Passio a

Inspice uulnera pendentis, sanguinem morientis, precium redimentis, cicatrices resurgentis. Caput habet inclinatum ad osculandum, cor apertum ad diligendum, brachia extensa ad amplexandum, totum corpus expositum ad redimendum. Hec quanta sint cogitate; hec in statera uestri cordis appendite ut totus uobis figatur in corde qui totus pro uobis fixus fuit in cruce.

Augustinus in libro de uirginitate.

Varia
Fontes primi
[Back to top]

Passio b

Multos filios Deus fecit. Vnicus filius Dei emit sibi fratres sanguine suo, probauit reprobatus, redemit uenditus, honorauit iniuriatus, uiuificauit occisus. Venditis rebus nostris nullum maius earum precium accipimus quam nos ipsos quia talibus implicati nostri non eramus.

Augustinus in sermone.

Varia
Fontes primi
[Back to top]

Passio c

Fusus est sanguis medici et factus est medicamentum frenetici.

Augustinus in libro contra quinque hereses.

Varia
Fons primus
[Back to top]

Passio d

Filius Dei ad crucem ducitur, expalmatur qui est uera palma uictorie, spinis coronatur qui peccatorum spinas uenit confringere, ligatur qui soluit compeditos, ligno suspenditur qui erigit elisos; aceto potatur fons uite, disciplina ceditur, salus uulneratur, uita moritur; occidit ad tempus uitam mors ut in perpetuum a uita occideretur mors.

Augustinus in libro de quatuor uirtutibus caritatis.

Varia
Fons primus
[Back to top]

Passio e

Non ulla res officiorum laborem ad portanda onera aliorum facit libenter impendi nisi cum cogitamus quanta pro nobis pertulit Dominus.

Augustinus de uerbis apostoli.

Varia
Fons primus
[Back to top]

Passio f

Homo factus est hominis factor ut suggeret ubera regens sydera, ut esuriret panis, ut sitiret fons, dormiret lux, ab itinere uia fatigaretur, falsis testibus ueritas occultaretur, iudex uiuorum et mortuorum a iudice mortali iudicaretur, ab iniustis iusticia dampnaretur, flagellis disciplina cederetur, spinis botrus coronaretur, in ligno fundamentum suspenderetur, uirtus infirmaretur, salus uulneraretur, uita moriretur.

Augustinus in sermone de natali Domini.

Varia
Fons primus
[Back to top]

Passio g

Congruit nostre deuotioni ut qui Domini crucifixi passionem celebraturi sumus, reprimendarum carnalium uoluptatum crucem nobis ipsi eciam faciamus.

Augustinus in sermone de quadragesima.

Varia
Fons primus
[Back to top]

Passio h

Quem uis contempnere, precium eius attende et cum morte Christi totum mundum appende.

Augustinus de uerbis Domini.

Varia
Fons primus
[Back to top]

Passio i

O munde immunde, uenit qui te redimit et turbaris et tunc uis eum perdere quando ille te disposuit liberare!

Augustinus II. libro de symbolo.

Varia
Fons primus
[Back to top]

Passio k

Fratres, ut a peccato sanemur, Christum crucifixum intueamur. Quomodo qui intuebantur serpentem eneum in deserto, non peribant morsibus serpentum, sic qui intuentur fide Christi mortem, sanantur a morsibus peccatorum.

Augustinus super Iohannem.

Varia
Fons primus
[Back to top]

Passio l

Noli tantum amittere beneficium, o homo, propterea Christus dominationi mortis se subdidit ut te iugo dominationis erueret. Ille suscepit mortis seruitutem ut tibi tribueret uite eterne libertatem.

Ambrosius super Beati immaculati.

Varia
Fons primus
[Back to top]

Passio m

Stultum est cum gladiis querere eum qui ultro se offert, et in nocte per proditorem inuestigare quasi latentem qui cotidie in templo docet. Sed factum congruit tempori et personis quia cum essent tenebre in tenebroso tempore, tenebrosum opus exercebant.

Ambrosius super illud Matthei XXVI.: Cum gladiis et fustibus et cetera.

Varia
Fons primus
[Back to top]

Passio n

Auctor pietatis in cruce pendens testamentum condidit, singulis pietatis opera distribuens apostolis persecutionem, Iudeis corpus, patri spiritum, uirgini paranimphum, latroni paradysum, peccatori infernum, Christianis penitentibus crucem.

Ambrosius in quodam sermone.

Varia
Fons primus
cf. Crux e
[Back to top]

Passio o

O stulte et cece grex sacerdotum! Nunquid impossible ei de paruo stipite ligni descendere qui descendit a celorum altitudine? Nunquid tua uincula possent illum tenere quem celi non possunt capere? Non uenit ut se liberaret quia sub seruitute non erat, sed ut nos de seruitute redimeret.

Ambrosius super illud Matthei XXVII.: Si rex Israel est descendat de cruce.

Varia
Fons primus
[Back to top]

Passio p

Doles, Domine, non tua uulnera sed mea, non tuam mortem sed nostram infirmitatem.

