Auaricia a

Non solum auarus est qui rapit aliena, sed ille auarus est qui cupide seruat sua.

Augustinus in quodam sermone.

Varia
Fons primus
[Back to top]

Auaricia b

Auarus antequam lucretur, seipsum perdidit, et antequam aliquid capiat capitur.

Augustinus ibidem.

Varia
Fons nondum repertus
[Back to top]

Auaricia c

Auarus uir inferno est similis. Infernus enim quantoscumque deuorauerit, numquam dicit: satis est. Sic etsi omnes thesauri confluxerint in auarum.

Augustinus in epistola ad comitem.

Varia
Fontes proximus et primi
[Back to top]

Auaricia d

Que est ista auiditas concupiscencie, cum et ipse belue habeant modum? Tunc enim rapiunt quando esuriunt, parcent uero prede cum senserint satietatem. Insatiabilis est sola auaricia diuitum. Semper rapit et nunquam satiatur; nec Deum timet, nec hominem reueretur, nec patri parcit , nec matrem cognoscit, nec fratri obtemperat, nec amico fidem seruat. Viduam opprimit, pupillum inuadit, liberos in seruicium reuocat, testimonium falsum profert. Res mortui occupantur; quasi et qui faciunt non moriantur. Que est illa animarum insania: amittere uitam, appetere mortem, acquirere aurum et perdere celum?

Augustinus de uerbis Domini.

Varia
Fons primus
[Back to top]

Auaricia e

Auarus est cecus; credendo enim diues est non uidendo. Amas pecuniam, O cece, quam nunquam uidebis; cecus possides, cecus moriturus es; quod possides hic, relicturus es.

Augustinus in libro de disciplina Christiana.

Varia
Fons primus
[Back to top]

Auaricia f

Auaricia que Grece philargia dicitur non in solo argento, unde nomen duxisse resonat, sed in omnibus rebus que immoderate cupiuntur intelligenda est, ubicumque omnino plus uult quisque quam satis; hec autem auaricia cupiditas est, cupiditas uero improba uoluntas est. Ergo improba uoluntas omnium malorum causa est.

Augustinus libro III. de libero arbitrio.

Varia
Fons primus
[Back to top]

Auaricia g

Auarus uelut infernus omnia deuorans uellet nullum hominem esse ut omnia solus possideret.

Augustinus in quodam sermone.

Varia
Fons nondum repertus
[Back to top]

Auaricia h

Cum auaricia alicui dominatur, subiectus malis omnibus demonstratur quia de auaricia mala omnia oriuntur et peccatorum omnium spine producuntur.

Augustinus de libero arbitrio.

Varia
Fontes primi
[Back to top]

Auaricia i

Auaricia non uicium auri, sed anime peruerse amantis aurum derelicta iusticia que debuit anteponi auro.

Augustinus XII. de ciuitate Dei.

Varia
Fons primus
[Back to top]

Auaricia k

Non minoris est criminis habenti tollere quam cum possis et habes indigentibus denegare. Esuriencium panis est quem tu detines, nudorum indumentum quod tu includis, miserorum redemcio et absolucio pecunia quam tu in terra fodis; tantorum scias te inuadere bona; quantis possis prestare et nolis. Non sunt bona hominis que secum ferre non potest. Sola misericordia comes est defunctorum.

Ambrosius in quodam sermone.

Varia
Fontes proximus et primi
cf. Cupiditas g
[Back to top]

Auaricia l

Modum non habet auaricia, nec capiendo expletur sed incitatur hoc egentior quod plura quesiuit.

Ambrosius de interpellacione Iob.

Varia
Fons primus
[Back to top]

Auaricia m

Venit auaricia et dicit: argentum et aurum quod habes seruitutis tue precium est. Possessio quam tenes, iuris tui emptio est.

Ambrosius super beati immaculati.

Varia
Fons primus
[Back to top]

Auaricia n

Inflammatur lucro auaricia non restringitur. Quasi gradus quosdam cupiditas habet et quo plures ascenderit, eo altiora festinat unde fit grauis ruina lapsuro.

Ambrosius in libro de Nabuthe.

Varia
Fontes proximus et primus
[Back to top]

Auaricia o

Pauperiorem se iudicat omnis habundans, quia sibi deesse arbitratur quicquid ab aliis possidetur; toto mundo eget, cuius non capit mundus cupiditates, ei autem qui fidelis est totus mundus diuiciarum est; toto mundo fugit qui considerans conscienciam suam timet deprehendi.

