Prosperitas a

Nemo frangitur aduersorum molestia qui prosperorum delectacione non capitur.

Augustinus de sermone Domini libro II.

Varia
Fons primus
[Back to top]

Prosperitas b

Nemo gratuletur homini qui prosperatur in uia sua, cuius peccatis deest ultor et adest laudator. Maior hic ira Domini est. Irritauit enim Dominum peccator ut ista paciatur, id est ut correctionis flagella non paciatur.

Augustinus super Psalmum VII.

Varia
Fons primus
[Back to top]

Prosperitas c

Magne uirtutis est cum felicitate luctari ne illiceat, ne corrumpat, ne ipsa subuertat felicitas. Magne, inquam, uirtutis cum felicitate luctari; magne felicitatis est a felicitate non uinci.

Augustinus de uerbis Domini capitulo XIII.

Varia
Fons primus
[Back to top]

Prosperitas d

Ideo Deus felicitatibus terrenis amaritudines miscet ut alia queratur felicitas cuius dulcedo non est fallax.

Augustinus super Mattheum sermone XXIX.

Varia
Fons primus
[Back to top]

Prosperitas e

Prospera huius mundi asperitatem habent ueram, iocunditatem falsam, certum dolorem, incertam uoluptatem, durum laborem, timidam quietem, rem plenam miserie, spem beatitudinis inanem.

Augustinus epistola XXXVI.

Varia
Fons primus
[Back to top]

Prosperitas f

Nulla res longa mortalium est, omnisque felicitas seculi dum tenetur, amittur. Cum enim tribulacionis tempus aduenerit, omne quod preteritum est nichil adiuuat sustinentem.

Ieronymus super Ysaiam libro VII.

Varia
Fons primus
[Back to top]

Prosperitas g

Difficile immo impossibile est ut et presentibus et futuris quis fruatur bonis, ut et hic uentrem et ibi mentem impleat, ut de deliciis ad delicias transeat et in utroque seculo primus sit, ut in terra et in celo appareat gloriosus.

Ieronymus in epistola quadam.

Varia
Fons primus
[Back to top]

Prosperitas h

Si haberes sapienciam Salomonis, si pulcritudinem Absalonis, si fortitudinem Sampsonis, si longeuitatem Enoch, si diuicias Cresi, si potestatem Othoniani, quid prosint hec cum tandem caro datur uermibus et anima demonibus cum diuite sine fine crucianda?

Ieronymus super illud Matthei XVII.: Quid prodest homini si mundum uniuersum lucretur, anime sue detrimentum?

Varia
Fons primus
[Back to top]

Prosperitas i

Sancti uiri cum sibi suppetere prospera huius mundi conspiciunt, pauida suspicione turbantur. Timent enim ne hic laborum suorum fructus recipiant; timent ne quod diuina iusticia latens in eis uulnus aspiciat et exterioribus eos muneribus cumulans ab intimis repellat.

Gregorius libro V. moralium.

Varia
Fons primus
[Back to top]

Prosperitas k

Quem nec habundancia in superbia eleuat, nec in necessitate cupiditas irritat, nouit habundare, nouit penuriam pati.

Gregorius super Ezechielem.

Varia
Fons primus
[Back to top]

Prosperitas l

Manifestum perdicionis iudicium est quando affectatis iniquitatibus subsequens fauet effectus et nulla contrarietas impedit quod mens peruersa concepit.

Gregorius in moralibus libro XXVI.

Varia
Fons primus
[Back to top]

Prosperitas m

Cum quis positus in prosperitate diligitur, incertum est utrum prosperitas an persona diligatur. Amissio autem felicitatis interrogat uim dilectionis. Nec prosperitas quippe amicum indicat, nec aduersitas inimicum celat.

Gregorius VII. moralium.

Varia
Fons primus
[Back to top]

Prosperitas n

Iustis amplius placet ex aduersitate mala perpeti quam ex prosperitate terrene dispensacionis cura fatigari.

Gregorius libro XIII. moralium.

Varia
Fons primus
[Back to top]

Prosperitas o

Sepe omnipotens Deus cum auare menti uehementer irascitur, prius ei permittit ad uotum cuncta suppetere et post hec per ulcionem subtrahit ut pro eis debeat supplicia eterna tolerare.

Gregorius libro XV. moralium.

Varia
Fons primus
[Back to top]

Prosperitas p

Iniqus prosperari in sua mala actione permittitur, quatenus et peruersa faciat et tamen feliciter uiuat. Peruersus quisque quanto cicius peruenit ad desiderium, tanto facilius rapitur ad tormentum.

Gregorius libro XII. moralium.

Varia
Fons primus
[Back to top]

Prosperitas q

Presentis uite prosperitas innocencie testis non est quia multi ad perhennem uitam per flagella redeunt et plerique ad infinita supplicia perducendi sine flagello moriuntur.

Gregorius libro XV. moralium.

Varia
Fons primus
[Back to top]

Prosperitas r

Presentis uite prosperitas aliquando idcirco datur ut ad meliorem uitam prouocet, aliquando ut in eternum plenius dampnet.