Ambrosius super Lucam.

Varia
Fons primus
[Back to top]

Passio q

Fraudulenta promissio! Maius fecit surgens de sepulcro et non creditis. Nunc si de cruce descenderet, non crederetis.

Ieronymus super illud Matthei XXVII.: Descendat de cruce et credimus ei.

Varia
Fontes proximus et primus
[Back to top]

Passio r

Omnis creatura compatitur Christo morienti: sol obscuratur, terra mouetur, petre scinduntur, uelum templi diuiditur, sepulcra aperiuntur. Solus miser homo non compatitur pro quo solo Christus patitur.

Ieronymus super Mattheum.

Varia
Fons primus
[Back to top]

Passio s

Conspui uoluit ut nos lauaret, uelari uoluit ut uelamen culpe et ignorancie a cordibus nostris auferret, in capite percuti ut caput nostrum, id est Adam, sanitati restitueret, colaphis cedi et uerbis derideri ut nos ei labiis et manibus, id est uerbis et operibus, applaudamus.

Ieronymus in quodam sermone.

Varia
Fons primus
[Back to top]

Passio t

Traditus est Ihesus militibus uerberandus et illud sacratissimum corpus pectusque Dei capax flagella sumpserunt.

Ieronymus super Mattheum in fine.

Varia
Fons primus
[Back to top]

Passio u

Cum enim posset nobis eciam non moriendo succurrere, uoluit tamen hominibus moriendo subuenire quia nos uidelicet minus amasset, nec uim sue dilectionis nobis ostenderet nisi hoc quod a nobis tolleret ad tempus ipse sustineret.

Gregorius XX. libro moralium.

Varia
Fons primus
[Back to top]

Passio x

Nichil adeo graue quod non equanimiter tolleretur, si Christi passio ad memoriam reducatur.

Gregorius in quadam omelia.

Varia
Fons nondum repertus
[Back to top]

Passio y

Nam tanto Deus ab hominibus dignius honorandus est, quanto pro hominibus indigna suscepit.

Gregorius in omelia.

Varia
Fons primus
[Back to top]

Passio z

[Passio z abest in manuscriptis]

Passio ab

Caput angelicis tremebundum spiritibus densitate spinarum pungitur; facies pulcra pre filiis hominum sputis Iudeorum deturpatur; oculi lucidiores sole caligantur in morte; aures que audiunt angelicos cantus, audiunt peccatorum insultus; os quod docet angelos, felle et acceto potatur; pedes quorum scabellum adoratur, cruci clauo affiguntur; manus que formauerunt celos, sunt in cruce extense et clauis affixe; corpus uerberatur, latus lancea perforatur. Et quid plura? Non remansit in eo nisi lingua ut pro peccatoribus oraret et matrem discipulo commendaret.

Bernardus in quodam sermone.

Varia
Fons primus
[Back to top]

Passio ac

Passio tua, Domine Ihesu, ultimum refugium, singulare remedium, deficiente sapiencia, iusticia non sufficiente, subcumbentibus meritis, illa succurrit. Cum tamen defecerit uirtus mea non conturbabor, non diffido. Scio quid faciam: Calicem salutaris accipiam et cetera.

Bernardus super Cantica sermone XXII.

Varia
Fons primus
Fons primus 1550 edition
[Back to top]

Passio ad

Quid tam efficax ad curandum consciencie uulnera, necnon ad purgandam aciem mentis, quam Christi uulnerum sedula meditatio?

Bernardus super Cantica sermone LXII.

Varia
Fons primus
[Back to top]

Passio ae

In passione Domini tria specialiter conuenit intueri: opus, modum, causam. Nam in opere quidem paciencia, in modo humilitas, in causa caritas commendatur; paciencia singularis, humilitas admirabilis, sed caritas inestimabilis.

Bernardus super Cantica sermone LXIII.

Varia
Fons primus
Fons primus 1550 edition
[Back to top]

Passio af

Pater ignosce eis quia nesciunt quid faciunt. Christus flagellis cesus, spinis coronatus, clauis confossus, patibulo affixus, opprobriis saturatus, omnium tamen dolorum immemor ait: ignosce illis. Hinc multe miserie corporis, hinc multe miserie cordis, hinc dolores, hinc miserationes, hinc oleum exultationis, hinc gutte sanguinis decurrentis in terram.

Bernardus super Cantica sermone XXIII.

Varia
Fons primus
[Back to top]

Passio ag

Quam dulciter, Domine Ihesu, cum hominibus conuersatus es! Quam habundanter multa et magna bona hominibus largitus es! Quam fortiter, tam indigna, tam aspera et dura pro hominibus passus es; dura uerba, duriora uerbera, durissima supplicia!

Bernardus super Cantica sermone III.

Varia
Fons primus
[Back to top]

Passio ah

O duri et indurati et obdurati filii Adam quos non emollit tanta benignitas, tanta flamma, tam ingens ardor amoris, tam uehemens amator qui pro uilibus sarcinulis, tam preciosas merces expendit!

