Correctio a

Correctio est errorem innatum uel consuetudine factum freno racionis inhibere.

Augustinus de diffinicionibus.

Varia
Fons primus
[Back to top]

Correctio b

Nichil probat spiritualem uirum sicut peccati alieni tractacio cum liberacionem eius pocius quam insultacionem, pociusque auxilia quam conuicia meditatur et quantum facultas tribuitur suscipit.

Augustinus super epistolam ad Galathas.

Varia
Fons primus
[Back to top]

Correctio c

Nunquam alieni peccati obiurgandi suscipiendum est negocium nisi cum interius interrogacionibus examinantes nostram conscienciam liquido nobis coram Deo responderimus dilectione nos facere.

Augustinus ibidem.

Varia
Fons primus
[Back to top]

Correctio d

Quicquid lacerato animo dixeris, punientis est impetus, non caritas corrigentis; dilige et dic quicquid uoles.

Augustinus super epistolam ad Galathas.

Varia
Fons primus
[Back to top]

Correctio e

Raro et magna necessitate obiurgaciones adhibende sunt, ita tamen ut in hiis eciam ipsis non nobis sed Deo seruiatur instemus.

Augustinus libro II. de sermone Domini.

Varia
Fons primus
[Back to top]

Correctio f

Molestus est medicus furenti frenetico et pater indisciplinato filio; ille ligando, iste cedendo, sed ambo diligendo. Si autem istos negligant et perire permittant, ista pocius falsa mansuetudo crudelis est.

Augustinus ad Bonefacium de correctione Donatistarum.

Varia
Fons primus
[Back to top]

Correctio g

Cogunt multas inuenire medicinas multorum experimenta morborum, uerum in huius causis ubi per graues discensionum scissuras, non huius aut illius hominis periculum sed populorum strages iacet. Detrahendum est aliquid seueritati ut maioribus malis sanandis caritas sincera subueniat.

Augustinus ibidem et ponitur I. distinctione: Vt cum.

Varia
Fontes proximus et primus
[Back to top]

Correctio h

(Correctio h abest in manuscriptus)

Correctio i

Non uos iudicetis maliuolos esse quando alterius crimen iudicatis. Magis quippe innocentes non estis si fratres uestros, quos iudicando corrigere potestis, tacendo perire permittitis. Si enim frater tuus uulnus habet in corpore quod uelit occultari, dum timet secari, nonne crudeliter a te simuletur et misericorditer iudicaretur? Quanto ergo pocius debet manifestare ne deterius putrescat in corde?

Augustinus de communi uita uel regula clericorum.

Varia
Fons primus
[Back to top]

Correctio k

Que peccantur coram omnibus, coram omnibus corripienda sunt ut omnes timeant. Qui secreto peccauit in te, secreto corripe. Nam si solus nosti et eum uis coram aliis arguere, non es correptor sed proditor.

Augustinus de uerbis Domini super illud Matthei XVIII.: Si peccauerit in te frater tuus et cetera.

Varia
Fontes proximus et primus
[Back to top]

Correctio l

Foris terribiliter personet increpacio, intus lenitatis teneatur dilectio. Neque consencientes sitis malis ut approbetis, neque negligentes ut non arguatis, neque superbientes ut insultanter arguatis. Hoc est exire inde, hoc est immundum non tangere et uoluntate non consentire et ore non parcere.

Augustinus de uerbis Domini super Mattheum capitulo XVIII.

Varia
Fons primi
[Back to top]

Correctio m

Magis amat obiurgator sanans quam adulator dissimulans.

Augustinus in epistola ad Marcellinum.

Varia
Fons primus
[Back to top]

Correctio n

Plurimum interest quo animo quisque parcat. Sicuti enim est aliquando misericordia puniens, ita et crudelitas parcens.

Augustinus ad Macedonium epistola LXIIII.

Varia
Fons primus
[Back to top]

Correctio o

Non omnis qui parcit amicus est, nec omnis qui uerberat inimicus, quia qui freneticum ligat et litargicum excitat, ambobus molestus ambos amat. Ambos sanat; ambo quamdiu egri sunt indignantur, sed ambo sanati gratulantur.

