Ebrietas a

Ebrietas est fomes libidinis quo per carnes uaporantur interna uiscera, animus ignescit, anima exuritur.

Augustinus in epistola ad quemdam comitem.

Varia
Fons primus
[Back to top]

Ebrietas b

Ebrietas est flagicionum omnium mater, culparumque materia, radix criminum, origo uiciorum, turbacio capitis, subuersio sensus, tempestas lingue, procella corporis, naufragium castitatis, amencia temporis, insania uoluntaria, ignominiosus langor, turpitudo morum, dedecus uite, honestatis infamia, anime corruptela.

Augustinus ad sacras uirgines.

Varia
Fons primus
[Back to top]

Ebrietas c

Ebrietas in utroque sexu cuncta mala appetit et nephanda committit et, ut ait Apostolus, regna celestia appetentibus denegat.

Augustinus ibidem.

Varia
Fons primus
[Back to top]

Ebrietas d

Quisquis immoderatus conuiuioque medius amissis modestie frenis insana fuerit ebrietate prostratus, auersus respicit stantes quos integros uidere nequit aut sermone longo superflua uerba emittit et uana dicta componit, male clamans et bene sibi sonans.

Augustinus ibidem.

Varia
Fons primus
[Back to top]

______________________________

Ebrius uultu deiecto supinus accumbit et sui omnino nescius spectaculum se conuiuio prebet, et dum nichil consequitur sanum nullo alio cogente preter uinum cordis sui archana patefacit et amicorum sibi commissa secreta in medium prodit.

Augustinus ibidem.

Varia
Fons primus
[Back to top]

Ebrietas e

Assumit inter pocula iniusta certamina et nullis existentibus causis asperam excitat rixam quia interponendo uerba uana aliorum sana dicta non patitur audire, sed in contumeliam erigitur conuiuarum et proximorum crimina. Vinum moderate potatum est medicamentum; plus iusto sumptum uenenum esse cognoscitur. Iocunditati non ebrietati creata est uini materia.

Augustinus ibidem.

Varia
Fons primus
[Back to top]

Ebrietas f

Per uinolenciam plurimi plurimeque a sancto pioque proposito exciderunt et sui obliti amissis honoribus ignobiles remanserunt, et sedibus paternis profugi uitam non ubi sumpserunt, finierunt.

Augustinus ibidem.

Varia
Fons primus
[Back to top]

Ebrietas g

Innumerabiles iugum dominacionis diu recusantes uinolencia in alienum redegit arbitrium. Alexander, omnium uictor, uino uictus est. Infiniti numero uino impellente iniusta impiaque homicidia commiserunt. Quam plurime urbes diu obsesse nec capte custodibus sompno uinoque sepultis ab hostibus patefacte sunt et incendiis concremate.

Augustinus libro ad sacras uirgines.

Varia
Fontes primi
[Back to top]

Ebrietas h

In ebriis non racio ulla, non ullum gerende uite consilium, non gestorum aut lectionum memoria, nec ulla arcium aut industrie prouidencia est.

Augustinus ibidem.

Varia
Fons primus
[Back to top]

Ebrietas i

Sobrietas in feminis ad terram deponit aspectum, ebrietas autem amisso pudore inuerecundos erigit uultus.

Augustinus ibidem.

Varia
Fons primus
[Back to top]

______________________________

Sobrietas cum summa trepidacione et silencio irreprehensible emittit uerbum, ebrietas uero impudoratum facit femine et sermonem et uultum.

Augustinus ibidem.

Varia
Fons primus
[Back to top]

Ebrietas k

Valde turpe est ut quem non uincit homo, uincat libido; et obruatur uino qui non uincitur ferro.

Augustinus in epistola CXL.

Varia
Fons primus
[Back to top]

Ebrietas l

Ebrietas est blandus demon, dulce uenenum, suaue peccatum quam qui habet se ipsum non habet, quam qui facit peccatum non facit, sed ipse totus est peccatum.

Augustinus in quodam sermone.

Varia
Fons primus
cf. Ebrietas x
[Back to top]

Ebrietas m

Quicumque ad bibendum pronus fuerit uel in conuiuio suo alios adiurauerit pro se et pro ipsis in die iudicii reus erit.