Bernardus ibidem.

Varia
Fons primus
[Back to top]

Passio ai

O bone Ihesu, quid tibi est? Morti nos debuimus et tu soluis? Nos peccauimus et tu luis? Opus sine exemplo, gracia sine merito, caritas sine modo.

Bernardus in quodam sermone.

Varia
Fons nondum repertus
[Back to top]

Passio ak

Nonne satis propter te uulneratus sum? Nunquid pro iniquitate tua afflictus sum? Cur addis afflictionem afflicto? Magis aggrauant me uulnera tui peccati quam uulnera corporis mei.

Bernardus in quodam sermone.

Varia
Fons nondum repertus
[Back to top]

Passio al

Scio quod merita mea michi non sufficiunt quod michi deest audacter usurpo ex uisceribus Christi que misericordia affluunt nec desunt foramina per que defluant. Patet enim archanum cordis per foramina corporis; patent uiscera misericordie Dei nostri in quibus uisitauit nos oriens ex alto.

Bernardus in quodam sermone.

Varia
Fons primus
[Back to top]

Passio am

Dilexit nos Deus dulciter, sapienter, fortiter. Dulciter nempe dixerim quod carnem induit, sapienter quod culpam uitauit, fortiter quod mortem sustinuit. Sed super omnia reddit te michi amabilem, bone Ihesu, calix quem bibisti, opus nostre redemptionis. Hoc enim omnino amorem nostrum sibi uendicat. Hoc, inquam, nostram deuotionem blandius allicit, iustius exigit, arcius stringit et uehemencius afficit.

Bernardus super Cantica sermone XX.

Varia
Fontes proximus et primus
[Back to top]

Passio an

O homo, uide que pro te patior! Non est dolor sicut quo crucior. Ad te clamo qui pro te morior. Vide penas quibus afficior. Vide clauos quibus confodior. Cum sit dolor tantus exterior; interior est planctus grauior cum te tam ingratum experior.

Bernardus in persona Domini in quodam sermone.

Varia
Fons primus
[Back to top]

Passio ao

Vere deserta erat Iudea, uacua a iusticia, plena peccatis quam Deus plantauerat, lex irrigauerat, omnes prophete coluerant. Illa autem nullum fructum producit nisi spinas asperrimas quibus Dominum suum coronauerat.

Crisostomus super Mattheum capitulo III.

Varia
Fons primus
[Back to top]

Passio ap

Que nobis erit contumelia postquam Christus hec passus est? Neque enim una particula sed totum corpus iniurias paciebatur: caput per coronam, manus per arundinem, os per acetum; facies inspumabatur, gene uellebantur, et tandem totum corpus in cruce extenditur et perforatur.

Crisostomus super XXVII. capitulo Matthei.

Varia
Fons nondum repertus
[Back to top]

Passio aq

Si passio redemptoris ad memoriam reducitur, nichil tam durum quod non equo animo toleretur. Parua enim toleramus, si recordemur, quid biberit ad patibulum qui nos inuitat ad celum. Ille enim obprobria, irrisiones, contumelias, alapas, sputa, flagella, spineam coronam, crucemque sustinuit, et nos miseri ad nostram confusionem uno sermone fatigamur, uno uerbo deicimur.

Ysidorus de summo bono et Augustinus de conflictu uiciorum et uirtutum.

Varia
Fontes primi
[Back to top]

Passio ar

Magna misericordia ut Dominus mundi acciperet formam serui, panis esuriret, fons sitiret, lux obscuraretur, uirtus infirmaretur, uita moriretur, redemptor uenderetur ut homo uenditus redimeretur.

Cassiodorus super illud Psalmorum: Magna misericordia Domini.

Varia
Fons primus
[Back to top]

Passio as

Vbi princeps tanta afflictione plangebat, quis illo flente non fleret? Quis dolente non gemeret quando pro gemmato dyademate rex cinerem gestabat in capite, canus puluere, non etate?

Cassiodorus super Psalmum L.

Varia
Fons primus
[Back to top]

Passio at

Christus in die crucifixionis sue sic obumbratus atque defensus est ut nec animus eius confusionem aliquam pateretur, nec caro ipsius corruptionis iniuriam sustineret. Bene diffinita est passio Domini, dies belli scilicet quando dyabolo uicto infernorum claustra dirupta sunt, captiui liberati sunt.

Cassiodorus super illud Psalmorum: Obumbrasti capud meum in die belli.

Varia
Fons primus
[Back to top]

Passio au

Effusio pro iniustis sanguinis iusti tam potens fuit ad priuilegium, tam diues ad precium ut si uniuersitas captiuorum in redemptorem suum crederet, nullum tyrannica uincula retinerent.

Leo papa in sermone de ieiunio VII. mensis.

Varia
Fons primus
[Back to top]

Ubi

Ascensio h, Ascensio l
CRUX
Humilitas b
Incarnatio i, Incarnatio k
Prodicio a, Prodicio b
Resurrectio c
Tribulatio ar
Christus a, Christus b, Christus h

Varia