Gregorius in pastorali.

Varia
Fons primus
[Back to top]

Prosperitas s

Solet rerum habundancia tanto magis a timore diuino mentem soluere, quanto magis hanc exigit diuersa cogitare.

Gregorius in omelia quadam.

Varia
Fons primus
[Back to top]

Prosperitas t

Preferendus ille et magnus est cui inter prospera saltim risus indecentior aut sermo insolentior aut immoderatior cura uestis uel corporis non irrepsit.

Bernardus libro II. de consideracione.

Varia
Fons primus
[Back to top]

Prosperitas u

Quid, inquit, profuit illis superbia? Quid diuiciarum iactancia, breuis leticia, mundi potencia, uana uoluptas, magna familia, mala concupiscencia post uoluptatem? Vbi iocus? Vbi risus? Vbi iactancia? Vbi arrogancia? Heu, de tanta leticia, quanta tristicia!

Bernardus ibidem.

Varia
Fons primus
[Back to top]

Prosperitas x

Diuiciis et floribus et maiorum nobilitate te iactas, de patria et pulcritudine corporis et honoribus que tibi ab hominibus deferuntur te exaltas. Respice te ipsum: quia mortalis es et quia terra es, et in terram ibis. Circumspice eos qui ante te similibus fulsere splendoribus. Vbi sunt quos ambiebant ciuium potentatus? Vbi insuperabiles oratores? Vbi qui conueniencius festa disponebant? Vbi equorum splendidi nutritores? Vbi exercituum duces? Vbi satrape et tyranni? Nonne omnia puluis? Nonne omnia fauille? Nonne in paucis uersibus eorum uite memoria est? Respice sepulcra et uide quis seruus, quis dominus, quis diues. Discerne, si potes, uinctum a rege, fortem a debili, pulcrum a deformi. Memor itaque nature aliquando ne extollaris. Memor autem eris, si te ipsum respexeris.

Prosper in suis sentenciis.

Varia
Fons primus
[Back to top]

Prosperitas y

Nouerca uirtutis prosperitas beatulis suis sic applaudit ut noceat, et infelici successu sic in uia fortunatos obsequitur ut in fine perniciem operetur, conuiuiis suis ab inicio propinans dulcia, et cum inebriati fuerint, letale uirus miscet et si quid deterius est. Quo specie sui clarescit amplius, eos stupentibus oculis densiorem infundit caliginem.

Crisostomus libro I. de curialium nugis et uestigiis philosophorum.

Varia
Fons primus
[Back to top]

Prosperitas z

Suis quippe meritis putaret datum, si peccator iugiter floreret illesus. Ideo Daniel saluatus est et trium puerorum flamma superata est. Dicamus ergo hunc uersum in quibuslibet periculis, dicamus in gaudiis; quia talis confessio et ab erumpnis eripit, et in prosperitate custodit.

Cassiodorus super illud Psalmorum: Iustus es, Domine, et rectum iudicium tuum.

Varia
Fons primus
[Back to top]

Prosperitas ab

Sepius in alto quis tollitur ut ruens forcius conquassetur. Nam sepe uidetur fortuna in principio prospera nunciare, sed medium et finem replet multis aduersitatibus et concludit.

Petrus Rauennas in quodam sermone.

Varia
Fons primus
[Back to top]

Prosperitas ac

In omni aduersitate fortune infelicissimum infortunii genus est aliquando fuisse felicem.

Boecius de consolacione libro II.

Varia
Fons primus
[Back to top]

Prosperitas ad

Quam multis amaritudinibus humane felicitatis dulcedo respersa est!

Boecius ibidem.

Varia
Fons primus
[Back to top]

Prosperitas ae

(Prosperitas ae abest in manuscriptis)

Prosperitas af

Quem felicitas amicum, infortunium facit inimicum.

Boecius ibidem libro III.

Varia
Fons primus
[Back to top]

Prosperitas ag

Cetera exempla fortune uariantis innumera. Et enim que facit magna gaudia nisi ex malis aut que mala immensa nisi ex ingentibus gaudiis? Nulla est profecto solida felicitas quam contumelia ulla uite rupit.

Plinius libro VII. ystoriarum mundi.

Varia
Fons primus
[Back to top]

Prosperitas ah

Omnia que superfluunt nocent, segetem nimia sternit ubertas, rami onere franguntur, ad maturitatem non peruenit nimia fecunditas. Idem quoque animis euenit quos inmoderata prosperitas rumpit, qua non tantum in aliorum iniuriam sed eciam in suam utuntur.

Seneca XXVIII. epistola ad Lucillum.

Varia
Fons primus
[Back to top]

Prosperitas ai

Ad omne fortuitum bonum suspiciosus pauidusque subsiste, et fera et piscis spe aliqua oblectante decipitur. Munera ista fortune reputamus. Insidie sunt. Beneficia ista usitata nos habere putamus, habemur.

Seneca ibidem XXVIII. epistola.

