Cogitacio a

Quicquid pudet dicere, pudet cogitare. Est tutissimum atque perfectum ut assuescat animus sollicita semper et peruigili custodia discernere cogitaciones suas, et ad primum animi motum uel probare uel reprobare quod cogitat ut uel bonas cogitaciones alat, uel statim malas extinguat. Hinc namque fons est boni et origo peccandi. Ibi maxime oportet obseruare peccatum, ubi nasci solet; statimque ad primam temptacionis faciem et malum antequam crescat restringere, dum adhuc est in cogitacione.

Ieronymus in epistola ad Demetriadem.

Varia
Fons primus
cf. Verecundia k
[Back to top]

Cogitacio b

In illa tantum cogitacione peccatum est que suggestioni consensum mentis dedit, que malum suum blande fouet, que in factum gestat irrumpere. Huius cogitacio eciam si ex aliquo impedita casu non impleat uoluntatem, nichilominus actione criminis condempnatur a Domino, ut illud in euangelio legimus: Qui uiderit mulierem ad concupiscendum et cetera.

Ieronymus ibidem.

Varia
Fons primus
[Back to top]

Cogitacio c

Ad peccatum quod opere perpetratur nequaquam peruenies, si incentiua uiciorum statim in mente iugulabis et paruulos Babylonis allides ad petram in qua serpentis uestigia non reperiuntur et caute Domino promittes: Si mei non fuerint dominati et cetera.

Ibidem.

Varia
Fons primus
[Back to top]

Cogitacio d

Tunc ad perfectionis summam pertingimus cum sic exteriora uicia uincimus ut cogitaciones superfluas a mente resecemus. Nam tanto longius mens a necessariis cessat, quanto inania latius cogitat.

Gregorius libro II. moralium.

Varia
Fons primus
[Back to top]

Cogitacio e

Peccata operis tanto cicius cognoscuntur, quanto exterius uidentur. Peccata uero cogitacionis eo ad intelligendum sunt difficilia quo inuisibiliter perpetrantur. Et tanto lacius cogitaciones defluunt, quanto se esse securius estimant quia foris a reprehensoribus non uidentur.

Gregorius libro XI. moralium.

Varia
Fontes primi
[Back to top]

Cogitacio f

Magno studio superflue cogitaciones amputande sunt, sed tamen amputari funditus nequaquam possunt. Semper enim caro superflua generat que semper spiritus ferro solicitudinis rescindat.

Gregorius libro V. moralium.

Varia
Fons primus
[Back to top]

Cogitacio g

Electorum mentes, si quas in se carnales cogitaciones inueniunt, penitencie ardore consumunt, nec cogitaciones suas dilatari carnali uoluptate permittunt quia eo semetipsos iudicantes subtilius feriunt quo districtum iudicem prestolantur uicinum.

Gregorius libro XIII. moralium.

Varia
Fons primus
[Back to top]

Cogitacio h

Cum reproborum mentibus occasio perpetrandi peccati deest, desideriorum cogitaciones eorum cordibus nullatenus desunt. Et cum non semper dyabolum sequntur in opere, ualde tamen se illi obligant in cogitacione.

Gregorius libro XIIII. moralium.

Varia
Fons primus
[Back to top]

Cogitacio i

Ante Dei oculos uacue non transuolant cogitaciones nostre, et nulla momenta temporis per animum transeunt sine statu retribucionis.

Gregorius libro XX. moralium.

Varia
Fons primus
[Back to top]

Cogitacio k

Sepe misericors Deus eo cicius peccata cordis abluit quo hec exire ad opera non permittit et cogitata nequicia quanto cicius soluitur quia effectu operis non ligatur.

Gregorius in pastorali capitulo LIII.

Varia
Fons primus
[Back to top]

Cogitacio l

Si a domo mentis ad momentum racio discedat quasi absente domina, cogitacionum se clamor uelut garrula ancillarum turba multiplicat. Vt autem racio ad mentem redierit, mox confusio tumultuosa compescit. Et quasi ancille se ad iniunctum opus tacite reprimunt, dum cogitaciones protinus se causis propriis ad utilitatem subdunt.

Gregorius libro moralium.

Varia
Fons primus
[Back to top]

Cogitacio m

Cogitacio est improuidus animi respectus ad euagacionem pronus.

Hugo.

Varia
Fons primus
[Back to top]

Cogitacio n

Quocumque tempore non cogitaueris Deum, puta te tempus illud amisisse.

Cassiodorus super illud Psalmi: Et cor meum dereliquit me.

Varia
Fons primus
[Back to top]

Cogitacio o

Incipiamus bonas cogitaciones diligere et statim ab illis que male sunt dignabitur Dominus liberare.

Cesarius ammonicione secunda capitulo III.

Varia
Fons primus
[Back to top]

Cogitacio p

Mentem non interpellari cogitacionibus impossibile est, suscipere uero eas siue respuere omni studenti per graciam Dei possibile est. Quemadmodum igitur ortus earum non omnimodis pendet a nobis, ita reprobacio uel electio constitit in nobis.

In collacionibus patrum collacione Moysi.

Varia
Fons primus
[Back to top]

Cogitacio q

Cogitaciones uagas et inutiles et uelut sompno similes non recipias quibus, si animum tuum oblectaueris, cum omnia disposueris, tristis remanebis.

Seneca de quattuor uirtutibus.

Varia
Fons primus
[Back to top]

Cogitacio r

Si quid cogitaueris, cito apparebit conuersantibus. Bene cogitata, si excedunt, non occidunt.

Seneca in prouerbiis.

Varia
Fontes primi
[Back to top]

Ubi

Anima ag
Conuersacio as
Cor n
Deus ab
Diabolus a
Dilectio t
Mors ap
Oratio bk
Peccatum m, Peccatum n
Religio k
Temptatio g, Temptatio n

Varia