Discrecio a

Ex studio arcus distenditur ut in suo tempore cum utilitate tendatur. Qui si ocium relaxacionis non accipit, feriendi uirtutem ipso usu tensionis perdit. Sic aliquando in exercitacione uirtus cum per discrecionem pretermittitur, reseruatur ut tanto post uicia ualenter feriat, quanto a percussione interim prudenter cessat.

Gregorius libro XXVIII. moralium.

Varia
Fons primus
[Back to top]

Discrecio b

Plerumque uirtus cum indiscrete tenetur, amittitur; cum discrete intermittitur, plus tenetur.

Gregorius ibidem.

Varia
Fons primus
[Back to top]

Discrecio c

Sanctorum prouida discrecio dum sollicite circumquaque conspicit in altum posita, priusquam ueniat, culpam deprehendit; eamque quo uigilanter prenotat, eo fortiter declinat.

Gregorius libro XXXI. moralium.

Varia
Fons primus
[Back to top]

Discrecio d

Sepe dum nosmetipsos plus iusto discutimus, de ipso discrecionis studio indiscrecius erramus; et mentis nostre acies quo plus cernere nititur, obscuratur quia qui importune solis radios aspicit, tenebrescit.

Gregorius in moralibus.

Varia
Fons primus
[Back to top]

Discrecio e

Medii quidem incedere debemus inter nimium timidos et nimium temerarios ut simus quidem uerecundiores hiis qui ad indebitos honores feda ambitione nituntur, et paulo confidentiores hiis qui futuri iudicii metu eciam bonorum actuum cuncta refugiunt.

Gregorius Nazazenus in apologetico.

Varia
Fons primus
[Back to top]

Discrecio f

In cunctis nobis semper debet preesse discrecio, et quasi moderando singulas discernere uoluntates, ne opinio uerisimilis fallat, ne decipiat sermo uersutus, ne quod bonum est malum, ne quod malum est bonum esse credatur.

Bernardus super Cantica sermone XXIIII.

Varia
Fons primus
[Back to top]

Discrecio g

Discrecio quippe omni uirtuti ordinem ponit, modum tribuit, decorem et perpetuitatem confert. Est ergo discrecio non tam uirtus quam quedam moderatrix uirtutum, ordinatrixque affectuum, et doctrix morum. Tolle hanc et uirtus uicium erit, ipsaque affectio naturalis in perturbacionem magis conuertetur exterminumque nature.

Bernardus super Cantica.

Varia
Fons primus
[Back to top]

Discrecio h

Tucius est cordas remitti intensius quam protendi. Remissarum namque intencio artificis pericia conualescit, sed que semel rupta est nullo artificio reparatur.

Crisostomus libro de curialium nugis.

Varia
Fontes proximus et primus
[Back to top]

Discrecio i

Quicquid boni cum discrecione feceris uirtus est; quicquid sine discrecione gesseris uicium est. Virtus enim indiscreta pro uicio deputatur.

Ysidorus in libro de synodis.

Varia
Fons primus
[Back to top]

Discrecio k

Discrecio est in diiudicandis rerum causis prouida humanarum mencium racio moderatrix.

Ysidorus in synonimis.

Varia
Fons primus
[Back to top]

Discrecio l

Racio est gerendorum ordo ex causa ueniencium ut quid quo loco facias ac dicas, intelligas.

Ibidem.

Varia
Fons primus
[Back to top]

Discrecio m

Omni conatu debet discrecionis bonum uirtute humilitatis acquiri que nos illesos ab utraque potest nimietate seruare. Vetus namque sentencia est, arrogigais ygosgais, id est nimietates equales sunt. Ad unum enim finem nimietas ieiunii ac uoracitas peruenit, eodemque dispendio uigiliarum immoderata continuacio monachum quo sompni grauissimi torpor inuoluit. Nam per excessum continencie debilitatum quemque ad illum statum reuocari necesse est in quo negligens quisque per incuriam detinetur.

In collacione abbatis Moysi secunda.

Varia
Fons primus
[Back to top]

Discrecio n

In utraque enim parte sustinebit maximum detrimentum quisquis inequalitatem tenens nunc uentrem ieiuniorum ariditate constringit, nunc escarum nimietate distendit. Vt enim mens cibi inanitate lassata perdit oracionum uigorem, dum carnis nimia lassitudine pregrauata condormitare compellitur, ita rursum nimietate uoracitatis oppressa emittere ad Deum preces puras leuesque non poterit.

Ibidem.

Varia
Fons primus
cf. Sapiencia siue uel sciencia as
[Back to top]

Discrecio o

Cunctam disciplinam regularis ordinis moderetur equalitas discrecionis ne uel nimia remissio nutritiua sit criminum, uel impia districtio parricida uirtutum.

Petrus Rauennas in quodam sermone.

Varia
Fons primus
[Back to top]

Discrecio p

Discrecio uirtutibus modum imponit sine qua uirtutes sunt uicia. Nam si assit timor et non discrecio, transit in desperacionem; si dolor, in amaritudinem; si amor, in adulacionem; si spes, in presumptionem; si leticia, in dissolucionem; si ira, in furorem.

Ibidem.

Varia
Fons primus
[Back to top]

Discrecio q

Ad rem gerendam qui accedit, caueat ne id solum modo consideret quod illa res honesta sit, sed eciam ut habeat efficiendi facultatem. In quo ipso considerandum est ne aut temere despicias propter ignauiam, aut nimis confidas propter cupiditatem. In omnibus autem negociis prius quam aggrediare adhibenda est discrecio. Considera ergo ne nimis cupias. Nam in prouerbio dicitur: Qui nimis cupit, parum stringit. Et parciendum est onus sub quo in uia deficias iuxta illud: Qui plus posse putat sua quam natura ministrat, posse suum superans se minus esse potest.

Tullius libro de officiis.

Varia
Fontes proximus et primus
[Back to top]

Ubi

Caro d
Correctio r, Correctio bq, Correctio ck
Dilectio e
Humilitas i, Humilitas as
Loquacitas g, Loquacitas l
PRUDENCIA

Varia