Curiositas a

Curiosum genus hominum ad cognoscendum uitam alienam, desidiosum ad corrigendum suam.

Augustinus libro X. confessionum.

Varia
Fons primus
[Back to top]

Curiositas b

Humilitati saluberrime quam Dominus noster Ihesus Christus ut docet humiliatus est, maxime aduersatur quedam, ut ita dicam, imperitissima sciencia dum nos scire gaudemus, quid Anaximines, quid Anaxagoras, quid Pythagoras, quid Democritus senserit et ceteri huius, ut docti eruditique uideantur, cum a doctrina et uera erudicione longe absit.

Augustinus in epistola ad Dioscorum.

Varia
Fons primus
[Back to top]

Curiositas c

Compescat se humana temeritas et id quod non est non querat, ne id quod est non inueniat.

Augustinus de Genesi contra Manicheos libro I.

Varia
Fons primus
[Back to top]

Curiositas d

Fons elacionis et delectacio libidinis et uenenum curiositatis motus sunt anime mortue quia non ita moritur ut omni motu careat, quoniam discedendo a fonte uite moritur atque suscipitur a pretereunte seculo et conformatur eidem.

Augustinus in libro confessionum.

Varia
Fons primus
[Back to top]

Curiositas e

Multo facilius inuenit syderum conditorem humilis pietas quam syderum ordinem superba curiositas.

Augustinus in sermone de eclipsi solis.

Varia
Fons nondum repertus
[Back to top]

Curiositas f

Sunt qui desertis uirtutibus et nescientes quid sit Deus et quanta sit maiestas semper eodem modo manentis nature, magnum aliquid se agere putant, si uniuersam istam corporis molem quam mundum nuncupamus curiosissime perquirant. Vnde eciam tanta superbia gignitur ut in ipso celo de quo sepe disputant sibimet habitare uidentur.

Augustinus in libro de moribus ecclesie.

Varia
Fontes proximus et primus
[Back to top]

Curiositas g

In consideratione creaturarum non est uana et peritura curiositas exercenda, sed gradus ad immortalia et semper manencia faciendus.

Augustinus in libro de uera religione.

Varia
Fontes proximus et primus
[Back to top]

Curiositas h

Demonum cibus est carmina poetarum, secularis sciencia, rethoricorum pompa uerborum. Nulla ibi saturitas ueritatis, nulla iusticie refectio reperitur; studiosi earum in fame ueri et uirtutum penuria perseuerant.

Ieronymus in epistola de duobus filiis.

Varia
Fons primus
[Back to top]

Curiositas i

Nugas terimus et fonte ueritatis amisso, opinionum riuulos consectamur.

Ibidem.

Varia
Fons nondum repertus
[Back to top]

Curiositas k

Sacerdotes dimissis euangeliis et prophetiis uidemus comedias legere et amatoria bucolicorum uersuum uerba cantare.

Ieronymus in quadam epistola.

Varia
Fontes proximus et primus
[Back to top]

Curiositas l

Graue curiositatis est uicium que dum cuiuslibet mentem ad inuestigandum uitam proximi exterius ducit, semper ei intima sua abscondit ut aliena sciens se nesciens sit, et curiosi animus quanto peritus fuerit alieni meriti, tanto fiat ignarus sui.

Gregorius omelia XXXVI. super illud: Iuga boum emi quinque.

Varia
Fons primus
[Back to top]

Curiositas m

Curiosus foras egreditur et exteriora considerat qui sic interna despicit, preterita non respicit, presencia non inspicit, futura non prospicit.

Bernardus in quodam sermone.

Varia
Fons primus
[Back to top]

Curiositas n

Multi student plus alta quam apta proferre, et erubescunt plana et humilia ne hec solum scire uideantur.

Bernardus in sermone.

Varia
Fons primus
[Back to top]

Curiositas o

Doctrina spiritus non curiositatem acuit, sed caritatem accendit.

Bernardus super Cantica.

Varia
Fons primus
cf. Doctrina siue doctor x
[Back to top]

Curiositas p

Adolescentulis in ludo litterarum positis non tam placent solida quam picta, queque pocius pulcra quam utilia sectantur, nec tam agencia diligunt quam sonancia. Magis gaudent foliorum amenitate conspergi quam frugum ubertate nutriri.

Crisostomus in prologo super Mattheum.

Varia
Fons primus
[Back to top]

Curiositas q

Pharisei de Deo querere contendentes nichil aliud se inuenisse confessi sunt nisi quod incognoscibilis est Deus. Sed sicut qui innauigabile occeanum usurpat nauigare dum non potest transire, necesse est ut per eandem uiam reuertatur. Sic et illi ab ignorancia ceperunt et in ignoranciam finierunt.

Crisostomus super illud Matthei XI.: Nemo nouit filium nisi pater.

Varia
Fons primus
[Back to top]

Curiositas r

Que Deus occulta esse uoluit non sunt scrutanda, que autem manifesta fecit non sunt negligenda, ne et in illis illicite curiosi et in hiis dampnabiliter inueniantur ingrati.

Prosper de uocacione gencium libro I.

