Oratio a

Multi languescunt in orando et in nouitate conuersionis sue feruenter orant, postea languide, postea frigide, postea negligenter qui quasi securi sunt. Vigilat hostis; dormis tu.

Augustinus super Psalmum LXV.

Varia
Fons primus
[Back to top]

Oratio b

Oratio tua locutio est ad Deum. Quando legis, Deus tibi loquitur; quando oras, cum Deo loqueris.

Augustinus super Psalmum LXXXV.

Varia
Fons primus
[Back to top]

Oratio c

Tunc porro in toto corde clamatur, quando aliunde non cogitatur. Tales orationes rare sunt multis, crebre paucis; utrum uero cuiquam nescio.

Augustinus super Psalmum CXVIII.

Varia
Fons primus
[Back to top]

Oratio d

Credis habere melius forum quam Filius Dei; similiter ista indiscretio fuit in oratione Bersabee que petebat contra honestatem.

Augustinus.

Varia
Fons nondum repertus
[Back to top]

Oratio e

Oratio, si pura est, si casta fuerit, celos penetrans uacua non redibit.

Augustinus in quodam sermone.

Varia
Fons primus
[Back to top]

Oratio f

Dicuntur fratres in Egypto crebras quidem orationes habere sed eas tamen breuissimas et raptim quodam modo ioculatas, ne illa uigilanter erecta que oranti plurimum necessaria est, per productiores moras euanescat atque hebetetur intentio.

Augustinus ad Probam.

Varia
Fons primus
[Back to top]

Oratio g

Fideliter supplicans Deo pro necessitatibus huius uite et misericorditer auditur et misericorditer non auditur. Quid enim infirmo sit utile magis nouit medicus quam egrotus.

Augustinus in libro sentenciarum Prosperi.

Varia
Fons primus
[Back to top]

Oratio h

Oratio paucis uerbis res multiplices comprehendit ut sic cito simplicitas fidei sufficienciam sue salutis addisceret et prudencia ingeniosorum profunditate misteriorum stupesceret.

Augustinus in glossa Matthei VI.

Varia
Fontes proximus et primus
[Back to top]

Oratio i

Oratio oranti est subsidium, Deo sacrificium, demonibus autem est flagellum.

Augustinus in sermone.

Varia
Fons nondum repertus
[Back to top]

Oratio k

Plus placet Deo latratus canum, mugitus bouum, gronnitus porcorum quam cantus clericorum luxuriancium.

Augustinus.

Varia
Fons nondum repertus
[Back to top]

Oratio l

Oratio est anime sancte presidium, angelo bono solacium, dyabolo supplicium, gratum Deo obsequium, et penitencie religionis laus tota, perfecta gloria, spes certa, sanitas incorrupta.

Augustinus.

Varia
Fons nondum repertus
[Back to top]

Oratio m

Multum precari est ad Deum quem precamur diuturna et pia cordis excitatione pulsare. Nam plerumque hoc negocium plus gemitibus quam sermonibus agitur, plus fletu quam affatu.

Augustinus ad Diascorum.

Varia
Fons primus
[Back to top]

Oratio n

Hee sunt due ale orationis quibus uolat ad Deum: si illud quod communicatur, ignoscit delinquenti et donat egenti.

Augustinus in sermone de quadragesima.

Varia
Fons primus
[Back to top]

Oratio o

Cum oras clama non uoce sed mente. Nam et tacentes exaudit Deus, nec locus queritur quantum sensus. Ieremias confortatur in carcere, Daniel inter leones exultat, tres pueri in fornace tripudiant, Iob nudus in sterquilinio triumphat, paradysum de cruce latro inuenit. Non est locus ubi non sit Deus.

Augustinus in sermone.

Varia
Fons primus
[Back to top]

Oratio p

De cotidianis breuibusque peccatis sine quibus hec uita non ducitur, cotidiana oratio fidelium satisfacit.

Augustinus in encheridion.

Varia
Fons primus
[Back to top]

Oratio q

Oratio Deum ungit sed lacrima compungit.

Augustinus in sermone.

Varia
Fons primus
cf. Lacrima f
[Back to top]

Oratio r

Ne deficias in oratione, Deus quod concessurus est, et si differt, non aufert. Non leuitate utitur qui promisit, non facile de sentencia mouetur quod promisit fixum est. Fallere non potest; habet unde faciat.

Augustinus super Psalmum LXV.

Varia
Fontes proximus et primus
[Back to top]

Oratio s

Orationis pure magna est uirtus; et uelut fidelis nuncius mandatum peragit, et penetrat quo caro non peruenit.