Ambrosius ibidem.

Varia
Fons primus
[Back to top]

Auaricia p

Auaro tam deest quod habet, quam quod non habet. Credenti totus mundus diuiciarum est, infidelis autem obolo indiget.

Ieronymus ad Paulinum.

Varia
Fons primus
cf. Auaricia s
[Back to top]

Auaricia q

Nos ardemus auaricia et contra pecunias disputantes auro sinum expandimus et illud quod de megarensibus dicitur, nobis miseris coaptari potest. Edificant quasi semper uicturi; uiuunt quasi altera die morituri.

Ieronymus ad Rusticum monachum.

Varia
Fons primus
[Back to top]

Auaricia r

Cum cetera uicia senescente homine senescant, sola auaricia iuuenescit.

Ieronymus in quodam sermone.

Varia
Fons primus
cf. Senectus e
[Back to top]

Auaricia s

Auaro tam deest quod habet, quam quod non habet, quia aut non habita concupiscit ut habeat, aut habita metuit ne amittat, et dum in aduersis sperat prospera, in prosperis formidat aduersa.

Ieronymus ibidem.

Varia
Fontes primi
cf. Auaricia p & Auaricia af
[Back to top]

Auaricia t

Nichil aliud est auarus quam bursa principum, cellarium latronum, rixa parentum, sibilus hominum.

Ieronymus ibidem.

Varia
Fons primus
[Back to top]

Auaricia u

Auaricia latenter oritur in mente, sed punctiones peccatorum omnium patenter producit in operacione.

Gregorius XX. libro moralium.

Varia
Fons primus
[Back to top]

Auaricia x

Peccatum auaricie mentem quam infecerit ita grauem reddit ut ad appetenda sublimia attolli non possit.

Gregorius XIV. moralium.

Varia
Fons primus
[Back to top]

Auaricia y

Auaricia desideratis rebus non extinguitur, non augetur; nam more ignis cum ligna que consumit acceperit, excrescit; et unde uidetur ad momentum flamma comprimi, inde paulo post cernitur dilatari.

Gregorius XV. libro moralium.

Varia
Fons primus
[Back to top]

Auaricia ab

Auarus prius hanelat concupita congregare et cum quasi in quodam uentre auaricie multa congesserit satiatus arctatur, quia dum anxiatur qualiter acquisita custodiat, ipsa eum sua satietas angustat. Mens auari que prius ex habundancia requiem quesierat, postea ad custodiam grauius laborat.

Gregorius XV. moralium.

Varia
Fons primus
[Back to top]

Auaricia ac

Omnis auarus ex potu sitim multiplicat quia cum ea que appetit adeptus fuerit, ad appetenda alia amplius hanelat.

Gregorius in omelia.

Varia
Fons primus
[Back to top]

Auaricia ad

Demonum habitaculum fit quisque in hoc seculo qui propter diuicias et honores laborat, quas postquam consecutus est tradit se luxurie, ut que auaricia congregauerit, luxuria consumat.

Gregorius ibidem.

Varia
Fons primus
[Back to top]

______________________________

Prius namque mens auari dolorem habuit in ipsa sue concupiscencie fatigacione qualiter concupita raperet, quomodo aliqua blandimentis aliqua terroribus auferret, ac postquam acquisitis rebus peruenit ad desiderium, alius hunc dolor fatigat, ut cum sollicito timore custodiat, quod cum graui labore meminit acquisitum. Hinc inde insidiatores metuit atque hoc se perpeti quod ipse fecit ab aliis ferri pertimescit.

Gregorius XV. libro moralium.

Varia
Fons primus
[Back to top]

Auaricia ae

Auarus hic ardet estu concupiscencie ac multiplici cura custodie et post modum ardebit igne gehenne. Si potentiorem uidet, timet raptorem; si inferiorem, suspicatur furem. Infelix tanta patitur quanta pati timet.

Gregorius in quadam omelia.

