Senectus a

Cum sibi homines optant senectutem, quid aliud optant nisi longam infirmitatem?

Augustinus de cathezizandis rudibus.

Varia
Fons primus
[Back to top]

Senectus b

Sit senectus uestra puerilis et puericia senilis, id est ut nec sapiencia uestra sit cum superbia, nec humilitas sine sapiencia.

Augustinus super Psalmum CXIII.

Varia
Fons primus
[Back to top]

Senectus c

Oportet ut senilis sermo non solum sit grauis, sed eciam breuis.

Augustinus in quodam sermone.

Varia
Fons primus
[Back to top]

Senectus d

Infancia nostra innocencia sit, puericia reuerencia, adolescencia paciencia, iuuentus uirtus, senium meritum, senectus nichil aliud quam canus sapiensque intellectus.

Augustinus in quodam sermone.

Varia
Fons primus
[Back to top]

Senectus e

Cum cuncta uicia in sene senescant, sola auaricia iuuenescit.

Augustinus ibidem.

Varia
Fons primus
[Back to top]

Senectus f

Quid naturam accusas, O homo? Habet illa impedimenta quedam senectutem et infirmitatem. Sed senectus ipsa in bonis moribus dulcior, in conciliis subtilior, ad constanciam subeunde mortis potior, ad reprimendas libidines fortior. Infirmitas corporis sobrietas mentis est.

Ambrosius in exameron libro I.

Varia
Fons primus
[Back to top]

Senectus g

Pascha Ebraice dicitur transitus uel profectus, scilicet quia per hoc misterium de peioribus ad meliora transitur. Bonus transitus est de peccato transire ad iusticiam, de uiciis ad uirtutes, de senectute ad infanciam, ad infanciam autem dixerim non etatis sed simplicitatis.

Ambrosius in sermone de pascha.

Varia
Fons primus
[Back to top]

Senectus h

Ergo etates quedam sunt meritorum. Nam et senectus morum inuenitur in pueris et innocencia infancium inuenitur in senibus.

Ambrosius ibidem.

Varia
Fons primus
[Back to top]

Senectus i

Nemo enim tam fractis uiribus et decrepite senectutis est ut non se putet unum adhuc annum esse uicturum.

Ieronymus in quadam epistola.

Varia
Fons primus
[Back to top]

Senectus k

Omnes pene uirtutes corporis mutantur in senibus et crescente sola sapiencia decrescunt cetere uires.

Ieronymus in epistola ad Nepocianum.

Varia
Fons primus
[Back to top]

Senectus l

Senectus eorum qui adolescenciam suam honestis artibus instruxerunt et in lege Domini meditati sunt die ac nocte, etate fit doctior, usu certior, processu temporis sapientior et ueterum studiorum fructus dulcissimos metit.

Ieronymus ibidem.

Varia
Fons primus
[Back to top]

Senectus m

Inter abusiones huius seculi sola maior est senis obstinatio qui morti proximus mortis non abhorret aduentum, qui quasi ad ostium mundi huius positus foris spectat, nec tamen uite presentis attendit egressum nec future considerat. Audit nuncios mortis, et cedere non uult eis. Tres sunt enim nuncii mortis: casus, infirmitas, senectus; casus dubia, infirmitas grauia, senectus certa nunciat; casus nunciat mortem latentem, infirmitas apparentem, senectus presentem. Ex incertitudine mortis timor, ex infirmitatis grauitate dolor, ex certitudine senectutis non obstinatio sed afflictio et humilitas sequi deberet.

Hugo de claustro anime libro II.

Varia
Fons primus
[Back to top]

Senectus n

Canicies tunc est uenerabilis quando ea gerit que caniciem decent. Cum uero iuueniliter senex conuersatur, plus iuuenibus ridiculus erit.

Crisostomus super epistolam ad Hebreos sermone VII.

Varia
Fons primus
[Back to top]

Senectus o

Plus omnibus religioni operam dare senibus conuenit quos presentis seculi florida etas transacta deserit.

Cyprianus de duodecim abusiuis.