Augustinus ibidem.

Varia
Fons primus
[Back to top]

Oratio t

Oratio refectio est ieiuniorum; duriciam cordis emollit, austeritatem temperat, ieiunium dulcificat. Sicut enim sine potu non est plena refectio, sic et ieiunium sine oratione non potest animam perfecte nutrire.

Augustinus in quodam sermone.

Varia
Fons primus
[Back to top]

Oratio u

Sit oratio pura, simplex, dilucida atque manifesta, plena grauitatis et ponderis, non affectata elegancia sed non intermissa gracia.

Ambrosius de officiis.

Varia
Fons primus
[Back to top]

Oratio x

Vbi est oratio, adest uerbum, fugatur cupiditas, libido discedit.

Ambrosius libro de uiduis.

Varia
Fons primus
[Back to top]

Oratio y

Si pro te roges tantum, pro te solus rogabis; si autem pro omnibus roges, omnes pro te rogabunt.

Ambrosius in exameron libro ultimo.

Varia
Fons primus
[Back to top]

Oratio z

Vide quam breuis oratio et omnium plena uirtutum, primus sermo quante est gracie. O homo, faciem tuam non audebas ad celum attollere, oculos tuos in terram dirigebas, et subito accepisti graciam Christi! Omnia peccata dimissa sunt; ex malo seruo factus est bonus filius. Ideo presume non de operatione tua, sed de gracia Dei. Gracia enim saluati estis, apostolus dicit. Non ergo hic arrogancia est sed fides. Predicare quod acceperis non est superbia sed deuotio. Ergo attolle oculos ad Patrem qui te per lauacrum genuit, ad Patrem qui te per Filium redemit, et dic: Pater noster. Bona presumptio sed moderata patrem dicis quasi filius, sed noli specialiter tibi aliquid uendicare. Solius Christi est Pater specialis; nobis omnibus in communi est Pater quia illum solum genuit, nos creauit.

Ambrosius super illud Matthei VI.: Pater noster qui es in celis.

Varia
Fons primus
[Back to top]

Oratio ab

Multi minimi dum congregantur unanimes, fiunt magni; et multorum preces impossibile est contempni.

Ambrosius libro de penitencia.

Varia
Fons primus
[Back to top]

Oratio ac

Despiciuntur orationes leues, diffidentes, inutiles, seculi curis anxie, plene et rerum corporalium implicite, bonorum operum fructibus infecunde.

Ambrosius super Psalmos.

Varia
Fons primus
[Back to top]

Oratio ad

Egredientes de hospicio armet oratio, regredientibus de platea occurrat antequam cessio, nec prius corpusculum requiescat quam animam pascat.

Ieronymus in epistola.

Varia
Fons primus
[Back to top]

Oratio ae

Ieiunio passiones corporis, oratione pestes sanande sunt mentis.

Ieronymus super Marcum.

Varia
Fons primus
[Back to top]

Oratio af

Quociens pro centum animabus psalmus uel missa canitur; tantum prodest cuilibet, quantum si pro quolibet caneretur.

Ieronymus in quadam epistola.

Varia
Fons nondum repertus
[Back to top]

Oratio ag

Dominus noster sciens clemencie sue pondera atque mensuras, interdum non exaudit clamantem ut eum probet, et magis prouocet ad rogandum et quasi ignem excoctum iustiorem et puriorem faciat.

Ieronymus super Abacuc.

Varia
Fons primus
[Back to top]

Oratio ah

Lectionem frequenter interrumpat oratio, et animam iugiter adherentem Deo grata uicissitudo sancti operis accendat.

Ieronymus ad Demetriadem.

Varia
Fons primus
[Back to top]

Oratio ai

Error fuit quod dum uiuimus, mutuo pro nobis orare possumus; postquam autem mortui fuerimus, nullius sit pro alio exaudienda oratio.

Ieronymus contra Vigilancium.

Varia
Fontes proximus et primi
[Back to top]

______________________________

Quisquis pro aliis intercedere nititur, sibi pocius ex caritate suffragatur; et pro semetipso tanto cicius exaudiri meretur, quanto deuote pro aliis intercedit.

Gregorius libro XV. moralium.

Varia
Fons primus
[Back to top]

Oratio ak

Tunc cor fiduciam in oratione accipit cum sibi uite prauitas nulla contradicit.

Gregorius libro XVI. moralium.