Varia
Fons primus
[Back to top]

Prosperitas ak

Tulit te a conspectu uite salubris rapida prosperitas. Ingeniosus fuit Mecenas, magnum exemplum eloquencie daturus nisi illum felicitas castrasset.

Seneca XIX. epistola.

Varia
Fons primus
[Back to top]

Prosperitas al

Res est inquieta felicitas; ipsa se exagitat. Mouet cerebrum non uno genere; alios in aliud irritat, hos in potenciam, alios in luxuriam; hos inflat, hos mollit et totos resoluit.

Seneca XXXVII. epistola.

Varia
Fons primus
[Back to top]

Prosperitas am

Ipsa enim felicitas nisi temperetur premit uel preterit. Multarum urbium in ipso flore luxuriosa imperia ceciderunt, et quicquid uirtute partum erat, intemperancia corruit.

Seneca LXXXV. epistola.

Varia
Fons primus
[Back to top]

Prosperitas an

Neminem eo fortuna prouexit ut non tantum minaretur illi, quantum permiserat.

Seneca XXIIII. epistola.

Varia
Fons primus
[Back to top]

Prosperitas ao

Ludit de suis fortuna muneribus et que dedit aufert, que abstulit redit, nec unquam tucius est illam experiri quam cum locum iniurie non habet.

Seneca libro V. rethorice sue.

Varia
Fons primus
[Back to top]

Prosperitas ap

Magni animi calamitatibus magnis sepius euertuntur. Quietiora tempora pauperes habuimus; aurato capitolio bella ciuilia gessimus. Diuicias putas aurum et argentum. Ludibria sunt fortune que inter iocum ipsis dominis ueniunt. Omnis enim blandientis fortune speciosus cum periculo nitor est, et sine causa sepe fluit et sine racione destituit. Nulla certa felicitas est. Ille Cresus inter reges opulentissimus uinctis post tergum manibus ductus est.

Seneca de sentenciis oratorum.

Varia
Fons primus
[Back to top]

Prosperitas aq

Alienum omne quod optando euenit. Bona nemini est hora, si non alicui sit mala. Cito improborum leta ad perniciem cadunt. Dies quod donat timeas; cito raptum inuenit. Fortuna cum blanditur captatum uenit. Fortunam cicius reperias quam retineas. Fortuna quem nimium fouet stultum facit. Fortuna uitrea est; cum splendet frangitur. Fortuna obesse nulli contenta est semel. Leuis est fortuna; cito reposcit quod dedit. Miserrima est fortuna que inimico caret. Quo se fortuna eodem et fauor hominum inclinat.

Seneca in prouerbiis.

Varia
Fontes primi
[Back to top]

Prosperitas ar

Non habet, ut putamus, fortuna longas manus; neminem occupat nisi herentem sibi.

Seneca in quadam epistola.

Varia
Fons primus
[Back to top]

Prosperitas as

Letiores reliquit quos nunquam fortuna respexit quam quos deseruit. Noli huic tranquillitati confidere; in momento mare euertitur, eodem die ubi luserant nauigia sorbentur.

Seneca libro de tranquillitate animi circa medium.

Varia
Fontes primi
[Back to top]

Prosperitas at

Minus diligenda sunt prospera que a desperacione sumunt principium.

Seneca ibidem.

Varia
Fons primus
[Back to top]

Prosperitas au

Que concessit fortuna, temperet iusticia; quod iusticia inuenerit, temperet moderancia. Si enim fortune auxeris licenciam tuam, minuis gloriam.

Socrates in suis exhortacionibus.

Varia
Fons primus
[Back to top]

Prosperitas ax

Fortuna non medicus ignarus multos excecauit. Non autem ipsa fortuna ceca est sed eos cecos plerumque efficit quos complexa est.

Tullius de amicicia.

Varia
Fontes primi
[Back to top]

Prosperitas ay

Errant qui in prosperis omnes impetus fortune putant fugisse. Sapienter cogitant qui temporibus secundis casus aduersos reformidant.

Tullius II. rethorice.

Varia
Fons primus
[Back to top]

Prosperitas az

Semper humane leticie tristicia repentina succedit, et quod incipit a gaudio desinit in merorem. Mundana quippe felicitas multis amaritudinibus est respersa. Nouit ille qui dixit: Risus dolore miscebitur et extrema gaudii luctus occupat.

Innocencius de uilitate condicionis humane.

Varia
Fons primus
[Back to top]

______________________________

Subito cum non suspicatur infortunium accidit, calamitas irruit, morbus inuadit, mors intercipit quam nullus euadit.

Innocencius ibidem.

Varia
Fons primus
[Back to top]

Ubi

Amicicia ag, Amicicia an, Amicicia bm
Amor ab
Anima af
Beatitudo q
Bonum g
Consilium u
Crux f (1), Crux f (2)
Cupiditas ac
Diuicie a, Diuicie ax, Diuicie bk
Gaudium i, Gaudium r
Miseria q
Potestas s
Relinquere n
Temptatio o
Tribulatio m, Tribulatio o, Tribulatio ah

Varia