Varia
Fons primus
[Back to top]

Curiositas s

De altitudine discrecionis Dei non conturbabitur cor humilitatis nostre, si firma et stabili fide omne iudicium Dei iustum esse secretum, et ubi inuestigari non potest quare ita iudicet, sufficiat scire quis iudicet.

Prosper de uocacione gencium libro I.

Varia
Fons primus
[Back to top]

Curiositas t

Lauda et uenerare quod agitur quia tuum est nescire quod agitur.

Prosper ibidem.

Varia
Fons primus
[Back to top]

Curiositas u

Curiositas est superflua inuestigacio ad se non pertinencium.

Hugo de sancto Victore.

Varia
Fons primus
[Back to top]

Curiositas x

O quanti ueritatem querunt non in ueritate sed in uanitate, et quesitam inueniunt non ad ueritatem sed ad uanitatem et, quod miserrimum est, in uerbis uite lucra mortis negociantur!

Ricardus de sancto Victore in quodam sermone.

Varia
Fons primus
[Back to top]

Curiositas y

Odibilius nichil est subtilitate ubi est sola subtilitas. Quid enim prodest in illis expendere dies suos que nec domi, nec milicie, nec in foro, nec in claustro, nec in curia, nec in ecclesia, nec alicubi prosunt nisi dumtaxat in scolis? Scribens Seneca ad Lucillum: Quid est, inquit, acucius arista et in quo est utilis? Tale est, inquit, ingenium quod sola subtilitate lasciuiens nulla in se residet grauitate.

Petrus Rauennas in sermone.

Varia
Fontes proximus, medius, et primus
cf. Curiositas ah
[Back to top]

Curiositas z

Maximum uicium subtilitatis est nimis se ostendere, utilissima autem est dissimulacio subtilitatis que effectu apparet, habitu latet.

Petrus Rauennas in sermone.

Varia
Fons primus
[Back to top]

Curiositas ab

Quidam antequam disciplinis elementaribus imbuantur, docentur inquirere de puncto, de linea et superficie, de quantitate anime, de fato, de casu et libero arbitrio, de materia et motu et principiis corporum, de progressu multitudinis et magnitudinis sectione; quid sit tempus, quid inane, quid locus; de reflexione occeani, de ortu Nili, de uariis latentis nature secretis, de uariis figuris causarum, de primis rerum iniciis et aliis quam pluribus que plenioris sciencie fundamentum et eminentiores exigunt intellectus.

Petrus Rauennas ibidem.

Varia
Fons primus
[Back to top]

Curiositas ac

Que utilitas est cedulas euoluere, firmare uerbotenus summas, et sophismatum uersucias inuersare, dampnare scripta ueterum et reprobare omnia que non inueniuntur in suorum cedulis magistrorum?

Petrus Rauennas ibidem.

Varia
Fons primus
[Back to top]

Curiositas ad

Sobrius intellectus in omnibus optimus est qui reficit animam nec grauat mentem. Vnde mel inuenisti, comede quod sufficit tibi ne forte saciatus euomas illud et periures nomen Dei tui.

Glossa super illud Eccesiastici III.: In superuacuis rebus noli scrutari multipliciter.

Varia
Fontes proximus et primus
[Back to top]

Curiositas ae

Acrior est cupiditas ignota cognoscendi quam nota repetendi. Hoc in hystrionibus, hoc in oratoribus, hoc in omnibus denique rebus uidemus accidere; ad noua homines concurrunt, ad noua conueniunt. Adeo ut quicquid insolitum est in turba eciam notabile est.

Seneca libro IIII. rethorice sue.

Varia
Fons primus
[Back to top]

Curiositas af

Multum temporis illis uerborum cauillacio eripuit. Nectimus nodos et ambiguam significacionem uerbis illigamus ac deinde dissoluimus. Quid michi uocum similitudines distinguis quibus nemo unquam nisi dum disputat captus est? Res fallunt; illa discerne. Sophismata nec ignoranti nocent, nec scientem iuuant.

Seneca XLV. epistola.

Varia
Fons primus
[Back to top]

Curiositas ag

Nam illi non inuenta sed querenda nobis reliquerunt, et inuenissent forsitan necessaria nisi superuacua quesissent.

Seneca ibidem.

Varia
Fons primus
[Back to top]

Curiositas ah

Verba captiosa componis et interrogas uincula nectis. Et dicis acuta sunt ista: Nichil acucius arista et in quo est utilis. Quedam inutilia et inefficacia ipsa subtilitas reddit. Nulla est sine difficultate subtilitas.

Seneca LXXXIII. epistola.

Varia
Fons primus
cf. Curiositas y
[Back to top]

Curiositas ai

Relinque istum ludum litteralium philosophorum qui rem magnificam ad sillabas uocant, qui animum minuta dicendo diminuunt et conterunt et id agunt ut philosophia pocius difficilis quam magna uideatur. Socrates, qui totam philosophiam reuocauit ad mores, hanc summam dixit esse sapienciam: bona malaque distinguere.

Seneca LXXII. epistola.

