Deuocio a

Non putrescit cor, si leuetur ad Deum. Frumentum tuum, si haberes in inferioribus ne putresceret, leuares illud ad superiora. Frumento tuo mutare queris locum, et cor permittis in terra putrescere. Frumentum leuares ad superiora; cor leua in celum. Et unde, inquis, possum? Qui funes, que machine, que scale opus sunt? Gradus affectus est; iter tuum uoluntas tua est. Amando ascendis, negligendo descendis. Stans in terra in celo es, si diligis Deum.

Augustinus super Psalmum LXXXV.

Varia
Fons primus
[Back to top]

Deuocio b

Si habet animus unde oblectetur extrinsecus, sine deliciis manet interius.

Augustinus super Iohannem.

Varia
Fons primus
[Back to top]

Deuocio c

Anima Deo deuota sic se actus corporis et terrenos exuit mores ut nesciat quomodo, si uelit rursus induere. Consuetudo enim boni usum ueteris prauitatis amisit.

Augustinus de uirginitate.

Varia
Fons primus
[Back to top]

Deuocio d

Hec est uera fortitudo que nature usum, sexus infirmitatem mentis deuocione transgreditur.

Augustinus in libro de uiduis.

Varia
Fons primus
[Back to top]

Deuocio e

Nescio quid incorporaliter et spiritualiter in nobis facit Deus quod nec sonus sit qui aurem percuciat, nec color qui oculis discernatur, nec odor qui naribus capiatur, nec sapor qui faucibus iudicetur, nec durum et molle quod tangendo senciatur. Et tamen aliquid est quod sentire facile est explicare non possibile.

Augustinus super Iohannem.

Varia
Fons primus
[Back to top]

Deuocio f

Si nos uirtus deuocionis in intimis afficit, omnis strepitus praue suggestionis obmutescit.

Gregorius in omelia.

Varia
Fons primus
[Back to top]

Deuocio g

Viros ad offerenda Deo munera uenientes in medio ciuitatis interficit quia diuinis dedite operibus mentes nisi magna se circumspectione custodiant, subripiente hoste, dum deuocionis portant hostiam in ipso itinere perdunt uitam.

Gregorius ibidem et in moralibus.

Varia
Fons primus
[Back to top]

Deuocio h

Non omnibus eodem modo data est gracia ista, scilicet deuocio. Porro Thomas in latere, Iohannes in pectore, Petrus in sinu Patris, Paulus in tercio celo secreti huius graciam sunt assequti. Prior mulier, scilicet Maria, strauit sibi in tuto humilitatis, posterior, scilicet Magdalena, in solio spei, Thomas in fundamento fidei, Iohannes in lato caritatis, Paulus in intimo sapiencie, Petrus in luce ueritatis. Sic apud sponsum mansiones multe sunt.

Bernardus super Cantica.

Varia
Fons primus
[Back to top]

Deuocio i

Temporis preteriti fructus est compunctio, futuri flos est deuocio.

Bernardus super Cantica.

Varia
Fons primus
[Back to top]

Deuocio k

Mel in cera, deuocio in littera. Alioquin littera occidit, si absque condimento spiritus glucieris.

Bernardus super Cantica.

Varia
Fons primus
[Back to top]

Deuocio l

Est unguentum contricionis, est unguentum deuocionis, et est unguentum pietatis: primum pungitiuum dolorem faciens, secundum temperatiuum dolorem leniens, tercium sanatiuum morbum expellens.

Bernardus ibidem.

Varia
Fons primus
[Back to top]

Deuocio m

Vbi crapulam ructantis inter pocula senserit Christus uina sua dulciora super mel et fauum menti propinare non dignatur. Vbi curiosa ciborum diuersitas, ubi diuitis superlectilis discolor uarietas oculos pariter pascit et uentrem, celestis panis ieiunam deserit mentem.

Bernardus in epistola.

Varia
Fons primus
[Back to top]

Deuocio n

Melius est deuotum in minoribus quam indeuotum in maioribus professionibus inueniri.

Iohannes Cassianus in collacione Iohannis abbatis.

Varia
Fons primus
[Back to top]

Deuocio o

Deuocio est feruor bone uoluntatis quem mens cohibere non ualens certis manifestat indiciis.

Hugo.

Varia
Fons primus
[Back to top]

Ubi

Abstinencia c
Contemptus c
Delicie d, Delicie f
DESIDERIUM
Seruicium b

Varia