Augustinus in epistola ad Vincencium Donatistam.

Varia
Fons primus
cf. Amicicia h
[Back to top]

Correctio p

Fidelis dispensator Paulus ueritatis non falsitatis Petrum arguendo. Petrus uero benigna pietate suscepit atque tam rarius atque sanctius exemplum posteris prebuit quo non dedignentur. Sicubi forte recti tramitem reliquissent eciam a posterioribus corrigi. Laudabilius, inquit, est accipere corrigentem quam audacter corrigere deuiantem.

Augustinus in epistola ad Ieronimum.

Varia
Fons primus
[Back to top]

Correctio q

Non putes te amare seruum quando eum non cedis, aut tunc amare filium quando ei non das disciplinam, aut tunc amare filium tuum quando eum non corripis. Non est ista caritas sed langor.

Augustinus de caritate sermone VII.

Varia
Fons primus
[Back to top]

Correctio r

Nam si propterea obiurgandis et corripiendis male agentibus quis parcit quia opportunius tempus inquirit, uel eisdem ipsis metuit ne deteriores ex hoc efficiantur, uel ad bonam uitam et piam erudiendos impediant aliosque infirmos premant atque auertant a fide, non uidetur esse cupiditatis occasio sed consilium caritatis.

Augustinus libro I. de ciuitate Dei.

Varia
Fons primus
[Back to top]

Correctio s

Plerumque ab eis ammonendis, obiurgandis et corripiendis male dissimulatur, ne uel eos offendamus uel ut eorum inimicicias deuitamus, ne impediant et noceant in istis temporalibus rebus quas adipisci adhuc appetit nostra crudelitas, siue quas amittere formidat infirmitas.

Augustinus ibidem.

Varia
Fons primus
[Back to top]

Correctio t

Accusare uicia officium est bonum quod cum mali faciunt alienas partes agunt. Cogitemus ergo cum aliquem reprehendere nos necessitas cogerit, utrum tale sit uicium quod nunquam habuimus et tunc cogitemus nos homines esse et habere potuisse, uel tale quod habuimus et iam non habemus et tunc tangat memoriam communis fragilitatis ut illam correctionem non odium sed misericordia precedat. Si autem inuenerimus nos in eodem uicio esse, non obiurgemus sed congemiscamus et ad qualiter deponendum inuitemus.

Augustinus in libro de sermone Domini in monte.

Varia
Fontes proximus et primus
[Back to top]

Correctio u

Qui cordis sui domum excolere non ualet, quomodo plurimorum adhibebit diligenciam? Et qui peccati trabem ex suo non potest eruere oculo, quomodo ex alterius oculo poterit amputare festucam?

Ambrosius in pastorali siue in libro de dignitate sacerdotali.

Varia
Fons primus
[Back to top]

Correctio x

Grauissimus nodus in ligno non potest expelli nisi grauissimo oppressorio.

Ambrosius super XXI. capitulum Matthei.

Varia
Fons nondum repertus
[Back to top]

Correctio y

Peccatum unius quod cognitum non arguitur multos contaminat, immo omnes qui norunt et non deuitant aut cum possunt arguere dissimulant. Non enim sibi uidetur peccare quando a nullo corripitur uel uitatur.

Ambrosius super epistolam I. ad Corinthios tractans illud: Modicum fermentum et cetera.

Varia
Fons primus
[Back to top]

Correctio z

Non osculatur pater filium sed aliquando castigat. Ergo quando castigatur qui diligitur, tunc circa eum pietas exercetur. Habet enim et amor plagas suas que dulciores sunt cum amarius inferuntur. Dulcior enim est religiosa castigacio quam blanda remissio.

Ambrosius in sermone de ad uincula Petri.

Varia
Fons primus
[Back to top]

Correctio ab

Plus proficit amica correctio quam accusacio turbulenta; illa pudorem incutit, hec indignacionem mouet.

Ambrosius super Lucam.

Varia
Fons primus
[Back to top]

Correctio ac

Nouit Deus mutare sentenciam, si tu noueris emendare delictum.

