Verecundia a

Pulcra uirtus est uerecundia et suauis gracia que non solum in factis, sed eciam in ipsis spectatur sermonibus ne modum progrediaris loquendi, ne quid indecorum sermo resonet tuus. Speculum enim mentis plerumque in uerbis refulget. Ipsum uocis sonum librat modestia ne cuiusquam offendat aurem uox fortior, denique in ipso canendi genere prima disciplina uerecundia.

Ambrosius de officiis libro I.

Varia
Fons primus
Fons primus et 1550 edition
[Back to top]

Verecundia b

Tacebat in periculis Susanna et grauius uerecundie quam uite dampnum putabat, nec arbitrabatur periculo pudoris tuendam salutem. Deo soli loquebatur cui poterat casta uerecundia loqui, refugiebat ora intueri uirorum.

Ambrosius ibidem.

Varia
Fons primus
[Back to top]

Verecundia c

Est enim uerecundia pudicicie comes cuius societate castitas ipsa tutior est. Nonne hec pretulit publicanum et commendauit eum qui nec oculos suos audebat ad celum leuare? Paulus orationem deferri precepit cum uerecundia et sobrietate.

Ambrosius ibidem.

Varia
Fons primus
[Back to top]

Verecundia d

Verecundia cum sit omnibus etatibus, personis, temporibus et locis apta, tamen adolescentes iuuenilesque annos maxime decet. Vt artifex in materia commodiore melius operari solet, sic uerecundia in ipso quoque corporis decore plus eminet, ita tamen ut eciam ipse non sit affectatus decor corporis, sed naturalis, simplex, neglectus magis quam ornatus uel cultus uel expetitus.

Ambrosius ibidem.

Varia
Fons primus
Fons primus et 1550 edition
[Back to top]

Verecundia e

Hominem uereris presentem, Dei Patris et Filii et Spiritus Sancti non uereris presenciam.

Ambrosius super Beati immaculati.

Varia
Fons primus
[Back to top]

Verecundia f

Vbique in uirgine comes singularum uirtutum est pudor. Hic indiuiduus debet esse uirginitatis sine quo non potest esse uirginitas. Teritur officiis pudor, audacia emicat, risus obripit, modestia soluitur, dum urbanitas affectatur.

Ambrosius de uirginitate.

Varia
Fons primus
[Back to top]

Verecundia g

Erubescere debemus et condempnare peccatum non defendere quoniam pudore culpa minuitur, defensione cumulatur.

Ambrosius de morte Abel et Caym.

Varia
Fons primus
[Back to top]

Verecundia h

Ingenia liberaliter educata facilius uerecundia quam metus superat, et quos tormenta non uincunt, interdum uincit pudor.

Ieronymus ad Pammachium de morte Pauli.

Varia
Fons primus
[Back to top]

Verecundia i

Sit sermo uirginis pudorosus, modestus et rarus, nec tam eloquencia preciosus quam pudore. Est eciam in ipso motu, habitu, incessu uerecundia.

Ieronymus ibidem.

Varia
Fontes primi
[Back to top]

Verecundia k

Quicquid pudet dicere, pudeat eciam cogitare.

Ieronymus in epistola.

Varia
Fons primus
[Back to top]

Verecundia l

Frontem cordis impudencia atterit culpa frequens, atque quo crebrius ammittitur, eo de illa committentis animus minus uerecundatur.

Gregorius in omelia.

Varia
Fons primus
[Back to top]

Verecundia m

Sicut uerecundia laudabilis est in malo, ita reprehensibilis est in bono. Erubescere enim malum sapiencie est, bonum uero erubescere fatuitatis. Qui erubescit mala penitendo que fecit, ad uite libertatem peruenit; qui uero erubescit bona facere, a statu rectitudinis cadit, atque ad dampnationem tendit, sicut per redemptorem dicitur: Qui me erubuerit et meos sermones et cetera.

Gregorius in omelia X. super Ezechielem.

Varia
Fons primus
[Back to top]

Verecundia n

Quid amabilius uerecundo adolescente? Quam pulcra et quam splendida gemma morum est uerecundia in uita et uultu adolescentis! Quam uera et minime dubia bone spei nuncia, bone indolis index, uirga discipline, expugnatrix malorum, propugnatrix puritatis innate, specialis gloria consciencie, fame custos, uite decus, uirtutis sedes, uirtutum primicie, nature laus et insigne tocius honesti!

Bernardus super Cantica sermone LXXXVII.

Varia
Fons primus
[Back to top]

Verecundia o

Verecundia soror est continencie, nullum eque manifestum indicium columbine simplicitatis et ideo eciam testis innocencie. Lampas est pudicicie mentis iugiter lucens ut nil in ea turpe uel indecorum residere attemptet quod non illa illico prodat.

Bernardus ibidem.

Varia
Fons primus
[Back to top]

Verecundia p

Hec dicentibus erubescenda essent, si a facientibus presumpta non fuissent. Nunc autem sustineat in audiendo uerecundiam qui noluit in faciendo habere disciplinam.

Hugo de institutione nouiciorum.

Varia
Fons primus
[Back to top]

Verecundia q

Pudoris eciam disciplinam inter defuncta corpora natura discernit. At si quando cadauera necatorum fluctibus euehuntur, uirorum supina, prona fluctuant feminarum.

Solinus libro de mirabilibus.

Varia
Fons primus
[Back to top]

Verecundia r

Verecundia parens est omnis honesti consilii, tutela sollempnium officiorum, magistra innocencie, cara proximis, accepta alienis, omni loco, omni tempore fauorabilem pre se referens uultum.

Valerius Maximus.

Varia
Fons primus
[Back to top]

Verecundia s

Bonum in adolescente signum est cum illi ex alto rubor suffunditur. Magis in iuuenibus apparet quibus et plus caloris est et tenera frons; ueteranos nichilominus et senes tangit. Quidam autem non magis quam cum erubuerint timendi sunt quasi omnem uerecundiam effuderint.

Seneca XI. epistola.

Varia
Fons primus
[Back to top]

Verecundia t

Artifices scenici hoc indicio imitantur uerecundiam. Deiciunt uultum, uerba submittunt, figunt in terram oculos et deprimunt. Ruborem sibi exprimere non possunt, nec prohibetur hic, nec adducitur. Nil aduersus hunc sapiencia proficit; sui iuris est, iniussus uenit, iniussus discedit.

Seneca ibidem.

Varia
Fons primus
[Back to top]

Verecundia u

Nutriendus est pudor qui quamdiu in animo durauerit, aliquis erit bone spei locus.

Seneca XXV. epistola.

Varia
Fons primus
[Back to top]

Verecundia x

Recta ingenia debilitat uerecundia, praua confirmat audacia.

Seneca in prouerbiis.

Varia
Fons primus
[Back to top]

Verecundia y

Turpia ne dixeris: Paulatim enim pudor per uerba discutitur.

Ibidem.

Varia
Fons primus
[Back to top]

Verecundia z

Verborum turpium licencia impudenciam nutrit.

Ibidem.

Varia
Fons nondum repertus
[Back to top]

Ubi

Confessio ag
Conuersacio ah
Correctio ae

Varia