nam tocius familie Domini status et ordo mutabitur, si quod requiritur in corpore, non inuenitur in capite.

Leo papa in quodam sermone et ponitur LXI. distinctione.

Varia
Fontes proximus et primus
[Back to top]

Electio l

Sicut enim boni operis sibi comparat fructum qui rectum tenet in eligendo sacerdote iudicium, ita graui semetipsum afficit dampnacione qui ad sue dignitatis collegium sublimat indignum.

Leo papa ibidem.

Varia
Fontes proximus et primus
[Back to top]

Electio m

Valde iniqum est et absurdum ut imperiti magistris, noui antiquis, rudes preferantur emeritis.

Leo papa ibidem.

Varia
Fontes proximus et primus
[Back to top]

Electio n

Requiritur in ordinando sacerdote et presencia populi ut sciant omnes et certi sint quia qui ex omni populo est prestancior, qui doctior, qui in omni uirtute eminencior, ille eligitur ad sacerdocium et hoc astante populo ne aliqua postmodum retractio cuiquam, ne quis scrupulus resideret.

Origenes super Leuitico.

Varia
Fons primus
[Back to top]

Electio o

Discant electorum principes successores sibi non eos qui consanguinitate generis iuncti sunt, neque qui carnis propinquitate sociantur testamento signare, neque hereditarium tradere ecclesie principatum, sed referre ad iudicium Dei et non eligere illum quem humanus affectus commendat, sed totum Dei iudicio de successoris electione permittere.

Origenes super illud Numerorum XXVII.: Prouideat Dominus spirituum omnis carnis et cetera.

Varia
Fons primus
[Back to top]

Electio p

Nulla hic populi acclamacio, nulla propinquitatis contemplacio, propinquis agrorum et prediorum relinquatur hereditas, gubernacio autem populi illi tradatur quem Deus elegit, qui scilicet in se habet spiritum Dei, id est in quo sit claritas legis et sciencie ut possint eum audire filii Israel.

Ibidem.

Varia
Fons primus
[Back to top]

Electio q

Necesse est prudentissimum eligere qui possit contra subtilissimos disputare et in conuentu doctorum sic agere ne susceptam causam tot erudita possint ingenia superare. Magna res est contra artifices loqui et apud illos aliquid agere qui se putant omnia preuidere.

Cassiodorus libro II. epistolarum.

Varia
Fons nondum repertus
[Back to top]

Electio r

Necessarium probatur esse rei publice personas dignitatibus aptas eligere ut cui iusticia committitur, malis moribus non grauetur. Alioquin inefficax est ab homine exigere quod agnoscitur non habere et confidenter queritur quod inesse sentitur.

Cassiodorus libro III. epistolarum.

Varia
Fons primus
[Back to top]

Electio s

Ligna siluarum non oliuam, non ficum, non uitem, sed ramnum sibi elegerunt in regem et egressus est ignis de ramno et deuorauit cedros Libani.

Petrus Rauennas in quadam epistola.

Varia
Fons primus
[Back to top]

Electio t

Hec est iusta ex equitate ueniens particio ut meliores semper in officiis preferentur, pessimi autem ciues uel minus boni luce careant dignitatis.

Apulegius in libro de dogmate Platonis.

Varia
Fons primus
[Back to top]

Electio u

Apud Trachiam in regis electione non nobilitas preualet sed suffragium uniuersorum. Populus enim eligit spectatum moribus et inueterata clemencia eciam annis grauem, sed hec in eo queritur cui liberi nulli sunt. Nam qui pater fuerit, eciam si uita polleat, non admittitur ad regendum, et si forte dum regnat genuerit, exuitur potestate; ideoque maxime custoditur ne fiat hereditarium regnum. Deinde eciam si rex maximam preferat equitatem, nolunt ei totum licere. Quadraginta ergo rectores accipit ne in causis capitum solus iudicet. Sic quoque si displicuerit iudicatum, ad populum prouocatur atque ita datis iudicibus septuaginta fertur sentencia cui necessario acquiescitur.

Solinus de mirabilibus mundi.

Varia
Fons primus
[Back to top]

Electio x

Aliquis uir bonus nobis eligendus est ac semper ante oculos habendus ut sic tanquam illo spectante uiuamus et omnia tanquam illo uidente faciamus. Magna pars peccatorum tollitur, si peccaturis testis assistat.

Seneca.

Varia
Fons primus
[Back to top]

Ubi

Acceptio a, Acceptio b
Doctrina bi, Doctrina bn
Honor c
Humilitas an
Iudex p, Iudex q
Meritum q
Prelacio q, Prelacio ad
Regimen q, Regimen af
Seruicium l

Varia