Ambrosius ibidem.

Varia
Fons primus
cf. Desperacio d
[Back to top]

Correctio ad

Inter cetera mandata peccantes posse arguere maxime libertatis est. Sed ille potest facere qui non meretur audire: Ypocrita, eice primum trabem de oculo tuo.

Ieronymus super illud Ephesios: Magis autem arguite et cetera.

Varia
Fons primus
[Back to top]

Correctio ae

Quid necesse est bis pungere non recalcitrantem per se satis erubescentem confundere amplius cui sua racio magister est, cui propria consciencia uirga et ingenita uerecundia lex discipline est?

Ieronymus in epistola ad Occeanum.

Varia
Fons primus
[Back to top]

Correctio af

Paulus apostolus inimicus nobis factus uera dicens saluatoris quia dura uidebantur eloquia, plurimi discipulorum retrorsum abierunt. Vnde non mirum si non et ipsi uiciis detrahentes offendimus plurimos. Disposui nasum secare fetentem; timeat qui criminosus est. Quid ad te qui te intelligis innocentem? De te dictum putas in quodcumque uicium stili mei mucro contorquetur.

Ieronymus in epistola ad Marcellam.

Varia
Fons primus
[Back to top]

Correctio ag

Phinees austeritatem, Helie zelum, Petri seueritatem, Ananiam et Zaphiram trucidantis, Paulique constanciam que Elimam magum uiis Domini resistentem eterna cecitate dampnauit. Non est crudelitas sed pro Deo pietas. Vnde et in lege dicitur: Si frater tuus et amicus et uxor que est in sinu tuo deprauare te uoluerit, sit manus tua super eos et effunde sanguinem eorum et auferes malum de medio Israhel.

Ieronymus in epistola ad Riparium presbyterem de austera correctione.

Varia
Fons primus
[Back to top]

Correctio ah

Quomodo potest preses ecclesie auferre malum de medio eius qui in delictum simile corruerit, aut qua libertate corripere peccantem potest cum tacitus ipse sibi respondeat eadem se admississe que corripit?

Ieronymus super epistolam ad Titum.

Varia
Fons primus
[Back to top]

Correctio ai

Que est ista iusticie inimica bonitas, palpare criminosos et uulnera eorum usque ad diem iudicii incurata seruare? Quod si eos durissimam penitenciam per plures annos uideremus agere, tunc nos et saluti eorum possemus consulere et statuta canonum deberemus temperare. Cum uero aliquibus non compunctio humilitatis, nec instancia operandi appareat, nec beatum Dauid imitentur qui dicit: Lauabo per singulas noctes, lachrimis meis stratum meum rigabo, et illud: Cinerem tanquam panem manducabam et potum meum cum fletu et cetera, nec eos ieiuniis et lectionibus uacare uideamus, possumus agnoscere, si ad primos gradus uel honores redirent, cum quanta negligencia et cum quanto torpore et inimica sue anime securitate permanerent.

Ieronymus in quadam epistola.

Varia
Fontes proximus et primus
[Back to top]

Correctio ak

Regat discipline uigor mansuetudinem et mansuetudo ornet uigorem, et sic alterum commendetur ex altero ut nec uigor sit rigidus, nec mansuetudo dissoluta.

Gregorius libro XIX. moralium.

Varia
Fons primus
[Back to top]

Correctio al

In correpcione quippe uiciorum subesse mereri debet iracundia, non preesse, ut execucionem iusticie non dominando preueniat sed simulando subsequatur et notum iudicium possessa impleat, non precurrat.

Gregorius libro XXVI. moralium.

Varia
Fons primus
[Back to top]

Correctio am

Si quis est Domini, iungatur michi. Si ille Dei dicitur qui ad ferienda uicia zelo diuini amoris excitatur, profecto se esse Dei denegat; qui in quantum sufficit, uitam carnalium corrigere recusat. Fit plerumque Deo gracior amore ardens uita post culpam quam securitate torpens innocencia.

Gregorius in pastorali capitulo XLIX.

Varia
Fons primus
cf. Penitencia x
[Back to top]

Correctio an

Qui non corrigit resecanda committit. Et facientis culpam habet qui quod potest corrigere negligit emendare.

