Crux a

Crux Christi nobis tocius causa beatitudinis est. Hec nos a cecitate liberauit erroris; hec a tenebris reddidit luci; hec debellatos reddidit quieti; hec alienos Deo coniunxit, longe constitutos proximos presentauit; hec peregrinantes ciues ostendit; hec discordie amputacio est, hec pacis firmamentum, hec donorum omnium habundanda largicio.

Augustinus in sermone de Parasceue.

Varia
Fons primus
[Back to top]

Crux b

Hodie crux fixa est et seculum sanctificatum est; hodie crux fixa est et demones dispersi sunt; hodie crux fixa est et mors subuersa est; hodie crux uicit et mors uicta est; hodie dyabolus uictus est et homo solutus est et Deus glorificatus est.

Augustinus ibidem in sermone de Parasceue.

Varia
Fons nondum repertus
[Back to top]

Crux c

Crucem ut in ea gloriemur Dominus suo gestans humero pro uirga regni nobis commendauit. Quod est grande ludibrium impiis, grande misterium piis. Et unde mundi philosophus erubuit, ibi apostolus thesaurum reperit. Quod illi uisum est stulticia, apostolo factum est sapiencia et gloria.

Augustinus super illud Gallatas VI.: Michi absit gloriari nisi in cruce Domini nostri.

Varia
Fontes proximus et primi
[Back to top]

Crux d

Signum crucis a nobis expellit exterminatorem, si tamen cor nostrum Christum habeat inhabitatorem.

Augustinus super Iohannem.

Varia
Fons primus
[Back to top]

Crux e

Auctor pietatis in cruce pendens testamentum condidit, singulis pietatis opera distribuens: apostolis persecucionem, Iudeis corpus, patri spiritum, uirgini paranimphum, latroni paradysum, peccatori infernum, Christianis uere penitentibus crucem commendauit.

Ambrosius in sermone de passione.

Varia
Fons primus
cf. Passio n
[Back to top]

Crux f

Dei Filius sustinuit ignominiam crucis et tu beatos putas qui felicitate istius seculi et deliciis perfruuntur.

Ieronymus in epistola.

Varia
Fons primus
[Back to top]

______________________________

Si ingressi fuerint ad te latrunculi per oculos, per aspectum crucis puni eos.

Ieronymus in quadam epistola.

Varia
Fons nondum repertus
[Back to top]

Crux g

Duobus modis crux tollitur, cum aut per abstinenciam afficitur corpus, aut per compassionem proximi affligitur animus.

Gregorius in omelia: Si quis uult uenire post me et cetera.

Varia
Fons primus
[Back to top]

Crux h

Dyabolus in uirga crucis transgluciens carnem humanitatis, transfixus est hamo diuinitatis.

Gregorius in omelia.

Varia
Fontes proximus et primi
[Back to top]

Crux i

Christus in passione pacienciam exhibet, humilitatem commendat, obedienciam implet, caritatem perficit. Hiis uirtutum gemmis quatuor cornua crucis ornantur, et est supereminens caritas, a dextris obediencia, a sinistris paciencia, in profundo radix uirtutum humilitas.

Bernardus super Cantica sermone LXV.

Varia
Fons primus
cf. Crux k
[Back to top]

Crux k

Scapulis tuis obumbrasti michi et cetera. Sub hiis scapulis quatuor nobis beneficia conferuntur. Sub hiis enim abscondimur, sub hiis ab incursu ancipitrum et miluorum protegimur que sunt aeree potestates, sub hiis umbraculum salubre nos refrigerat et nimium solis ardorem repellit, sub hiis quoque alimur et fouemur. Hiis uirtutum gemmis quatuor cornua crucis ornantur.

Bernardus ibidem.

Varia
Fons primus
cf. Crux i & Christus ae
[Back to top]

Crux l

O uere celestis planta, preciosior cunctis, sanctior uniuersis! O uere lignum uite quod solum fuit dignum portare salutis fructum!

Bernardus in sermone.

Varia
Fons primus
[Back to top]

Crux m

Vide quid de Deo tuo sencias. Vide quantum de eo presumas. Vide quibus brachiis uicarie caritatis redamandus et amplectandus sit qui tanti te estimauit, immo qui tanti te fecit. De latere enim suo te formauit quando pro te in cruce obdormiuit et ob hoc sompnum mortis excepit. Propter te a Deo Patre exiuit et matrem synagogam reliquit ut, adherens ei, unus cum eo spiritus efficiaris.

Bernardus super Cantica sermone XXVIII.

Varia
Fons primus
[Back to top]

Crux n

Crux est humilium inuicta tuicio, superborum deiectio, uictoria Christi, perdicio dyaboli, infernorum destructio, celestium confirmacio, mors infidelium, uita iustorum de quo Iohannes Crisostomus: Crux est Christianorum spes, crux Romanorum uictoria, mortuorum resurrectio, cecorum dux, conuersorum uia, claudorum baculus, pauperum consolacio, arbor resurrectionis, lignum uite eterne.

Cassiodorus super illud Psalmum IIII.: Signatum est super nos et cetera.

Varia
Fontes proximus et primi
[Back to top]

Crux o

Crux Christi clauis est paradysi. Hec infirmorum baculus, pastorum uirga, conuertencium auxilium manuductio, proficiencium perfectio, anime salus et corporis, omnium malorum auersio, omnium bonorum datrix.

Damascenus libro IIII.

Varia
Fons primus
[Back to top]

Crux p

Crux non solum dicitur que tempore passionis ligni afflictione conficitur, sed que tocius uite curriculo cunctarum disciplinarum uirtutibus coaptatur ut non solum intelligatur crux ligni patibulum, sed pie uite uirtutisque propositum. Vnde omnis Christiani uita qui secundum euangelium uixerit, crux est atque martirium.

Maximus in sermone de martiribus.

Varia
Fons primus
cf. Christuanus g
[Back to top]

Ubi

PASSIO

Varia