Augustinus ibidem.

Varia
Fons primus
[Back to top]

Ebrietas n

Ebriosus cum absorbet uinum, absorbetur a uino; abhominatur a Deo, despicitur ab angelis, deridetur ab hominibus, destituitur a uirtutibus, confunditur a demonibus, conculcatur ab omnibus.

Ambrosius in libro de penitencia.

Varia
Fons primus
[Back to top]

Ebrietas o

Ebriosus confundit naturam, amittit graciam, perdit gloriam, incurrit dampnacionem eternam.

Ambrosius ibidem.

Varia
Fons primus
[Back to top]

Ebrietas p

Noe ad unius hore ebrietatem nudauit femora sua que per sexcentos annos contexerat.

Ieronymus in epistola ad Occeanum.

Varia
Fons primus
[Back to top]

Ebrietas q

In uino luxuria est et ubicumque saturitas et ebrietas, ibi libido dominatur.

Ieronymus super epistolam ad Titum.

Varia
Fons primus
[Back to top]

Ebrietas r

Ebrietas est per quam menti quedam sui obliuio generatur ex superfluorum potuum indulgencia.

Ysidorus XII. ethimologiarum.

Varia
Fons primus
[Back to top]

Ebrietas s

Nichil est ita demoni amicum sicut ebrietas et lasciuia que est mater omnium uiciorum. Ante omnia autem uetetur clericis que omnium peccatorum radix ac nutrix est.

Crisostomus super Mattheum.

Varia
Fontes proximus et primi
[Back to top]

Ebrietas t

Ebrietas iudicium racionis obfuscat, contenciones et bella procurat, robur et naturalem uirtutem eneruat, infirmitatem generat, mortem naturalem adducit, rebus temporalibus spoliat et, quod deterius est, diuinam maledictionem inducit.

Hugo de sancto Victore.

Varia
Fons primus
[Back to top]

Ebrietas u

Ebrietas in alio crimen est, in sacerdote sacrilegium est quia alter animam suam neccat uino, sacerdos spiritum sanctitatis extinguit.

Petrus Rauennas in quodam sermone.

Varia
Fons primus
[Back to top]

Ebrietas x

Ebrietas mater licium, furoris genitrix, petulancie magistra. Hanc qui habet, homo non est; hanc qui habet, non peccatum facit sed est ipse peccatum. Hec enim est rabies uoluntaria, inuitatus hostis, illecebra honestatis et pudoris iniuria.

Petrus ibidem.

Varia
Fons primus
cf. Ebrietas l
[Back to top]

Ebrietas y

Vbi enim regnat ebrietas, racio exulat, intellectus obtunditur, consilia deuiant, iudicia subuertuntur.

Petrus Rauennas ibidem.

Varia
Fons primus
[Back to top]

Ebrietas z

Vini usus olim Romanis feminis ignotus fuit, ne scilicet in aliquod dedecus prolaberentur, quia proximus a Libero patre intemperancie gradus ad inconcessam uenerem esse consueuit. Quecumque enim femina uini usum immoderate appetit et uirtutibus ianuam claudit et delictis aperit.

Valerius Maximus libro II. de memorabilibus dictis et factis Romanorum.

Varia
Fons primus
cf. Abstinencia h
[Back to top]

Ebrietas ab

Quemadmodum musto dolia ipsa rumpuntur et omne quod in imo iacet in summam partem uis caloris eiectat, sic uino exestuante quicquid in imo iacet abditum effertur et prodit in medium. Onerati mero quemadmodum non continent cibum uino redundante, ita nec secretum quod suum est et alienum pariter effundunt.

Seneca LXXXIIII. epistola ad Lucillum.

Varia
Fons primus
[Back to top]

Ebrietas ac

Audi quemadmodum Zenon uir maximus colligat uirum bonum non futurum ebrium. Ebrio nemo secretum sermonem committat. Viro autem bono committit; uir ergo bonus ebrius non erit. Quemadmodum opposita interrogacione simili derideatur attende: dormienti nemo secretum committit, uiro autem bono committit; uir ergo bonus non dormit.