Varia
Fons primus
[Back to top]

Auaricia af

Magna est securitas cordis nil habere concupiscencie secularis. Nam si ad terrena adipiscenda cor inhiat, securum transquillumque esse nullatenus potest quia aut non habita concupiscit ut habeat, aut adepta metuit ne amittat; et dum in aduersis sperat prospera, in prosperis formidat aduersa; huc illucque quasi quibusdam fluctibus uoluitur ac per modos uarios rerum alternancium mutabilitate uersatur. Si uero semel in appeticione superne patrie forti stabilitate animus figitur, minus temporalium rerum perturbacione uexatur.

Gregorius XXII. moralium super illud Iob: Si expaui ad multitudinem nimiam.

Varia
Fons primus
cf. Auaricia s
[Back to top]

Auaricia ag

Cursum suum quisque consideret et cognoscit sibi sufficere parua que habet, sed fortasse metuit ne in huius uite itinere sumptus desit. Longa nostra desideria increpat uita breuis. In cassum multa portantur cum iuxta est quo pergitur.

Gregorius omelia XXXII. super euangelio.

Varia
Fons primus
[Back to top]

Auaricia ah

Diuiciarum amor insatiabilis longe amplius torquet animam quam refrigeret usu suo, quarum acquisicio quidem laboris, possessio timoris, amissio plena doloris inuenitur.

Bernardus in quodam sermone.

Varia
Fons primus
[Back to top]

Auaricia ai

Quod sine miserabili gemitu dicendum non est; Christi opprobria, sputa, flagella, clauos, lanceam, crucem et mortem, hec omnia in fornace auaricie conflant et profligunt in acquisicione turpis questus et precium uniuersitatis suis marsupiis includere festinant; hoc solo sane a Iuda Scariothis differentes, quod ille horum omne emolumentum denariorum numero compensauit, isti uoratiori ingluuie lucrorum infinitas exigunt pecunias.

Bernardus super Cantica.

Varia
Fons primus
[Back to top]

Auaricia ak

Auarus terrena esurit ut mendicus, fidelis contemnit ut dominus. Ille possidendo mendicat, iste contemnendo seruat. Quere a quouis eorum quo insatiabili corde lucris temporalibus inhiant, quidnam de hiis sentiant qui sua uendentes et pauperibus dantes, regna celorum pro terrena mercantur substancia sapienter agant necne? Proculdubio respondit: sapienter. Quere iterum, cur quod approbat ipse non facit? Non possum, inquit. Quare? Profecto quia domina auaricia non permittit, quia liber non est, quia non sua sunt que possidere uidetur, sed nec ipse sui iuris est; si uere tua sunt expende ad lucra et pro terrenis celestia commutato; si non uales, scias te pecunie non dominum esse sed seruum, custodem non possesorem.

Bernardus super Cantica sermone XX.

Varia
Fons primus
[Back to top]

Auaricia al

Auaricia rotis uehitur quattuor uiciorum que sunt pusillanimitas, inhumanitas, contemptus Dei, mortis obliuio. Porro iumenta trahencia, tenacitas et rapacitas et hiis unus auriga ambobus presidet, habendi ardor. Sola quidem auaricia, quia conducere plures non patitur, uno contenta est seruitore.

Bernardus super Cantica sermone XXXIX.

Varia
Fons primus
[Back to top]

Auaricia am

Non mireris si pecunie milites superauerunt que apud discipulum tantam ostenderunt uirtutem. Nichil enim clausum constat, quod auro argentoque non pateat, nichil occultum, quod non pecunia indagante sit cognitum.

Crisostomus super illud Matthei ultimo: At illi accepta pecunia.

Varia
Fons primus
cf. Diuicie as
[Back to top]

Auaricia an

Qui pecunie seruit et presentibus compedibus constringitur et futuris paratur.

Crisostomus in omelia IX. super Mattheum.

Varia
Fons primus
[Back to top]

Auaricia ao

Auidus dictus ab auendo. Auere enim cupere est; hinc et auarus dictus est, eo quod fit auidus auri et nunquam opibus expletur.

Ysidorus in libro ethimologiarum.

Varia
Fons primus
[Back to top]

Auaricia ap

Qui bona mundi diligit, uelit, nolit, timoris et doloris pene succumbit.

Ysidorus III. de summo bono.

Varia
Fons primus
[Back to top]

Auaricia aq

O pestis maligna auaricie semper bonis animis detestanda, quid illesum? Quid inconcussum dimittis? Tu genus hominum confudisti, tu discipulum comitem Christi ab apostolatu precipitasti, tu milites custodientes sepulcrum captiuasti; nunquid bene dictum est, pecunie obediunt omnia?