Gregorius in registro.

Varia
Fons primus
[Back to top]

Correctio ao

Manifesta peccata non sunt occulta correctione purganda, sed palam sunt arguendi qui palam nocent ut dum aperta obiurgacione sanantur, hii qui eos imitando deliquerant, corrigantur. Dum enim unus corripitur, plurimi emendantur; et melius ut pro multorum salute unus condempnetur quam per unius licenciam multi periclitentur.

Gregorius in registro.

Varia
Fons primus
cf. Correctio bm
[Back to top]

Correctio ap

Verba sapiencium quasi stimuli et cetera. Clauis atque stimulis uerba sapiencium comparantur quia culpas delinquencium nesciunt calcare sed pungere.

Gregorius omelia VI. super euangelia.

Varia
Fons primus
[Back to top]

Correctio aq

Paulus arguit Petrum, Petrus uero laudauit Paulum. Amicus ergo ueritatis laudauit quod reprehensus est. Seque eciam minori fratri ad consensum dedit, quatenus qui primus erat in apostolatus culmine esset et primus humilitate. Et sequitur: Ecce a minori suo reprehenditur et reprehendi non dedignatur. Non ad memoriam reuocat quod primus in apostolatu uocatus est, non quod claues regni celestis accepit et cetera. Ne igitur increpacionis uerba dedignaretur audire, omnia dona que acceperat quasi a memoria repulit ut unum fortiter humilitatis donum teneret.

Gregorius super Ezechielem parte II. omelia VI.

Varia
Fons primus
[Back to top]

Correctio ar

Multi homines et culpam confitentur et humiles non sunt. Nam multos nouimus qui arguente nullo peccatores se esse confitentur. Cum uero de culpa sua fuerint fortasse correpti, patrocinium defensionis querunt ne peccatores esse uideantur. Et sequitur: Indicia autem uere confessionis sunt ut sicut quisque peccatorem se dicit, ita id de se dicenti alteri non contradicit. Et superbie uicium est ut quod fateri de se quisque sua sponte dignatur, hoc sibi dici ab aliis dedignatur.

Gregorius libro XXII. moralium super illud Iob XXXI.: Si celaui in sinu meo.

Varia
Fons primus
cf. Confessio q
[Back to top]

Correctio as

Tunc proteruos melius corrigimus cum ea que bene egisse credunt, male acta monstramus ut unde adepta gloria creditur, inde utilis confusio subsequatur.

Gregorius in pastorali.

Varia
Fons primus
[Back to top]

Correctio at

Maior culpa quo cicius quia culpa est agnoscitur eo eciam celerius emendatur. Minor uero dum quasi nulla creditur eo peius quo et securius in usu tenetur.

Gregorius ibidem.

Varia
Fons primus
cf. Peccatum ab
[Back to top]

Correctio au

Iuuenes plerumque seueritas admonicionis ad profectum dirigit, senes uero ad meliora opera deprecacio blanda componit.

Gregorius ibidem.

Varia
Fons primus
[Back to top]

Correctio ax

Si is qui corrigere nititur ira superatur, opprimit antequam corrigat. Nam dum plusquam debet attenditur, sub iuste ulcionis obtentu ad immanitatem crudelitatis effrenatur.

Gregorius XXVI. moralium.

Varia
Fons primus
[Back to top]

Correctio ay

Mundus esse a uiciis debet qui aliena corrigere curat; quatenus tanto perspicacius aliis fugienda uideat, quanto hec ipse per scienciam et uitam uerius declinat quia nequaquam pure in membro maculam considerat oculus quem puluis grauat et superiectas sordes tergere non ualent manus que lutum tenent.

Gregorius libro VI. moralium.

Varia
Fons primus
[Back to top]

Correctio az

Si ab increpacione idcirco reticemus quia contra nos insurgere derisionis odia formidamus, non iam lucra Dei sed nostra querimus.

Gregorius libro XX. moralium.