Seneca ibidem.

Varia
Fons primus
[Back to top]

Ebrietas ad

Interim, si hoc colligere uis, uirum bonum non debere ebrium fieri, cur sillogismis agis? Dic quam turpe sit plus sibi ingerere quam capiat et stomachi sui non nosse mensuram quam multa ebrii faciant quibus sobrii erubescant, nichil aliud esse ebrietatem quam uoluntariam insaniam. Extende in plures dies illum ebrii habitum; nunquid de furere dubitabis? Nunc quoque non est minor sed breuior.

Seneca ibidem.

Varia
Fontes proximus et primus
[Back to top]

Ebrietas ae

Refer Alexandri Macedonis exemplum qui Clitum karissimum sibi ac fidelissimum inter epulas transfodit et intellecto facinore mori uoluit. Cogita quas clades ediderit publica ebrietas: hec acerrimas gentes bellicosasque hostibus tradidit, hec multorum annorum pertinacia bello defensa menia patefecit, hec contumacissimos et iugum recusantes in alienum redegit arbitrium. Inuictos enim acie mero domuit.

Seneca ibidem.

Varia
Fons primus
[Back to top]

Ebrietas af

Alexandrum cuius modo feci mencionem tot itinera, tot prelia, tot yemes per que uicta temporum locorumque difficultate transierat, tot flumina ex ignoto cadencia, tot maria tutum dimiserunt; intemperancia bibendi et ille Herculaneus ac fatalis cyphus submersit. Dic ergo quare sapiens non debeat ebrius fieri. Deformitatem rei et importunitatem ostende rebus, non uerbis, quod facillimum est.

Seneca ibidem.

Varia
Fons primus
[Back to top]

Ebrietas ag

Non nulli maiorem partem noctis in conuiuiis exigunt, uino uero madentes et mersi usque ad horam sextam dormiunt; hoc est matutinum eorum.

Seneca LXXXV. epistola.

Varia
Fons primus
[Back to top]

Ebrietas ah

Certe detegit omne uicium ebrietas et incendit. Vbi possedit animum nimia uis uini, quicquid mali latebat, emergit; non facit ebrietas uicia sed protrahit. Tunc inpudicus morbum profitetur ac publicat; tunc petulans non linguam, non manum continet. Crescit insolenti superbia, crudelitas seuo, malignitas liuido; omne uicium taxatur et prodit.

Seneca ibidem.

Varia
Fons primus
[Back to top]

Ebrietas ai

Addice illum ignoracione sui, dubia et parum explanata uerba, incertos oculos, gradum errantem, uertiginem capitis, tecta ipsa mobilia uelut aliquo turbine circumagente totam domum, stomachi tormenta cum efferuescit merum ac uiscera ipsa distendit. Tunc tamen ut cumque tollerabile est, dum illi uis sua est. Quid cum sompno uiciatur que ebrietas fuit crudelitas facta est?

Seneca LXXXV. epistola.

Varia
Fons primus
[Back to top]

Ebrietas ak

Que gloria est capere multum? Cum enim penes te palma fuerit et superstes toti conuiuio fueris, cum omnes uiceris uirtute magnifica et nemo uini tam capax fuerit, uiceris a dolio.

Seneca ibidem.

Varia
Fons primus
[Back to top]

Ebrietas al

Ebrietates continue animos in furorem adducunt. Nam cum sepe apud se non sunt, consuetudine insanie durata uicia, uino concepta eciam sine illo ualent. Vinolenciam enim uiolencia sequitur.

Seneca ibidem.

Varia
Fons primus
[Back to top]

Ebrietas am

Absentem ledit qui cum ebrio litigat.

Seneca in prouerbiis.

Varia
Fons primus
cf. Discordia q
[Back to top]

Ebrietas an

Quid turpius ebrioso cui fetor in ore, tremor in corpore; qui promit stulta, prodit occulta; cui mens alienatur, facies transformatur? Nullum enim secretum ubi regnat ebrietas; fecundi calices quem non fecere disertum.

Innocencius de uilitate condicionis humane.

Varia
Fontes proximus et primi
[Back to top]

Ubi

Deuocio m
SOBRIETAS

Varia