Fraternitas a

Vera fraternitas est que fratrem ueneratur deuotum, corripit dissolutum; que presenti obsequitur, absentem non rodit; sano applaudit, infirmum non deserit; placatum non prouocat, iratum ut maiorem metuit.

Rabanus super ultimum capitulum Matthei.

Varia
Fons nondum repertus
[Back to top]

Fraternitas b

Hec est uera fraternitas que nullis unquam casibus scinditur, quam non solum dissociare uel delere locorum uel temporum interualla non preualent, sed nec mors quidem ipsa diuellit.

In collacionibus patrum et est abbatis Ioseph.

Varia
Fons primus
[Back to top]

Fraternitas c

Hec est uera et indirupta fraternitas que gemina amicorum perfectione ac uirtute concrescit, cuius semel initum fedus nec desideriorum uarietas, nec contentiosa dirumpet contrarietas uoluntatum.

Ibidem.

Varia
Fons primus
[Back to top]

Fraternitas d

Nichil autem prodest si moribus ac proposito dissidentes una habitatione iungantur, nec obest parili uirtute fundatis per locorum interualla disiungi. Apud Dominum namque morum cohabitatio, non locorum, unitas fratres habitatione coniungit, nec potest unquam pacis integritas custodiri, ubi uoluntatum diuersitas inuenitur.

Ibidem.

Varia
Fons primus
[Back to top]

Fraternitas e

Huius primum fundamentum substanciam mundialem in contemptu habere. Iniustum enim atque impium est, si post abrenunciatam mundi et omnium que in eo sunt uanitatem, preciosissime dilectioni fratris suppellex uilissima que superfuit preferatur. Secundum est ut ita unusquisque resecet suas uoluntates, ne se sapientem atque consultum esse iudicans suis malit quam fratris diffinitionibus obedire. Tercium est ut sciat omnia, eciam que utilia ac necessaria estimat, postponenda bono caritatis et pacis. Quartum est ut credat nec iustis nec iniustis de causis penitus irascendum. Quintum est ut aduersus se iracundiam fratris, eciam sine ratione conceptam, eodem modo quo suam curare desideret, sciens equaliter sibi perniciosam alterius esse tristiciam, ac si aduersus alium ipse moueatur, nisi eam quantum in se est de fratris eciam mente depulerit.

Ibidem.

Varia
Fons primus
[Back to top]

Ubi

Exemplum p
Humilitas h
Ira g
Obediencia q, Obediencia r
Pax ac
SOCIETAS

Varia