Varia
Fons primus
[Back to top]

Correctio ba

Non nunquam qui inter flagellorum duriciam remanent incorrecti dulci sunt ammonicione mulcendi. Nam plerumque quos cruciamenta non corrigunt ab iniquis actibus lenia blandimenta compescunt quia et egros quos fortis pigmentorum pocio curare non ualuit ad salutem pristinam tepens aqua reuocauit.

Gregorius in pastorali capitulo XXXVIII.

Varia
Fons primus
[Back to top]

Correctio bc

Sepe hoc magnis doctoribus mirandisque contingit ut quo alta caritate feruent, modum correctionis exagerent ut lingua aliquid quod non debet dicat quia mentem dilectio quantum debet inflammat.

Gregorius in pastorali et in moralibus.

Varia
Fons primus
cf. Venia q
[Back to top]

Correctio bd

Sicut laudabile decretumque est reuerenciam et honorem debitum exhibere maioribus, ita rectitudinis et Dei timoris est, si quid in eis correctione indigeret, nulla dissimulacione postponere ne totum corpus quod absit incipiat morbus inuadere, si langor non fuerit curatus in capite.

Gregorius ibidem.

Varia
Fons primus
[Back to top]

Correctio be

Impunitas incurie soboles, insolencie mater, radix impudicicie, transgressionum nutrix est.

Bernardus libro III. de consideracione.

Varia
Fons primus
[Back to top]

Correctio bf

Maiora crimina et tarde credenda sunt cum audiuntur et cicius punienda cum ueraciter agnoscuntur.

Bernardus super Cantica.

Varia
Fons primus
[Back to top]

Correctio bg

Mira peruersitas medicanti irasci qui non irascitur sagittanti, id est adulanti, uel ad peccatum incitanti qui sagittant in obscuro rectos corde.

Bernardus super Cantica.

Varia
Fons primus
[Back to top]

Correctio bh

Cum carpuntur uicia et inde scandalum oritur, ipse sibi scandali causa est qui fecit quod argui debeat, non ille qui arguit. Non ergo timeas contra caritatem esse, si unius scandalum multorum recompensaueris pace. Melius est enim ut pereat unus quam unitas.

Bernardus super Cantica sermone CII.

Varia
Fons primus
cf. Pax n
[Back to top]

Correctio bi

Prelati nostri culicem liquant et camelum deglutiunt dum maiora pretermittentes minora discuciunt. Optimi rerum estimatores qui magnam in minimis et paruam aut nullam in maximis adhibent diligenciam.

Bernardus tractans illud Matthei XXIII.: Duces ceci excolantes culicem, camelum autem glucientes.

Varia
Fons primus
[Back to top]

Correctio bk

Qui delinquentem superbo uel odioso animo corripit, non emendat sed percutit. Quicquid enim proteruus uel indignans animus protulerit obiurgantis furor est, non dilectio corrigentis.

Ysidorus libro III. capitulo XLI. de summo bono.

Varia
Fons primus
[Back to top]

Correctio bl

Qui blando uerbo castigatus non corrigitur, acrius necesse est arguatur. Cum dolore sunt abscidenda que leniter sanari non possunt.

Ysidorus ibidem capitulo XLVI.

Varia
Fons primus
[Back to top]

Correctio bm

Qui ammonitus secrete corrigi de peccato negligit, publice arguendus est ut uulnus quod occulte sanari nescit, manifeste debeat emendari. Manifesta peccata non sunt occulta correctione purganda. Palam enim sunt arguendi qui palam nocent ut dum illi aperta obiurgatione sanantur, hii qui eos imitando deliquerant corrigantur. Dum unus corripitur, plurimi emendantur. Melius est enim ut pro multorum saluacione unus condempnetur, quam per unius licenciam multi periclitentur.

Ysidorus libro III. de summo bono capitulo XLVI.

Varia
Fons primus
cf. Correctio ao
[Back to top]

Correctio bn

Facilius reprehendimus uicia aliena quam nostra. Nam sepe que peruersa in aliis iudicamus in nobis nocibilia esse minus sentimus.

Ysidorus ibidem.

