Fides siue fidelitas a

Fides appellata est ab eo quod fit. Due sillabe sonant cum dicitur fides; prima sillaba est a facto, secunda a dicto. Interrogo ergo te utrum credas? Dicis: credo; fac quod dicis et fides est.

Augustinus sermone XXII.

Varia
Fons primus
[Back to top]

Fides siue fidelitas b

Mentis humane acies inualida in tam excellenti luce non figitur, nisi per iusticiam fidei emendetur.

Augustinus I. de trinitate.

Varia
Fons primus
[Back to top]

Fides siue fidelitas c

Nulle maiores diuicie, nulli thesauri, nulli honores, nulla huius mundi maior est substancia quam est fides catholica, que peccatores homines saluat, cecos illuminat, infirmos curat, cathicuminos baptizat, fideles iustificat, penitentes reparat, iustos augmentat, martyres coronat, uirgines et uiduas et coniugales casto pudore conseruat, clericos ordinat, sacerdotes consecrat, in eterna hereditate cum sanctis angelis collocat.

Augustinus de uerbis Domini.

Varia
Fons primus
[Back to top]

Fides siue fidelitas d

Ille apud Deum plus habet loci, qui plus attulit non argenti sed fidei.

Augustinus in libro de ouibus.

Varia
Fons primus
[Back to top]

Fides siue fidelitas e

Cum dilectione fides Christiani, sine dilectione fides demonis. Qui autem non credunt peiores sunt quam demones et tardiores.

Augustinus libro de caritate.

Varia
Fons primus
[Back to top]

Fides siue fidelitas f

Sicut in radice arboris nulla prorsus apparet pulcritudinis species, et tamen quicquid est, in arbore pulcritudinis uel decoris ex illa procedit, sic ex fidei humilitate quicquid meriti, quicquid beatitudinis anima susceptura est, ex fidei fundamento procedit.

Augustinus super Iohannem.

Varia
Fontes proximus et primus
[Back to top]

Fides siue fidelitas g

Quid est fides nisi credere quod non uides? Vnde et quomodo capitur trinitas recte, o homo, interrogas; quomodo creditur, non bene interrogas. Immo ideo bene creditur quia cito non capitur; nam si cito caperetur, non esset opus ut crederetur quia uideretur.

Augustinus ibidem (super Iohannem).

Varia
Fontes proximus et primus

[Back to top]

Fides siue fidelitas h

Noli intelligere ut credas, sed crede ut intelligas. Intellectus merces fidei est.

Ibidem (Augustinus super Iohannem).

Varia
Fontes proximus et primus
[Back to top]

Fides siue fidelitas i

Quod operum lex minando imperat, hoc fidei lex credendo impetrat.

Augustinus de spiritu et littera.

Varia
Fons primus
[Back to top]

Fides siue fidelitas k

O thesauris omnibus opulentior fides! O uirtutibus corporeis omnibus fides fortior, medicis omnibus salutatior!

Ambrosius in libro de uirginitate.

Varia
Fons primus
[Back to top]

Fides siue fidelitas l

Aufer argumenta ubi fides queritur. In ipsis gignasiis suis iam dyaletica taceat. Piscatoribus creditur, non dyaleticis.

Ambrosius libro I. de trinitate.

Varia
Fons primus
[Back to top]

Fides siue fidelitas m

Quid tibi fideles esse putas, quod aut pecunie oblacione aut blanda locutione tibi estimas obligatos?

Ambrosius libro II. de officiis.

Varia
Fons primus
[Back to top]

Fides siue fidelitas n

Cito fides inexercitata languescit et crebris ociosa temptatur incommodis. Remissas excubias callidus insidiator irrumpit, assuetum autem bello uirum hesterna fraus instruit et gloriose prouehit palma uictorie. Pax ergo fidei corruptele materia est.

Ambrosius super Beati immaculati.

Varia
Fons primus
[Back to top]

Fides siue fidelitas o

Diuina operacio, si racione apprehenditur, non est admirabilis; nec fides habet meritum, cui humana racio prebet experimentum.

Gregorius omelia XXVI. super euangelia.

Varia
Fons primus
[Back to top]

Fides siue fidelitas p

Tunc enim ueraciter fideles sumus, si quod uerbis promittimus, operibus implemus.