Varia
Fons primus
[Back to top]

______________________________

Quanto grauiori tumultu carnalium premimur, tanto orationi insistere ardencius debemus.

Gregorius in omelia.

Varia
Fons primus
[Back to top]

Oratio al

Omnipotens Deus sepe eius precem in perturbatione deserit qui precepta illius in tranquillitate contempnit.

Gregorius libro X. moralium.

Varia
Fons primus
[Back to top]

______________________________

Ecce stat qui ante transibat quia dum adhuc turbas fantasmatum in oratione patimur, Ihesum aliquatenus transeuntem sentimus. Cum uero orationi uehementer insistimus, stat Ihesus ut lumen restituat quia Deus in corde figitur et lux amissa reparatur.

Gregorius in omelia super euangelia.

Varia
Fons primus
[Back to top]

Oratio am

Dignum profecto est ut ab eius beneficiis sit quisque extraneus cuius iussionibus non uult esse subiectus.

Gregorius ibidem.

Varia
Fons primus
[Back to top]

______________________________

Illam orationem Deus non exaudit cui homo quam cum psallit non attendit.

Gregorius in quadam omelia.

Varia
Fons primus
[Back to top]

Oratio an

Talis requirendus est ad orandum qui sit ydoneus ad placandum quia cum is qui displicet ad intercedendum mittitur, irati animus ad deteriora prouocatur.

Gregorius in pastorali.

Varia
Fontes primi
[Back to top]

______________________________

Conditoris auribus illa maxime oratio commendatur qua pro inimicis quoque intercedere nitimur.

Gregorius in moralibus.

Varia
Fons primus
[Back to top]

Oratio ao

Ille Deo ueram orationem exhibet qui semetipsum quia puluis sit humiliter uidet, qui nichil sibi uirtutis tribuit, qui bona que agit esse de misericordia conditoris agnoscit.

Gregorius libro II. moralium.

Varia
Fons primus
[Back to top]

______________________________

Quando fidelis et humilis et feruens oratio fuerit, celum sine dubio penetrabit, unde certum est quod uacua redire non possit.

Bernardus.

Varia
Fons primus
[Back to top]

Oratio ap

Virtutis pondus oratio non habet quam nequaquam perseuerancia continui amoris tenet. Veraciter orare est amaros in compunctione gemitus et non composita uerba resonare.

Gregorius libro XXXIII. moralium.

Varia
Fons primus
[Back to top]

______________________________

Nemo uestrum paruipendat orationem suam. Dico enim uobis quod ipse ad quem oramus non paruipendit eam. Postquam egressa sit ab ore nostro, ipse scribit eam in libro suo et unum ex duobus sperare indubitanter possumus quoniam aut dabit quod petimus aut quod nouit utilius.

Bernardus ibidem.

Varia
Fons primus
[Back to top]

Oratio aq

Pro se orare necessitas cogit, pro aliis autem caritas fraternitatis hortatur. Dulcior autem ante Deum est oratio, non quam necessitas transmittit, sed quam caritas fraternitatis commendat.

Crisostomus super Mattheum.

Varia
Fontes proximus et primus
[Back to top]

Oratio ar

Non uoce clamosa pulsandus est Deus, sed consciencia recta placandus quia non est uocis sed cordis auditor. Orans nichil nouum faciat quod aspiciant homines nec uoce clamet, nec manus expandat, nec oculos tollat ut notabilis fiat.

Crisostomus Matthei VI.

Varia
Fons nondum repertus
[Back to top]

Oratio as

Dicendo pater noster et ueniam peccatorum et penarum interitum et iustificationem et sanctificationem et liberationem et filiorum adoptionem et hereditatem Dei et fraternitatem cum unigenito copulatam et Sancti Spiritus dona largissima uno sermone significauit.

Crisostomus ibidem.

Varia
Fons primus
[Back to top]

Oratio at

Vide mulieris pacienciam et humilitatem. Dominus filios uocat Iudeos et illa dominos. Nec doluit in aliorum laudibus, nec molesta est in suo conuicio. Quasi dicat: Si non sum digna ut panem integrum des, saltem filie mee da sanitatem quasi Micam in comparatione beneficiorum que fecisti Iudeis.

Crisostomus Matthei XV.

Varia
Fons nondum repertus
[Back to top]

Oratio au

Nichil potencius homine orante. Qui orat cum ieiunio, duplices alas habet. Nam neque oberrat neque torpet.

Crisostomus Matthei XVIII.