Varia
Fons primus
[Back to top]

Correctio bo

Non debet uicia aliena corripere qui adhuc uiciorum contagionibus fuerit inuolutus. Improbum enim est arguere quicquam in alio quod adhuc reprehendit in se ipso. Qui enim ueraciter fraternam uult corripere ac sanare infirmitatem, talem se prestare fraterne utilitati studeat ut eum quem corripere cupit humili corde admoneat. Sicut enim uiri spirituales alieni peccati emendacionem expectant, ita proterui delinquentibus deridendo insultant et quantum in ipsis est eos insanabiles putant.

Ysidorus libro III. de summo bono capitulo XXXII.

Varia
Fons primus
[Back to top]

Correctio bp

Plerumque princeps iustus malorum errores dissimulare nouit non quod iniquitati eorum consenciat, sed quod aptum tempus correctionis expectet quando eorum uicia uel emendare ualeat uel punire.

Ysidorus ibidem libro III. in fine.

Varia
Fons primus
[Back to top]

Correctio bq

Non uniformiter secundum mensuram delictorum increpaciones quoque oportet inferri, sed diligenter inspicere eorum qui deliquerunt uires atque propositum ne forte uolens rupta sarcire maiorem operetur dirupcionem, et cupiens erigere collapsa casum inferat grauiorem.

Crisostomus in suo dyalogo libro II.

Varia
Fons nondum repertus
[Back to top]

Correctio br

Semper scelera dum non resecantur increscunt et in augmenta facinorum prosilitur, quociens secura impunitate peccatur. Dum enim in Absolon fratris occisi facinus non uindicatur, in parricidium patris recidiuum facinus iteratur.

Crisostomus in quodam sermone.

Varia
Fons primus
[Back to top]

Correctio bs

Circa uitam tuam esto austerus, circa aliorum benignus. Audiant te homines parua mandantem et grauia facientem.

Crisostomus super illud Matthei XXIII.: Digito autem suo.

Varia
Fons primus
cf. Penitencia al
[Back to top]

Correctio bt

Si docens misteria legis aperias, secretorum archana discucias, peccantem uero non arguas, negligentem non corripias, seueritatem discipline non teneas, obtulisti quidem coctum sed non duplicatum. Ignis enim tuus tantum illuminat non accendit. Qui ergo recte offert et recte diuidit, coctum offert duplicatum ut consciencie igniculum lumine seueritatis admisceat.

Origenes super Exodi omelia XXX.

Varia
Fons primus
[Back to top]

Correctio bu

Non uult te Dominus si forte uideris peccatum fratris tui continuo euolare ad publicum et proclamare passim et diuulgare aliena peccata. Quod esset utique non corrigentis sed pocius infamantis. Solus, inquit, inter te et ipsum corripe eum. Vbi enim seruari sibi misterium uiderit ille qui peccat seruabit et ipse emendacionis pudorem. Si uero diffamari se uideat, illico ad denegandam impudenciam conuertetur, et non solum non emendaueris peccatum, sed et duplicaueris.

Origenes super Leuiticum capitulo XXXIII. tractans illud: Si uideris fratrem tuum peccare, argue eum inter te et ipsum.

Varia
Fons primus
[Back to top]

Correctio bx

Illud non ociose transcurrendum est quod uno peccante ira Dei super omnem populum uenit. Hoc quomodo accidit? Quando sacerdotes qui populo presunt erga delinquentes benigni uolunt uideri et uerentes peccancium linguas ne forte male de eis male loquantur, sacerdotalis seueritatis immemores nolunt complere quod scriptum est: Peccantes coram omnibus argue ut ceteri et cetera.

Idem super Numeri.

Varia
Fons primus
[Back to top]

Correctio by

Dum sacerdotes uni parcunt, uniuerse ecclesie moliuntur interitum. Que est ista bonitas, ista misericordia uni parcere et omnes in discrimen adducere? Polluitur enim ex uno peccatore populus, sicut ex una oue morbida uniuersus grex inficitur.

Origenes ibidem super librum Numerorum omelia LXXXI.

