Obediencia a

Quid iniquius quam uelle sibi obtemperari a minoribus et nolle obtemperare maioribus?

Augustinus de opere monachorum.

Varia
Fons primus
[Back to top]

Obediencia b

Non potuit Deus perfectius demonstrare quantum sit bonum obediencie nisi cum prohibuit ab ea re que non erat mala. Sola ibi obediencia tenet palmam; sola ibi inobediencia inuenit penam.

Augustinus super Psalmos.

Varia
Fons primus
[Back to top]

Obediencia c

Obediencia non seruili metu, sed caritatis affectu seruanda est, non timore pene, sed amore iusticie.

Gregorius XII. moralium.

Varia
Fons primus
[Back to top]

Obediencia d

Obediencia sola uirtus est que menti uirtutes ceteras inserit insertasque custodit. Melior est obediencia quam uictime. Obediencia uictimis iure preponitur quia per uictimas aliena caro, per obedienciam uero uoluntas propria mactatur.

Gregorius libro XXXV. moralium tractans illud I. Regum.: Melior est obediencia quam uictime.

Varia
Fons primus
[Back to top]

Obediencia e

Nec studium bone actionis, nec ocium sancte contemplationis, nec lacrima penitentis extra Bethaniam esse potuerunt.

Bernardus de noua milicia.

Varia
Fons primus
[Back to top]

Obediencia f

Perfecta obediencia legem nescit, terminis non artatur, nec contenta angustiis professionis largiori uoluntate fertur in latitudinem caritatis, et ad omne quod iungitur, spontaneo uigore liberalis alacrisque animi modum non considerans in infinitam libertatem extenditur.

Bernardus de precepto et dispensatione.

Varia
Fons primus
[Back to top]

Obediencia g

Melius est obedire Deo quam hominibus, et ipsis melius magistris quam discipulis, porro in magistris melius nostris quam extraneis; quibus autem melius constat obedire, ipsis proculdubio non obedire est detestabilius.

Bernardus ibidem.

Varia
Fontes primi
[Back to top]

Obediencia h

Verus obediens mandatum non procrastinat, sed statim parat aures auditui, linguam uoci, pedes itineri, manus operi, et se totum intus colligit ut mandatum peragat imperantis.

Bernardus.

Varia
Fontes proximus et primus
[Back to top]

Obediencia i

Non attendit uerus obediens quale sit quod precipitur, hoc solo contentus quia precipitur.

Bernardus ibidem.

Varia
Fons primus
[Back to top]

Obediencia k

In ipsa obediencie uia tibi fortasse aliqua dura et aspera occurrere possunt ut accipias interdum precepta nonnulla que licet salubria sint, minus tamen suauia uidentur. Hec si moleste ceperis sustinere, si diiudicare prelatum, si murmurare in corde, eciam si exterius impleas quod iubetur, non est uirtus paciencie, sed uelamen malicie.

Bernardus sermone XXII.

Varia
Fons primus
[Back to top]

Obediencia l

Quisquis aperte uel occulte satagit ut quod habet in uoluntate hoc ei spiritualis pater iniungat, ipse se seducit et sibi quasi de obediencia blanditur, neque ipse in ea re prelato, sed magis ei prelatus obedit.

Bernardus.

Varia
Fons primus
[Back to top]

Obediencia m

Non est dubium quin ampliorem graciam mereatur qui paratum se exhibet ante mandatum quam qui obedire satagit post mandatum.

Bernardus in sermone.

Varia
Fons primus
[Back to top]

Obediencia n

In obediendi ratione hec generalis regula teneatur: ut in difficilioribus quidem agendis obedicio gracior quam preuaricatio grauior iudicetur, et in facilioribus minusque onerosis contemptus dampnabilior quam actus laudabilior estimetur.

Bernardus de precepto et dispensatione.

Varia
Fons primus
[Back to top]

Obediencia o

Solum censuerim fregisse uotum, uiolasse propositum preuaricasse pactum qui et preceptum contempserit et remedium. Nam illum sane dico securum qui, eciam si interdum obedire preterierit, consilium non respuit penitencie.

Bernardus ibidem.

Varia
Fons primus
[Back to top]

Obediencia p

Si iubente seniore ut sileam uerbum michi forte per obliuionem elabitur, reum me confiteor inobediencie sed uenialiter. Si ex contemptu sciens et deliberans sponte in uerba prorupero et rupero silencii legem, preuaricatorem me constituo et criminaliter; et si impendens perseuero usque ad mortem, peccaui dampnabiliter.

Bernardus de precepto et dispensatione.

Varia
Fons primus
[Back to top]

Obediencia q

Optimum in moribus dixerim qui eciam nullo prorsus resistat prioribus aut inuideat paribus aut subiectis in superbia presit, prelatis obediens, sociis congruens, subditis utiliter condescendens, Deo deuotus, magistro subditus, senioribus obediens, minoribus obtemperans, angelis placens, uerbo utilis, corde humilis, omnibus mansuetus.

Bernardus super Cantica.

Varia
Fontes primi
[Back to top]

Obediencia r

Multi denique sub preceptore quieti uiuunt quos, si iugo absoluas, uideas non posse quiescere, nec se ullo modo equalibus seruare innoxios, simpliciter ac sine querela inter fratres conuersari, super fratres non solum inutiliter sed eciam insapienter et nequiter, minime quidem egentes magistro, nec tamen ydonei magisterio.

Bernardus super Cantica.

Varia
Fons primus
[Back to top]

Obediencia s

Nullo autem uicio tam precipitem dyabolus monachum pertrahit ac perducit ad mortem quam cum eum neglectis consiliis seniorum suo iudicio persuaserit diffinitionique confidere.

Iohannes Cassianus in collatione abbatis Moysi.

Varia
Fons primus
[Back to top]

Obediencia t

Vnum atque idem inobediencie genus est uel propter operationis instanciam, uel propter ocii desiderium senioris preterire mandatum, tamque dispendiosum est pro sompno, quam pro uigilancia monasterii statuta conuellere, tantumdemque est abbatis transire preceptum ut legas, quantum si contempnas ut dormias.

In collatione Danielis abbatis.

Varia
Fons primus
[Back to top]

Obediencia u

Inobediencie morbus ex superbie tumore procedens sicut sanies ex ulcere, sic ex superbia contemptus manat. Hoc autem tribus modis mederi solet: uidelicet emplastro, unguento et ferro, id est exemplo boni operis, uerbo exhortationis et disciplina correctionis. Cum enim ulcus non emittit per confessionem saniem uel ex commonitione non promittit emendationem, restat ut ferri recipiat incisionem, id est correctionem discipline.

Hugo de duodecim abusionibus.

Varia
Fons primus
[Back to top]

Obediencia x

Imponitur nomen obediencie precepto, facto et loco ut designet quid precipitur, monstret quod agitur, nominet locum in quo quis moratur; prima facilis, secunda grauis, tercia ad utrumque se habet. Leue est enim precipere sed graue est adimplere. Locus uero aliquando placet, aliquando displicet; placet quibusdam non quia habundat fratribus sed quia piscibus, placet quia habundat famulis et fabulis, placet quia solus cuncta possidet, et sic fit ut uocetur obediencia cum non sit. Hanc obedienciam multi desiderant ut extra obedienciam esse queant.

Hugo ibidem.

Varia
Fons primus
[Back to top]

Obediencia y

Inobediencia est ex duricia mentis obstinate cui debeas imperanti nolle obtemperare.

Tullius.

Varia
Fons primus
[Back to top]

Ubi

Coniugium af
Cupiditas m
MANDATUM
MURMUR
Voluntas x, Voluntas ah

Varia