Gregorius omelia XXIX.

Varia
Fons primus
[Back to top]

Fides siue fidelitas q

Quid non inueniat fides? Attingit inaccessa, deprehendit ignota, comprehendit immensa, apprehendit nouissima, ipsam denique eternitatem suo illo uastissimo sinu quodammodo circumcludit.

Bernardus super Cantica.

Varia
Fons primus
[Back to top]

Fides siue fidelitas r

Opinio, si habeat assertionem, temeraria est; fides, si habet hesitacionem, infirma est; intellectus, si signata fidei temptet irrumpere, reputatur effractor, scrutator maiestatis.

Bernardus libro de consideracione.

Varia
Fons primus
[Back to top]

Fides siue fidelitas s

Fides aliquando recipit, quod racio non presumit. Qualis sit cuiusque fides, tribulacio probat.

Bernardus de duodecim gradibus humilitatis.

Varia
Fons primus
[Back to top]

Fides siue fidelitas t

Sola fides et mentis ad Deum conuersio, sine effusione sanguinis et sine perfusione aque, salutem sine dubio operatur uolenti, sed non ualenti, prohibente articulo, baptizari.

Bernardus in epistolis.

Varia
Fons primus
[Back to top]

Fides siue fidelitas u

Dicamus fidem uitem, uirtutes palmites, botrum opus, deuocionem uinum.

Bernardus super Cantica.

Varia
Fons primus
[Back to top]

Fides siue fidelitas x

Transgreditur enim fides fines racionis humane, nature usum, experiencie terminos.

Bernardus sermone LXXVII.

Varia
Fons primus
[Back to top]

Fides siue fidelitas y

Non fidei sed perfidie, non confidencie sed diffidencie est in semetipso habere fiduciam.

Bernardus sermone XII.

Varia
Fons primus
[Back to top]

Fides siue fidelitas z

Is fidelis est qui nec sibi credit nec in se sperat, factus sibi tanquam uas perditum, sed sic perdens animam suam, ut in uitam eternam custodiat eam.

Bernardus ibidem (sermone XII).

Varia
Fons primus
[Back to top]

Fides siue fidelitas ab

Qui fidelis fuerit in umbra memorie, lucem presencie sine dubio obtinebit.

Bernardus in quodam sermone.

Varia
Fons primus
[Back to top]

Fides siue fidelitas ac

Rei que uidetur facilis est fides. Eius autem quod nondum accepit principium, non facile suscipitur credulitas.

Crisostomus super Mattheum capitulo I.

Varia
Fons primus
[Back to top]

Fides siue fidelitas ad

Quam magna magorum fides est, non dicentes: si magnus est puer hic, que necessitas fuge est et occulte recessionis? Hoc enim est uere fidei non querere causas eorum que uere precipiuntur, sed suaderi solum ab eis.

Crisostomus super Mattheum capitulo II.

Varia
Fons primus
[Back to top]

Fides siue fidelitas ae

Lapis quidem durus est, sed cum factum fuerit de eo opus, desistere nescit. Sic et gentiles cum difficultate credunt, et tamen credentes in eternum permanent in fide.

Crisostomus super illud Matthei III.: Potens est Dominus de lapidibus istis.

Varia
Fons primus
[Back to top]

Fides siue fidelitas af

Sicut semper discere signum est nunquam posse perficere, sic testimonium semper querere signum est nunquam uelle credere.

Crisostomus super illud Matthei XII.: Volumus a te signum uidere.

Varia
Fons primus
[Back to top]

Fides siue fidelitas ag

Vna est ueritas et non partita. Et sicut qui margaritam habet ipse nouit quantum diues est, et tamen multis potest esse non cognitus; ita et qui fidei ueritatem detinent, noscunt quod diuites sunt. Infideles autem thesaurum nescientes hunc, diuicias nostras ignorant.

Crisostomus super illud Matthei XIII.: Inuenta una preciosa margarita.

Varia
Fons primus
[Back to top]

Fides siue fidelitas ah

Similis natura infidelitatis terre arenose, quia quantamcumque pluuiam susciperet, non fructificaret.

Crisostomus ibidem (super illud Matthei XIII.: Inuenta una preciosa margarita).