Varia
Fons primus
[Back to top]

Correctio bz

Ita peccat qui uidet fratrem peccare et tacet, sicut qui penitenti non indulget. Nam qui dixit si peccauerit, dimitte; premisit, si peccauerit, increpa, ne difficilis sit uenia et remissa indulgencia. Rabanus super illud Matthei XVIII.: Si peccauerit in te frater tuus.

Varia
Fons proximus et primus
[Back to top]

Correctio ca

Puella in domo paucis arbitris surgit et eis ut nemini manifestent precipit. Iuuenis extra portam turba comittante. Lazarus quoque coram multis quia publica noxa publico eget remedio, leuis leuiori et occulta culpa secreta indiget penitencia.

Rabanus super illud Matthei IX.: Puella surge et surrexit puer.

Varia
Fontes proximus, medius, et primus
[Back to top]

Correctio cb

Leniter castigatus exhibet reuerenciam castiganti; asperitate autem nimie increpacionis offensus nec increpacionem recipit nec salutem.

Prosper libro II. de uita contemplatiua.

Varia
Fons primus
[Back to top]

Correctio cd

Odio habeantur peccata non homines; corripiantur tumidi, tollerentur infirmi, et quod seuerius castigare necesse est, non seuientis plectatur animo sed medentis.

Leo papa et ponitur LXXXVI. distinctione.

Varia
Fontes proximus et primus
[Back to top]

Correctio ce

Facientis procul dubio culpam habet qui quod potest corrigere negligit emendare. Et libat Domino prospera qui ab afflictis pellit aduersa, et negligere cum possit perturbare peruersos nichil aliud est quam fouere. Nec caret scrupulo consensionis occulte qui manifesto facinori desinit obuiare. Et primus innocencie gradus est odisse nefanda. Latum pandit delinquentibus aditum qui iungit cum prauitate consensum. Et nichil prodest alicui non puniri proprio qui puniendus est de alieno peccato.

Ibidem.

Varia
Fontes proximus et primi
[Back to top]

Correctio cf

Iniquitas quippe mortalium more putredinis sine fine uagaret, si eam medicinalis increpacio minime desecaret.

Cassiodorus super Psalmum XXXVIII.

Varia
Fons primus
[Back to top]

Correctio cg

Occurrendum est ne tractu temporis inpunita malicia conualescat, et uires iniquitati dissimulacio uel indulgencior gracia subministret, sed clarius audita correctio doceat impericiam et compescat audaciam.

Cassiodorus in quadam epistola.

Varia
Fons primus
[Back to top]

Correctio ch

Culpam indulgencia preuenire non debet ne securitas audaciam alat et ad delinquendum fiducia remissionis inuitet.

Ibidem.

Varia
Fons primus
[Back to top]

Correctio ci

Malum cum perseuerat augetur et remediale bonum est in peccato accelerata correctio.

Cassiodorus libro III. epistolarum.

Varia
Fons primus
[Back to top]

Correctio ck

Egris non una causa salutis est; alter cibis reficitur, alter per abstinencie beneficia tenuatur; hic lauacra mollia, ille ferrum querit ad uulnera; et uarium poscit diuersa qualitas passionum. Feroces districtione premendi sunt, mansueti ciuiliter admonendi, dolosi caute, simplices sub lenitate tractandi sunt, et ideo ubique necessaria probatur esse prudencia que rebus omnibus adhibere uidetur accommoda.

Cassiodorus ibidem libro IIII. epistolarum.

Varia
Fons primus
[Back to top]

Correctio cl

Exhibe te Iohannem incestuosis, Mathathiam apostatis, fornicantibus Phineem, Helyam ydolatris, Petrum mencientibus, blasphemantibus Paulum, negociantibus Christum. Breuissimus est huius uite temporalis excursus; finis autem horribilis et incertus.

Petrus Rauennas in epistola quadam.

Varia
Fons proximus et primi
[Back to top]

Correctio cm

Peruersum corrigere nichil aliud est quam stimulare insanum quam oleum adhibere camino et uentis incendia superare.

Petrus Rauennas in quodam sermone.

Varia
Fons primus
[Back to top]

Correctio cn

Difficile est cor malicia induratum ad formam discipline et speciem honestatis incuruare, sed necesse est ut dura materia cum facile ad formam non flectitur, ei et acrioris flaminis incendium et mallei grauioris tonsio adhibeatur.

