Caritas a

In caritate pauper est diues; sine caritate omnis diues est pauper. Hec in aduersitatibus tollerat, in prosperitatibus temperat; in duris passionibus fortis est, in bonis operibus hylaris est; in temporalibus ditissima, in hospitalitate latissima; inter bonos fratres letissima, inter falsos pacientissima; in Abel per sacrificium lata, in Noe per diluuium secura, in Abrahe peregrinacione fidelissima, in Moyse inter iniurias lenissima, in Dauid tribulacionibus mitissima; in tribus pueris blandos ignes innocenter spectat, in Machabeis seuos ignes fortiter tollerat; casta in Susanna supra uirum, in Anna post uirum, in Maria preter uirum; libera in Paulo ad arguendum, humilis in Petro ad obediendum, humana in Christianis ad confitendum, diuina in Christo ad ignoscendum. Quid dicam de caritate? Si linguis hominum loquar et angelorum caritatem autem non habeam, nichil sum. Ipsa enim est anima litterarum, prophetie uirtus, sacramentorum salus, sciencie stabilimentum, fidei fructus, diuicie pauperum, uita morientium.

Augustinus de laude caritatis.

Varia
Fons primus
[Back to top]

Caritas b

Radix omnium bonorum est caritas, et radix omnium malorum est cupiditas, et simul ambe esse non possunt, quia nisi una radicitus euulsa fuerit, alia plantari non potest. Sine causa aliquis conatur ramos incidere, si radicem non contendit euellere.

Augustinus omelia VIII. super Iohannem et est de penitencia distinctione secunda.

Varia
Fontes proximus et primus
[Back to top]

Caritas c

Habere omnia sacramenta et malus esse potest; habere autem caritatem et malus esse non potest.

Augustinus de laude caritatis.

Varia
Fons primus
[Back to top]

Caritas d

Non numerositas operum, non diuturnitas temporum, sed maior caritas meliorque uoluntas auget meritum. Nam quod patet et quod latet in diuinis codicibus tenet qui caritatem seruat in moribus.

Augustinus ibidem.

Varia
Fons primus
[Back to top]

Caritas e

Sola caritas est que uincit omnia et sine qua nichil ualent omnia, et que ubicumque fuerit trahit ad se omnia. Amate scienciam sed anteponite caritatem. Sciencia si sola sit inflat; quia uero caritas edificat, scienciam non permittit inflari.

Augustinus de doctrina Christiana.

Varia
Fons primus
[Back to top]

Caritas f

Caritas est actio rectitudinis oculos semper habens ad Deum, glutinum animarum, societas fidelium, ocio non frigida, actio non fracta, non fugax, non audax, non preceps.

Augustinus ibidem.

Varia
Fons primus
[Back to top]

Caritas g

Si non uultis in ista heremo siti mori, bibite caritatem. Fons est quem uoluit Deus ponere ne deficiamus et habundancius eum bibemus cum ad patriam uenerimus.

Augustinus super epistolam Iohannis capitulo VII.

Varia
Fons primus
[Back to top]

Caritas h

Pascit esurientem caritas, pascit et superbia; caritas ut Deus laudetur, superbia ut ipsa laudetur. Vestit nudos caritas, uestit et superbia, ieiunat caritas, ieiunat et superbia.

Augustinus ibidem capitulo VIII.

Varia
Fons primus
[Back to top]

Caritas i

Caritas alios parturit cum aliis infirmatur; alios curat edificare, alios contremiscit offendere; ad alios se inclinat cum aliis erigit, aliis blanda, aliis seuera, nulli inimica, omnibus mater.

Augustinus de cathetizandis rudibus.

Varia
Fons primus
cf. Prelacio aq
[Back to top]

Caritas k

Vide quantum bonum est caritas: si ita martyrium fecerimus ut nostras uelimus ab omnibus reliquias uenerari, et si opinionem uulgi sectantes intrepidi sanguinem fuderimus et substanciam nostram usque ad mendicitatem propriam dederimus, huic operi non tam premium quam pena debetur et perfidie magis tormenta sunt quam corona uictorie.

Ieronymus super epistolam ad Galathas et est I. questione I.: Vide.

Varia
Fontes proximus et primus
[Back to top]

Caritas l

Tunc ad alta caritas mirabiliter surgit, cum ad yma proximorum se misericorditer attrahit; et que benigne descendit ad infima, ualenter recurrit ad summa.

Gregorius in pastorali.

Varia
Fons primus
[Back to top]

Caritas m

Caritatis et pietatis miracula amate que tanto securiora sunt, quanto et occulta; de quibus apud Deum eo maior fit retribucio, quo apud homines minor est gloria.

Ibidem.

Varia
Fons primus
cf. Mirabile siue miraculum l
[Back to top]

Caritas n

Caritas que diuisa unire consueuit, cor iusti diuidi per multa compellit; quod tamen tanto arcius in Deo colligit, quanto lacius per sancta desideria spargit.

