Excommunicacio a

Nos a communione quemquam prohibere non possumus, quamuis hec prohibicio nondum sit mortalis sed medicinalis, nisi aut sponte confessum aut in aliquo siue seculari siue ecclesiastico iudicio nominatum atque commotum. Augustinus in sermone de quadragesima.

Excommunicacio b

Fit ut ipsa ligandi ac soluendi potestate se priuet qui hanc pro suis uoluptatibus et non pro subiectorum moribus exercet.

Gregorius in omelia.

Excommunicacio c

Interdum fit ut aliquis non recto iudicio eorum qui presunt ecclesie depellatur et foras mittatur. Sed si non exiit ante, hoc est si non ita egerit ut mereretur exire, nichil leditur in eo quod non recto iudicio ab hominibus uidetur expulsus. Et ita fit ut interdum ille qui foras mittitur intus sit, et ille foris sit qui intus retineri uidetur.

Origenes super Leuiticum omelia XLVIII.

Ubi