Ecclesiasticus X. Rabanus super Mattheum in fine.

Varia
Fons primus
[Back to top]

Auaricia ar

Amori pecunie uilis est omnis affectio, et anima lucri cupida, eciam pro exiguo perire non metuit, nullumque est iusticie in illo corde uestigium in quo sibi auaricia fecit habitaculum.

Leo papa in quodam sermone.

Varia
Fons primus
[Back to top]

Auaricia as

Duo sunt que illicite solent acquirere, scilicet superbia et cupiditas, et duo que male fruuntur acquisitis: gula et luxuria. Duo sunt qui male possidere uolunt, scilicet prodigus et auarus. Vnus ut congreget, alter ut dissipet, et duo que possessa defendunt, id est intemperancia et prudencia mundi. Superbia dyabolo clausit celum, gula primo parenti abstulit paradisum. Auaricia diuiti aperuit infernum, intemperancia uero adhuc corrumpit mundum.

Hugo libro II. de claustro anime.

Varia
Fons primus
[Back to top]

Auaricia at

Auaricia est sua illicite retinere et aliena concupiscere.

Hugo ibidem.

Varia
Fons nondum repertus
[Back to top]

______________________________

Auaricia est glorie seu quarumlibet rerum insatiabilis et inhonesta cupido.

Ibidem.

Varia
Fons primus
[Back to top]

Auaricia au

Auaricia est per quam in animis hominum deificatur pecunia, nummo diuine ueneracionis exhibetur auctoritas, proh pudor; metallorum onera largiuntur honores ad metalli pondera ponderatos. Iam non Cesar sed nummus est omnia qui ab indiuidualibus usque ad generalissima honores singulos tanquam mediator excurrit. Iam nummus patriarcha noster efficitur, qui quosdam in archiepiscopatus intronizat apicem, quosdam episcopalis fastigii erigit in honorem, hos in archidiaconalibus adaptans officiis, alios aliarum pedestrium dignitatum coequans negociis.

Alanus libro de conquestione nature.

Varia
Fons primus
[Back to top]

Auaricia ax

Quid prodest cum Tulio oracionem rhetoricis colorum stellare syderibus, cum Aristotele ancipiti dialetice gladio a ueris falsa distinguere, cum Zenone falsitatem probabiliter defendere tunicare sophismata, cum Donato in accidencium congruencia nectere dictiones, cum sapiencia nostris temporibus nullius fructus premietur stipendiis nullius fame eam fauoris aura extollat, ipsa uero pecunia, honoris, titulos et laudis emat preconia?

Alanus ibidem.

Varia
Fons primus
cf. Sapiencia uel sciencia at
[Back to top]

Auaricia ay

Multos facit auaricia inter diuicias indigere. Iudicium enim Dei est ut in eo quo quis delinquit puniatur, ut semper indigeat qui semper indigenciam timet, sicut scriptum est: Qui timet pruinam ueniet super eum nix; suos hospites male remunerant, serpens in sinu, ignis in gremio, mus in pera.

Petrus Rauennas in quodam sermone.

Varia
Fontes proximi et primus
[Back to top]

Auaricia az

(Auaricia az abest in manuscriptis)

Auaricia ba

Quam multos seducit cupiditas, quam plures perdidit auaricia! Balaam asella redarguit et pedem sedentis attriuit, quia captus cupidine promissorum disposuerat maledicere Israeli. Achor populus lapidauit quia tulit argentum et aurum de anathemate Ierico. Nabot interemptus est ut Achab uineam possideret. Gryesi lepra perfudit quia peciit et recepit argentum et uestes sub nomine Elisei. Iudas laqueo se suspendit quia uendidit et tradidit Christum. Ananiam et Zaphiram subitanea mors extinxit quia de precio agri defraudauit apostolum. Edificauit Tyrus municionem suam et coaceruauit aurum et argentum quasi lutum platearum, sed ecce Dominus possidet eam et percussit fortitudinem eius.

Innocencius de uilitate condicionis humane.

