Spiritus sanctus a

Sanctum semper opus in me spira ut cogitem, compelle ut faciam; suade ut te diligam, confirma me ut te teneam, custodi me ne te perdam.

Augustinus in epistola ad quemdam comitem.

Varia
Fons primus
[Back to top]

Spiritus sanctus b

Spiritus sapiencie negligenciam impigre repellit, spiritus intellectus diligenciam rationabiliter querit, spiritus consilii diuinam prouidenciam prudenter inuenit, spiritus uirtutis instigationes fortiter retundit, spiritus sciencie obliuionem lubricam diu esse integre non sinit, spiritus pietatis humanam fragilitatem clementer indulget, spiritus timoris Dei improuidam ignoranciam ardenter decoquit et bene replet.

Ieronymus super Marchum.

Varia
Fons primus
[Back to top]

Spiritus sanctus c

Sapiencia donum edificat, intellectus gubernacula inuenit, consilium bona discreta facit, uirtus in paciencia animam possidet, sciencia diuicie Dei et salutis acquiruntur; pietate prosperitas presentis uite et future consistit, timore humanitas conseruatur et omne peccatum expellitur.

Ieronymus ibidem.

Varia
Fons primus
[Back to top]

Spiritus sanctus d

Porro ad faciendum bonum quidem in nobis bonus spiritus operatur. Profecto monet, mouet, et docet; monet memoriam, mouet uoluntatem, et docet rationem. Nec minimam paleam intra cordis quod possidet habitaculum patitur residere, sed statim igne subtilissime circumspectionis exurit spiritus dulcis et suauis.

Gregorius in moralibus.

Varia
Fons primus
[Back to top]

Spiritus sanctus e

Habitare in corpore animam probant uitales sensus corporis; habitare in anima spiritum probat uita spiritualis. Illud ex uisu et auditu dignoscitur; istud ex caritate et humilitate ceterisque uirtutibus.

Gregorius ibidem.

Varia
Fons primus
[Back to top]

Spiritus sanctus f

Septem graduum erat ascensus ciuitatis. Sunt multi qui iam per septem gradus, id est per sancti Spiritus septiformem graciam aditum uite celestis inueniunt: per timorem Dei humiles, per pietatis studium misericordes, per scienciam discreti, per mentis fortitudinem liberi, per consilium cauti, per intellectum prouidi, per sapienciam maturi.

Gregorius super Ezechielem.

Varia
Fons primus
[Back to top]

Spiritus sanctus g

Spiritus sanctus in columba et igne apparuit quia omne cor quod eius gracia tangitur et mansuetudinis lenitate tranquillum et zelo iusticie fit accensum.

Gregorius in omelia.

Varia
Fons primus
[Back to top]

Spiritus sanctus h

Spiritus sanctus in columba et igne apparuit quia omne cor quod eius gracia tangitur et mansuetudinis lenitate tranquillum et zelo iusticie fit accensum.

Gregorius in omelia.

Varia
Fons primus
[Back to top]

Spiritus sanctus i

Spiritus sanctus in igneis linguis apparuit quia omnes quos repleuerit ardentes pariter et loquentes facit.

Gregorius in omelia: Si quis diligit me.

Varia
Fons primus
[Back to top]

Spiritus sanctus k

Quia Dominus discipulos et zelo succensos et uerbo eruditos intus reddidit, foras linguas igneas ostendit. In significatione admota sunt elementa ut ignem et sonitum sentirent corpora, igne uero inuisibili et uoce sine sonitu docerentur corda. Foris ergo fuit ignis qui apparuit, sed intus qui scienciam dedit.

Gregorius libro XXVIII. moralium.

Varia
Fons primus
[Back to top]

Spiritus sanctus l

Idcirco Spiritus sanctus in igne et columba nobis monstratus est quia uidelicet omnes quos implet et columbe simplicitate mansuetos et igne zeli ardentes exibet. Nequaquam ergo Spiritu sancto plenus est qui aut in tranquillitate mansuetudinis feruorem emulationis deserit, aut rursus in emulationis ardore uirtutem mansuetudinis amittit.

Gregorius.

Varia
Fons primus
[Back to top]

Spiritus sanctus m

In terra datur Spiritus ut diligatur proximus; e celo datur Spiritus ut diligatur Deus. Sicut ergo una est caritas et duo precepta, ita unus Spiritus et duo dona.

Gregorius omelia XXVI.