Varia
Fons primus
[Back to top]

Oratio ax

Colonus Dei consilium dyaboli non querit, colonus autem dyaboli et si Dei auxilium querit, non inuenit. Vnde fur orat, ut prosperetur et fornicator sibi crucis signum facit, ut non comprehendatur, et tanto cicius capitur, quia nescit iustum Deus patrocinium criminibus dare.

Crisostomus Matthei XXII.

Varia
Fontes proximus et primus
[Back to top]

Oratio ay

Consuetudo erat ei sine eis orare in quo docemur tempore orationis querere secretum et fugere tumultum.

Crisostomus Matthei XXVI.

Varia
Fons primus
[Back to top]

Oratio az

(Oratio az abest in manuscriptis)

Oratio ba

Petentis negligencia reprehenditur ubi de dantis misericordia non dubitatur.

Crisostomus.

Varia
Fons primus
[Back to top]

Oratio bc

Qui uult cum Deo esse frequenter debet orare et legere. Quando oramus, cum Deo loquimur; quando legimus, Deus loquitur nobis. Vtrumque bonum si liceat, et si utrumque non licet, melius est orare quam legere.

Ysidorus de summo bono.

Varia
Fons primus
Fons primus et 1550 edition
cf. Oratio bi
[Back to top]

Oratio bd

Hoc est remedium eius qui uiciorum temptamentis estuat ut quociens quolibet modo tangitur, tociens orationem fundat quia frequens oratio impugnationem uiciorum extinguit.

Ysidorus ibidem.

Varia
Fons primus
Fons primus et 1550 edition
[Back to top]

Oratio be

Quid prodest strepitus labiorum? Vbi cor est mutum? Sicut enim uox sine modulatione est quasi uox porcorum, sic oratio sine deuotione est quasi mugitus bouum.

Ysidorus.

Varia
Fons nondum repertus
[Back to top]

Oratio bf

Oratio cordis est non labiorum. Neque enim uerba deprecantis Deus intendit, sed orantis cor aspicit. Melius est cum silencio orare corde sine sono uocis quam solis uerbis sine intuitu mentis.

Ysidorus de summo bono libro I.

Varia
Fons primus
[Back to top]

Oratio bg

Duobus modis oratio impeditur ne impetrare quisque ualeat postulata; hoc est, si aut quisque adhuc mala committit, aut si delinquenti sibi debitum non dimittit.

Ysidorus ibidem libro III.

Varia
Fons primus
Fons primus 1550 edition
[Back to top]

Oratio bh

Sepe multos Deus non exaudit ad uoluntatem ut exaudiat ad salutem.

Ibidem.

Varia
Fons primus
[Back to top]

Oratio bi

Orationibus mundamur, lectionibus instruimur; utrumque bonum est, si liceat; si non liceat, melius est orare quam legere.

Ibidem.

Varia
Fons primus
Fons primus 1550 edition
cf. Oratio bc
[Back to top]

Oratio bk

Multum iuuat orationis puritatem, si in omni loco uel tempore nos ab actibus temperemus illicitis, si semper ab ociosis sermocinationibus auditum pariter castigemus et linguam. Quecumque enim sepius agere, loqui uel audire solemus, eadem necesse est sepius ad animum quasi solitam propriamque recurrunt ad sedem; et sicut uolutabra sues palustria columbe limpida solent frequentare fluenta, ita cogitationes impuram mentem immunde perturbant, castam spirituales sanctificant.

Beda de templo Salomonis.

Varia
Fons primus
[Back to top]

Oratio bl

Psalmus demones fugat, angelos ad adiutorium salutis inuitat. Scutum est in nocturnis terroribus, diurnorum requies laborum, tutela pueris, iuuenibus ornamentum, solamen senibus, mulieribus aptissimus decor. Deserta habitari facit urbes; sobrietatem docet; insipientibus primum efficitur elementum, proficientibus incrementum, perfectis stabile firmamentum.

Basilius in exameron libro IX.

Varia
Fons primus
[Back to top]

Oratio bm

Quomodo optinebit quis ut in oratione sensus eius non uagetur? Si certus sit assistere ante oculos Domini.

Basilius ibidem.

Varia
Fons primus
[Back to top]

Oratio bn

Si quis intendat ita animam suam in singula uerba Psalmorum sicut gustus intentus est ad discretionem saporis ciborum, iste est qui complet quod dicitur: Psallite sapienter.

Ibidem.