Hugo de sancto Victore in libro de institucione nouiciorum.

Varia
Fons primus
[Back to top]

Correctio co

Seueritas est per quam iudiciaria potestas uel uindicta districtius in aliquem exercetur.

Tullius II. rethorice.

Varia
Fons primus
[Back to top]

Correctio cp

Tarencius intuens uillicum suum male meritum, sumpsissem, inquit, a te supplicium nisi tibi iratus essem. Maluit enim impunitum relinquere quam per iram iusto amplius punire.

Valerius Maximus.

Varia
Fons primus
cf. Paciencia av
[Back to top]

Correctio cq

In uindicando siue corrigendo hec tria lex secuta est que princeps quoque sequi debet: ut aut eum quem punit emendet, aut pena eius ceteros meliores reddat, aut sublatis malis securiores ceteri uiuant.

Seneca de clemencia ad Neronem.

Varia
Fons primus
[Back to top]

Correctio cr

Non minus turpia sunt principi multa supplicia quam medico multa funera.

Seneca ibidem.

Varia
Fons primus
[Back to top]

Correctio cs

Fortassis uicium de quo conquereris, si diligenter inspexeris, in sinu reperies. Inique publico crimini irasceris, stulte tu ut absoluaris ignosce.

Ibidem.

Varia
Fons primus
[Back to top]

Correctio ct

Obiurgacioni semper aliquid blande commisce; facilius penetrant uerba que mollia uadunt quam que aspera.

Seneca in quadam epistola.

Varia
Fons primus
[Back to top]

Correctio cu

Vicia transmittit ad posteros qui presentibus culpis ignoscit. Bonis nocet qui malis parcit.

Seneca in libro de moribus.

Varia
Fons primus
[Back to top]

Correctio cx

Nemo prudens punit quia peccatum est sed ne peccetur. Res enim optima est non sceleratos stirpare sed scelera.

Seneca ibidem.

Varia
Fontes primi
[Back to top]

Correctio cy

Audebo peccanti mala sua ostendere. Vicia eius, si non excidero, inhibebo; non desinent sed intermittent. Fortasse autem desinent, si intermittendi consuetudinem fecerint.

Seneca XL. epistola.

Varia
Fons primus
[Back to top]

Correctio cz

Nobilis equus umbra uirge regitur ignauus nec calcaribus concitari potest. Vulgi impericiam ad res iustas sola constringit necessitas.

Seneca de moribus.

Varia
Fontes primi
[Back to top]

Correctio da

Puniendis peccatis tres esse causas existimatum est: una cum adhibetur pena castigandi atque emendandi gracia ut is qui deliquit attentior fiat correctiorque; alia est cum dignitas eius auctoritasque in quem peccatur tuenda est ne pretermissa animaduersio contemptum eius parcat; tercia propter exemplum ut ceteri metu pene terreantur.

Agellius libro VII. et ponit Taurus in commento Platonis.

Varia
Fontes primi
[Back to top]

Ubi

Adiutorium n
Adulacio e, Adulacio am
Amicicia c, Amicicia h, Amicicia o, Amicicia dh
Communitas a, Communitas e
Confessio m, Confessio ae
Consideracio g
Consuetudo t
Conuersacio ah
Crudelitas a, Crudelitas d, Crudelitas e, Crudelitas f
Disciplina c
Discordia a
Discrecio o
Diuicie ae
Doctrina l
Excusacio g, Excusacio k
Exemplum f, Exemplum ae, Exemplum ah
Homicidium c
Ira ar
Iusticia b
Malicia q
Mansuetudo e, Mansuetudo g
Medicina a, Medicina d
Miseria g (1), Miseria g (2)
Munus a
Penitencia l, Penitencia al
Predicacio ag, Predicacio an
Prelacio s, Prelacio t, Prelacio u, Prelacio bf, Prelacio ce
Sacerdos s, Sacerdos z, Sacerdos ao
Subiectio c
Venia q
Verecundia p
Veritas e
Vicium n

Varia