Varia
Fons primus
[Back to top]

Spiritus sanctus n

Considero patres noui et ueteris testamenti: Dauid, Danielem, Amos, Petrum, Paulum et Matheum; et apertis oculis fidei intueor. Implet namque Spiritus sancti gracia puerum cytharedum et psalmistam facit; implet abstinentem puerum et iudicem senum facit; implet pastorem armentarium et prophetam facit; implet piscatorem et principem apostolorum facit; implet persecutorem et doctorem gencium facit; implet publicanum et primum euangelistam facit. Quam ergo insani sumus qui hunc spiritum non querimus!

Gregorius super Ezechielem.

Varia
Fons primus
[Back to top]

Spiritus sanctus o

Absque ulla dubitatione conuenienter accipitur ut a Spiritu sancto ductus credatur, ut illuc eum suus Spiritus duceret, ubi eum ad temptandum spiritus malignus inueniret.

Gregorius super illud Matthei IIII.: Ductus est a Spiritu.

Varia
Fons primus
[Back to top]

Spiritus sanctus p

Absque corporis amminiculo nec bestialis spiritus seruilis conditionis debitum soluere, nec spiritualis celestisque creatura implere ministerium pietatis, nec rationalis anima tam proximo quam eciam sibi sufficiat consulere ad salutem, liquet omnem creatum spiritum siue ut iuuet, siue ut iuuetur, siue simul ut iuuet et iuuetur, corporeo prorsus indigere solacio.

Bernardus super Canticum sermone V.

Varia
Fons primus
[Back to top]

Spiritus sanctus q

Spiritus paraclitus dat pignus salutis, robur uite, sciencie lumen: pignus salutis ut ipse Spiritus reddat testimonium spiritui tuo quod Filius Dei sis; robur uite ut quod per naturam tibi est impossibile, per graciam eius non solum possibile, sed eciam facile fiat; lumen sciencie ut quicquid boni in te inueneris illi tribuas a quo omne bonum est. In tribus istis Spiritus sanctus docebit te omnia que pertinent ad salutem.

Bernardus in sermone.

Varia
Fons primus
Fons primus et 1550 edition
[Back to top]

Spiritus sanctus r

Spiritus sanctus multiplex dicitur quia multipliciter filiis inspiratur. Conceditur enim ad usum, ad miraculum, ad salutem, ad auxilium, ad solacium, ad feruorem. Ad usum uite bonis et malis communia bona habundantissime tribuens; ad miraculum in signis et prodigiis; ad salutem cum in toto corde reuertimur ad Dominum Deum; ad auxilium cum in omni colluctatione adiuuat infirmitatem nostram; ad solacium cum testimonium perhibet spiritui nostro quod filii Dei sumus; ad feruorem cum in cordibus perfectorum uehemencius spirans ualidum ignem caritatis accendit ut non solum in spe filiorum Dei, sed eciam in tribulationibus glorientur, contumeliam gloriam reputantes.

Bernardus ibidem.

Varia
Fons primus
[Back to top]

Spiritus sanctus s

Spiritus Ihesu, spiritus bonus, Spiritus sanctus, spiritus rectus, spiritus dulcis, spiritus fortis, infirma roborans, aspera planans, corda purificans. Quicquid in hoc seculo nequam uidetur, difficile et angustum leue facit et latum; obprobrium gaudium iudicat, despectionem exaltationem esse persuadet.

Bernardus sermone LXXIIII.

Varia
Fons primus
[Back to top]

Spiritus sanctus t

O quam uelox est sermo sapiencie et ubi Deus magister est, cito discitur quod docetur! Non est adhibita increpatio ad audiendum, non consuetudo ad usum, non tempus ad studium, sed spirante ubi uoluit spiritu ueritatis, proprie singularum gencium uoces facte sunt in ecclesie ore communes. Ab hoc igitur die tuba euangelice predicationis intonuit, ab hoc die ymbres karismatum, flumina benedictionum, omne desertum et uniuersam aridam rigauerunt.

Leo papa in sermone de Pentecostes.

Varia
Fons primus
[Back to top]

Spiritus sanctus u

Nulla in discendo mora est ubi Spiritus sanctus doctor adest.

Beda omelia IIII. super illud Luce: Exurgens Maria abiit in monte.

Varia
Fons primus
[Back to top]

Ubi

Baptismus c
Peccatum t
Predicacio ae
Superbia ab

Varia