Varia
Fons primus
[Back to top]

Auaricia bc

Auarus nec compacientibus compatitur nec miseris subuenit uel miseretur, sed offendit Deum, offendit proximum, offendit seipsum; nam Deo detinet debita, proximo denegat necessaria, sibi subtrahit opportuna; Deo ingratus, proximo impius, sibi crudelis. Viro cupido et tenacissimo sine racione est substancia et homini liuido adquid aurum? Qui sibi nequam est cui alii bonus erit? Non enim proximum suum diligit sicut seipsum quem inedia perimit, egestas consumit; nec Deum diligit super omnia qui Deo prefert aurum, preponit argentum.

Innocencius ibidem.

Varia
Fons primus
[Back to top]

Auaricia bd

Auaricia secundum apostolum est ydolorum seruitus quia sicut ydolatria seruit simulacro, sic auarus seruit thesauro. Nam ille cultum ydolatrie diligenter ampliat et iste cumulum pecunie libenter augmentat. Ille cum omni diligencia colit simulacrum et iste cum omni cura custodit thesaurum. Ille spem ponit in idolatria et iste spem constituit in pecunia. Ille timet mutilare simulacrum et iste timet minuere thesaurum.

Innocencius ibidem.

Varia
Fons primus
[Back to top]

Auaricia be

Auarus largus in alieno sed parcus in proprio; gulam euacuat ut archam adimpleat, corpus extenuat ut lucrum extendat; manum habet ad dandum collectam, sed ad recipiendum porrectam, ad dandum clausam, sed ad recipiendum apertam. Habet enim auarus damnacionem uite que nunc est et future.

Innocencius ibidem.

Varia
Fons primus
[Back to top]

Auaricia bf

Auaricia indagatrix lucrorum, manifeste prede auidissima uorago, neque habendi fructu felix et cupiditate querendi miserrima.

Valerius libro IX.

Varia
Fons primus
[Back to top]

Auaricia bg

Iam rusticitatis et miserie est uelle quantum satis est.

Seneca in extrema parte epistolarum epistola II.

Varia
Fons primus
[Back to top]

Auaricia bh

Monstro similis est auaricia senilis. Quid enim sibi uult non intelligo. Nam quid absurdius ut dici solet quam quo minus restat uie eo plus uiatici querere, et uia deficiente uiaticum augere?

Seneca in libro de moribus.

Varia
Fons primus
cf. Senectus ah
[Back to top]

Auaricia bi

Pecunia non satiat auariciam sed irritat; homo semper indiget pecunia conuenire scit. Michi crede non potest esse diues et felix.

Seneca ibidem.

Varia
Fons primus
[Back to top]

Auaricia bk

Si pecuniam habueris, necesse est ut te ipsum aut pecuniam uilem habeas.

Seneca in epistola.

Varia
Fontes proximus et primus
[Back to top]

Auaricia bl

Auarus ipse miserie causa est sue.

Seneca in prouerbiis.

Varia
Fons primus
[Back to top]

______________________________

Auarum facile capies ubi non sis idem. Auarus nisi cum moritur nichil recte facit. Auaro quid mali optes nisi ut diu uiuat. Auarus dampno pocius quam sapiens dolet.

Seneca in prouerbiis.

Varia
Fons primus
[Back to top]

Auaricia bm

Inopie pauca desunt, auaricie omnia, id est negandi causa auaro numquam deficit.

Ibidem.

Varia
Fons primus
[Back to top]

Auaricia bn

Pecunie oportet imperare non seruire. Pecunia si uti scias ancilla est, si nescias domina.

Seneca ibidem in prouerbiis.

Varia
Fons primus
[Back to top]

Auaricia bo

Pecunie querende et tuende modum haberi oportet.

Socrates in prouerbiis philosophorum.

Varia
Fons primus
[Back to top]

Auaricia bp

Auaros homines pupillos breuis etatis esse; nichil enim de suo uti licere. Auaro cuidam locupleti dixit: stulte, diuicie tue in te pereunt, paupertatique similes sunt, cum in hiis esuris, sitis et alges.

Pictagoras in prouerbiis philosophorum.

Varia
Fons primus
[Back to top]

Auaricia bq

Modus pecunie querendus est qui nec maior necessitate presenti possit esse nec minor.

Socrates in prouerbiis.

Varia
Fons primus
[Back to top]

Ubi

Aduocati r, Aduocati s
Communitas g
CUPIDITAS
Excusacio t
Fortitudo c
Senectus e, Senectus ah

Varia