Gregorius ibidem.

Varia
Fons primus
[Back to top]

Caritas o

Caritas ad cuncta uirtutum facta dilatatur que a duobus preceptis incipit, sed se ad innumera extendit. Huius caritatis inicium est dilectio Dei et proximi, quia per amorem Dei amor proximi gignitur, et per amorem proximi amor Dei nutritur; nam qui Deum amare negligit, profecto proximum diligere nescit.

Gregorius libro X. moralium.

Varia
Fons primus
cf. Amor an
[Back to top]

Caritas p

Fortis est ut mors dilectio, quia sicut mors corpus interimit, sic ab amore rerum temporalium eterne uite caritas occidit; nam quem perfecte absorbuerit ad terrena foris desideria uelut insensibilem reddit, neque sanctus quilibet mori pro Domino potuisset in corpore, si prius a terrenis desideriis mortuus non fuisset in mente.

Gregorius omelia XI.

Varia
Fons primus
[Back to top]

Caritas q

Vt multi arboris rami ex una radice prodeunt, sic multe uirtutes ex una caritate generantur; nec habet aliquid uiriditatis ramus boni operis si non manet in radice caritatis.

Gregorius in omelia.

Varia
Fons primus
[Back to top]

Caritas r

Caritatis cum sit proprium nutrire concordiam, seruare composita, coniungere dissociata, dirigere praua, et uirtutes ceteras perfectionis sue munimine solidare, quisquis in eius radice se inserit, nec a uiriditate deficit nec a fructu inanescit.

Gregorius in omelia.

Varia
Fonst primus
[Back to top]

Caritas s

O bona mater caritas, que siue foueat infirmos, siue exerceat prouectos, siue arguat inquietos, diuersis diuersa exhibens, sicut filios diligit uniuersos! Cum te arguit mitis est, cum blanditur simplex est; pie solet seuire sine dolore mulcere; pacienter nouit irasci, humiliter indignari. Caritas hominum mater est et angelorum, non solum que in terris sed eciam que in celo sunt pacificauit. Ipsa est que Deum homini placauit et hominem Deo reconciliauit.

Bernardus epistola II.

Varia
Fons primus
[Back to top]

Caritas t

Cibus indigestus corpus corrumpit, inflatum et ydropicum reddit; si digestus fuerit, nutrit. Sic sciencia stomacho anime indigesta, si non fuerit igne caritatis decocta, malos humores generat. Numquid mali mores, mali humores?

Bernardus super illud I. ad Corinthios VIII.: Sciencia inflat, caritas edificat.

Varia
Fons primus
[Back to top]

Caritas u

Mens, quam semel affecerit caritas, sui iuris esse non sinit. Metuit quod nescit, dolet quod non oportet; sollicitatur plusquam uoluerit, compatitur nolens, miseretur inuita.

Bernardus in epistola.

Varia
Fons primus
[Back to top]

Caritas x

Obstinacio non permittit nos alterius cor ingredi, nec suspicio patitur credere nos ab aliis amari. Huic duplici morbo duplex caritas medetur: illa scilicet que non sua querit, et iterum illa que omnia credit.

Bernardus in quodam sermone.

Varia
Fons primus
[Back to top]

Caritas y

Caritas est mors criminum, uirtus pugnancium, palma uictorum, concordia mencium, societas electorum; quam fides concipit, ad quam spes currit, cui profectus omnium bonorum seruit.

Cassiodorus super Psalmos.

Varia
Fons primus
[Back to top]

Caritas z

Caritas Dei quedam uernalis est pluuia uirtutum, sub qua et beata uoluntas germinat et operacio sancta fructificat, paciens hic in aduersis, temperata in prosperis, humilitate potens, afflictione letissima, inimicis beniuola, bonis suis superans malos.

Cassiodorus super Psalmo XII.: Vsquequo.

Varia
Fons primus
[Back to top]

Caritas ab

Caritas robur est fidei, fides fortitudo est caritatis, et tunc uerum nomen est, ac uerus est fructus ambarum, cum insolubilis manet utriusque connexio. Vbi enim non simul fuerunt simul desunt, quia inuicem sibi et iuuamen et lumen sunt, donec desiderium credulitatis impleat, remuneracio uisionis et incommutabiliter uideatur et ametur quod nunc et sine fide non diligitur et sine dilectione non creditur.

Leo de ieiunio VII. mensis in sermone.

Varia
Fons primus
[Back to top]

Caritas ac

Nescio si quid maius in laude tua dicere possum quam ut Deum de celo traheres et hominem de terra ad celum eleuares. Magna uirtus tua ut per te usque ad hoc humiliaretur Deus et usque ad hoc exaltaretur homo.

Hugo de laude caritatis.

Varia
Fons primus
[Back to top]

Ubi

Amor ap
DILECTIO
Virtus r

Varia