Varia
Fontes proximus et primus
[Back to top]

Oratio bo

Huius uersiculi oratio in aduersis ut eruamur in prosperis ne extollamur incessabili iugitate fundenda est; huius igitur uersiculi meditatio in tuo pectore indirupta uoluatur. Hunc in opere quolibet siue ministerio uel itinere constitutus decantare non desinas; hunc et dormiens et residens et in ultimis nature necessitatibus meditare.

Iohannes Cassianus in collationibus Ysaac Deus in adiutorium.

Varia
Fons primus
Fons primus 1550 edition
[Back to top]

Oratio bp

Socrates nichil ultra a diis mortalibus petendum arbitrabat quam ut bona tribuerent quia hii deinde scirent quid unicuique esset utile.

Valerius Maximus.

Varia
Fons primus
[Back to top]

Oratio bq

Ideo non dicimus Pater meus sed noster, nec da michi sed da nobis, quia unitatis magister noluit priuatim precem fieri, ut scilicet quis pro se tantum precetur. Vnum enim orare pro omnibus uoluit quando in uno omnes ipse portauit.

Cyprianus de oratione dominica.

Varia
Fontes proximus et primus
[Back to top]

Oratio br

Ipsius est oratio perfecta cuius et causa clamat et lingua et actus et sermo et uita et cogitatio.

Cassiodorus super Psalmum XVI.: Exaudi Domine.

Varia
Fons primus
[Back to top]

Oratio bs

Non solum cantantes sed intelligentes psallere debemus. Nemo enim sapienter quicquam facit quod non intelligit.

Cassiodorus super Psalmum: Psallite sapienter.

Varia
Fons primus
[Back to top]

Oratio bt

Pulchre diffinitum est psalmos esse uasa ueritatis quasi spiritualia dolia uinum Domini incorrupto sapore seruancia.

Cassiodorus super Psalmum: Confitebor tibi in uasis.

Varia
Fons primus
[Back to top]

Oratio bu

Magna uoce ille clamat ad Dominum qui quamuis lingua taceat, bonis tamen operibus perseueranter clamat.

Ibidem (Cassiodorus) super Psalmum: Miserere mei Domine.

Varia
Fons primus
[Back to top]

Oratio bx

Oratio posita est per quam ira Domini suspenditur, uenia procuratur, pena refugitur et premiorum largitas impetratur; cum Domino loquitur, cum iudice fabulatur, presentem sibi facit quem uidere non preualet, ad penetralia iudicis precator admittitur, et nullus inde respuitur nisi qui in ea tepidus inuenitur.

Casiodorus super Psalmos.

Varia
Fons primus
[Back to top]

Oratio by

Ipsa est suauissima uirtus armonie quando uox cognoscitur operibus consonare. Nam si hee due res discrepabili sibi uarietate senciant, nequaquam possunt psalmodie temperatam efficere cantilenam, nec ad aures Domini uenit quod se mutua contrarietate confundit.

Idem super Psalmum C.

Varia
Fons primus
[Back to top]

Oratio bz

In pannis uincitur mundus, plorando superatur dyabolus, et cui nulle cohortes ad pugnandum sufficiunt, oratione unius pauperis inclinatur.

Cassiodorus super Psalmum CI.

Varia
Fons primus
[Back to top]

Oratio ca

Virtutem sancte orationis intende quia tanto se credit celerius audiendum, quanto de ymis penetralibus clamat ad Dominum.

Cassiodorus super Psalmos.

Varia
Fons primus
[Back to top]

Oratio cb

Psalmodia est consolatio flencium, cura dolencium, sanitas egrotorum; hoc anime remedium, hoc miseriarum omnium cognoscitur esse suffugium. Nam qui tali munere priuatur, ab omni beneficio consolationis excluditur.

Cassiodorus.

Varia
Fons primus
[Back to top]

Oratio cd

Oratio serenat cor, abstrahit a terrenis, mundat a uiciis, subleuat ad celestia, reddit capacius et dignius ad accipienda bona spiritualia.

Cassiodorus super Psalmos.

Varia
Fons primus
[Back to top]

Oratio ce

Oratio est pie mentis et humilis ad Deum conuersio, fide, spe et caritate subnixa.

Hugo.

Varia
Fons primus
[Back to top]

Ubi

Adiutorium u
Angelus s
Communitas c
Contricio h
Diuicie g, Diuicie l
Elemosina aq, Elemosina as
Exemplum s
Ieiunium y, Ieiunium z
Labor b
Lacrima f, Lacrima g, Lacrima p
Martirium c
PETICIO
Predicacio g
Remuneratio a
Sanctitas d
Satisfactio b, Satisfactio d
Seruicium f
Votum h

Varia