Varia
Fons primus
[Back to top]

Curiositas ak

Iste inepcie poetis relinquantur quibus aures oblectare propositum est et dulcem fabulam nectere. Sed qui ingenia sanare et fidem in rebus humanis retinere ac memoriam officiorum animis ingerere uoluerint, serio loquantur et magnis uiribus agant.

Seneca II. libro de beneficiis.

Varia
Fons primus
[Back to top]

Curiositas al

Demens omnibus merito uiderer si cum saxa in munimentum murorum senes et femine congererent, cum iuuentus intra portas armata signum erupcionis expectaret, cum hostilia in portis tela uibrarent et ipsum solum suffossionibus et cuniculis tremeret, sederem ociosus et huiusmodi questiunculas ponens: Quod non perdidisti habes; cornua autem non perdidisti; cornua ergo habes. Nunquid tibi demens uidear, si istis impendero operam et nunc obsideor? Quid agam? Mors me sequitur; uita fugit. Aduersus hec me doce aliquid, effice ut ego mortem non timeam et uita me non effugiat.

Seneca XVI. epistola.

Varia
Fons primus
[Back to top]

Curiositas am

Mus sillaba est; mus autem caseum rodit; sillaba ergo caseum rodit. Quod michi ex ista sentencia periculum imminet? Quod incomodum? Aut forte acutior est ista collectio: Mus sillaba est; sillaba autem caseum non rodit; mus ergo caseum non rodit. O pueriles inepcias! In hoc supercilia subduximus; in hoc barbam demisimus. Hoc est quod tristes docemus et pallidi. Si multum esset etatis, parce dispensandum erat ut sufficeret necessariis; nunc que demencia est superuacua discere in tanta temporis egestate.

Seneca XLIX. epistola.

Varia
Fons primus
[Back to top]

Curiositas an

Quid te torques et laceras in illa questione quam subtilius est contempsisse quam soluere?

Seneca I. epistola.

Varia
Fons primus
[Back to top]

Curiositas ao

Quid horum ad uirtutem uiam sternit? Sillabarum enarracio, uerborum diligencia et fabularum memoria et uersuum lex ac modificacio. Quid ex hiis metum demit, cupiditatem frenat? Musica montrat michi qui sunt modi flebiles; monstrat pocius quomodo inter aduersa non emittam flebilem uocem. Metiri me geometer docet latifunda; pocius doceat quomodo metiar quantum homini satis sit; docet quomodo nichil perdam ex finibus meis, at ego discere uolo quomodo totos hylaris amittam. Scis rotunda metiri. Si artifex es, metire hominis animum. Dic quam magnus, dic quam pusillus sit. Scis que recta sit linea; quid tibi prodest, si quid in uita rectum sit ignoras?

Seneca LXXXVII. epistola.

Varia
Fons primus
[Back to top]

Curiositas ap

Hoc scire quid proderit? Vt sollicitus sim cum Saturnus et Mars econtrario stabunt, aut cum Mercurius uespertinum faciet occasum uidente Saturno, pocius quam hoc discam ubicumque ista sint propicia esse nec posse mutari.

Seneca ibidem.

Varia
Fons primus
[Back to top]

Curiositas aq

Ista liberalium arcium consectacio molestos, intempestiuos, uerbosos sibi placentes facit et ideo non discentes necessaria quia superuacua didicerunt. Quare ergo liberalibus studiis filios erudimus? Non quia uirtutem dare possunt sed quia animum ad accipiendam uirtutem preparant.

Seneca ibidem.

Varia
Fons primus
[Back to top]

Curiositas ar

Innumerabiles questiones fiunt de anima tantum: unde sit, qualis sit, quando esse incipiat, quamdiu sit, an aliunde alio transeat et domicilia mutet et ad alias animalium formas, an non amplius quam semel seruiat et emissus uagetur in toto, quid sit facturus animus cum per nos aliquid facere desierit, quomodo libertate sua usurus cum ex hac effugerit cauea, an obliuiscatur priorum. Hec tam multa, tam magna ut habere possint liberum hospicium, superuacua ex animo tollenda sunt. Non dabit se in has angustias uirtus. Expellantur omnia, totum pectus illi uacet.

Seneca ibidem.

Varia
Fons primus
[Back to top]

Curiositas as

Non multum nocebit tibi ista transisse que nec licet scire nec prodest. Quicquid enim nos meliores beatosque facturum est aut in aperto aut in proximo posuit.

Seneca ibidem.

Varia
Fons primus
cf. Studium ag
[Back to top]

Curiositas at

Quatuor milia librorum Didimus grammaticus scripsit; misererer homini, si presens esset, si tam multa legisset superuacua. In hiis libris de patria Homeri queritur, de Enee matre uera, in hiis an libidinosior an ebriorsior uixerit, in hiis an Sopho publica fuerit, et alia que erant dediscenda scire, si scires. Sed si ad nostros quosque perueneris, ostendam multa securibus recidenda. Metire ergo etatem tuam tam multa non capit. Audi quantum mali faciat nimia subtilitas et quam infesta ueritati sit.

Seneca ibidem.

Varia
Fons primus
[Back to top]

Ubi

Consciencia o
Doctrina x, Doctrina ap
Error g
Iudex u
Meritum c
Philosophia l
Studium ag

Varia