Varia
Fons primus
[Back to top]

Fides siue fidelitas ai

Talis est natura fidei: quanto magis uetatur, tanto magis accenditur. Virtus fidei in periculis secura est, in securitate periclitatur. Quid enim aliud sic laxat uigorem fidei, sicut longa transquillitas?

Crisostomus super illud Matthei XX.: Ac illi magis clamabant.

Varia
Fons primus
[Back to top]

Fides siue fidelitas ak

Fides lampas est, quia sicut lampas illuminat domum, ita fides animam.

Crisostomus super Mattheum XXV.

Varia
Fons primus
[Back to top]

Fides siue fidelitas al

Fides religionis catholice lumen est anime, hostium uite, fundamentum salutis eterne.

Crisostomus in tractatu de symbolo: Credo in Deum et cetera.

Varia
Fons primus
[Back to top]

Fides siue fidelitas am

Ecce quid a te requirat immensa illa pietas, quod facile possit implere nuda paupertas, despecta mediocritas, indocta simplicitas. Non per multas distraheris ambages, nec duris difficultatibus occupandus inuolueris. Quod a te et pro te reposcitur, intra te est, id est oris famulatus et cordis affectus, secundum illud: corde creditur et cetera. In anima ergo tua reposuit omnia anime tue presidia Deus tuus, ut unde peccatum egreditur, inde et peccati medicina peteretur.

Crisostomus ibidem (in tractatu de symbolo: Credo in Deum et cetera).

Varia
Fons primus
[Back to top]

Fides siue fidelitas an

Fides est uoluntaria certitudo absencium supra opinionem et infra scienciam constituta.

Hugo.

Varia
Fons primus
[Back to top]

Fides siue fidelitas ao

Vtinam attenderent Iudei, utinam aduerterent pagani, cum quanta consciencie securitate pro hac parte ad diuinum iudicium poterimus accedere. Nonne cum omni confidencia Deo dicere poterimus: Domine, si error est, a te ipso decepti sumus. Nam ista tantis signis et prodigiis confirmata sunt, et talibus que non nisi per te fieri possunt, et certe a summe sanctitatis uiris sunt nobis tradita, cum summa et autentica attestacione probata, te ipso cooperante et sermonem confirmante sequentibus signis?

Ricardus libro I. de trinitate.

Varia
Fons primus
[Back to top]

Fides siue fidelitas ap

Tantum crescit calor fidei, quantum de flamma subtractum fuerit corporali.

Cassiodorus super illud Psalmi: Quia factus sum sicut uter in pruina.

Varia
Fons primus
[Back to top]

Fides siue fidelitas aq

Totum in se habet homo, qui se habet. Ipse autem se habet, qui Deum habet. Deum uero habet, qui eum suum credit et confitetur actorem.

Petrus Rauennas in quodam sermone.

Varia
Fons primus
[Back to top]

Fides siue fidelitas ar

Fides est perceptio ueritatis rerum cum assercione sine causarum cognicione.

Tullius II. rethorice.

Varia
Fons primus
[Back to top]

Fides siue fidelitas as

Fides sanctissimum humani pectoris bonum est, nulla necessitate ad fallendum cogitur, nullo corrumpitur premio. Vre, inquit, cede, occide; non prodam, sed quo magis secreta dolor queret, hoc illa altius condet.

Seneca LXXXVII. epistola.

Varia
Fons primus
[Back to top]

Fides siue fidelitas at

Malo michi successum deesse quam fidem. Eciam hosti est equs, qui habet in consilio fidem. Fidem qui perdit, nil potest ultra perdere. Fides unanima, unde abiit, nunquam redit. Fidem nemo unquam perdit, nisi qui non habet.

Seneca in prouerbiis.

Varia
Fontes proximus et primus
[Back to top]

Fides siue fidelitas au

Viri boni est eciam non pollicitam fidem seruare. Maximum maioribus nostris telum fidem fuisse, ex quo plures pace suscepte, quam bello gentes fuerint deuicte. Nocens fit, ubi succumbit fides.

Cato.

Varia
Fons primus
[Back to top]

Ubi

Caritas ab
Doctrina ao
Elemosina bc
Eucharistia b
Gloria eterna at
Heresis e
Lex a
Predicacio be
Resurrectio o
Salus d
Scriptura m (1), Scriptura m (2)
Spes a, Spes d, Spes o
Suspicio d

Varia