Varia
Fons primus
[Back to top]

Senectus p

Quid stolidius fieri potest, si mens ad perfectionem festinare non contendat, quando tocius corporis habitu senectute confectus homo ad interitum properat? Dum oculi caligant, aures grauiter audiunt, capilli fluunt, facies in pallorem mutatur, dentes lapsi numero minuuntur, cutis arescit, flatus non suauiter olet, pectus suffocatur, tussis cachinnat, genua trepidant, talos et pedes tumor inflat. Homo interior qui senescit hiis omnibus aggrauatur, et hec omnia ruituram iam iamque domum corporis cito prenunciant.

Cyprianus ibidem.

Varia
Fons primus
[Back to top]

Senectus q

Quid superest nisi dum huius uite defectus appropiat, nil aliud cogitare quam quomodo future aditus prosperitatis comprehendatur quisque senex appetat? Iuuenibus enim incertus huius uite terminus instat, senibus uero cunctis maturior ex hac luce recessus. Cauende ergo sunt homini due particule que in illius carne non ueterascunt et totum hominem ad peccandum trahunt, cor uidelicet et lingua.

Cyprianus ibidem.

Varia
Fons primus
[Back to top]

Senectus r

Sicut non sunt omnes iuuenes pari modo uel feruentes spiritu uel disciplinis ac moribus optimis instituti, ita nec senes quidem cuncti uno modo uel perfecti possunt uel probatissimi reperiri. Diuicie enim senum non sunt canicies capitis, sed industria iuuentutis ac laborum preteritorum stipendiis meciende.

Iohannes in collatione abbatis Moysi secunda.

Varia
Fons primus
cf. Iuuentus g
[Back to top]

Senectus s

Non omnium seniorum quorum capita canicies tegit, quosque uite longeuitas sola commendat, nobis sunt uestigia sectanda seu traditiones ac monita, sed eorum quos laudabiliter uitam suam ac probatissime comperimus in iuuentute signasse, nec presumptionibus propriis sed maiorum traditionibus institutos. Idem ibidem.

Varia
Fons primus
[Back to top]

Senectus t

Sunt non nulli quorum eciam quod est lugubrius, maior est multitudo qui in tempore suo quem ab adolescencia sua conceperunt atque ignauia senescentes auctoritatem sibi non maturitate morum sed annorum numerositate conquirunt.

Ibidem.

Varia
Fons primus
[Back to top]

Senectus u

Nichil est quod senectuti magis noceat ac dies hominis abreuiat quam tristicia, langor animi atque ira. Nichil enim est hylari senectute iocundius.

Cassiodorus in quadam epistola.

Varia
Fons nondum repertus
[Back to top]

Senectus x

Amplectenda est et amanda senectus; plena est uoluptatis, si illa scias uti. Gratissima sunt poma cum fugiunt. Deditus uino pocio extrema delectat quod in se iocundissimum hominis uoluntas habet, in finem suum differt.

Seneca epistola XII.

Varia
Fons primus
[Back to top]

Senectus y

Iocundissima est etas deuexa iam non tamen preceps. Quam dulce est cupiditates fatigasse aut reliquisse!

Ibidem.

Varia
Fons primus
[Back to top]

Senectus z

Molestum est, inquis, mortem ante oculos habere. Primum ista tam seni ante oculos debet esse quam iuueni. Deinde nemo tam senex est ut improbe unum diem non speret. Vnus autem dies gradus uite est; unus autem dies par omni est.

Seneca ibidem.

Varia
Fons primus
[Back to top]

Senectus ab

Gracias ago. Non sencio in animo etatis iniuriam cum senciam in corpore; tantum uicia et uiciorum ministeria senuerunt; uiget animus et gaudet non multum sibi esse cum corpore. Portus est aliquando petendus, nunquam recusandus.

Seneca epistola XVI.

Varia
Fons primus
[Back to top]

Senectus ac

Dicit michi Farinus puer: Nos eandem crisim habere quia utrique dentes cadunt. Eodem tempore ille ascendit, ego descendo. Mentitus sum. Iam enim etas nostra non descendit sed cadit.

Seneca ibidem.

Varia
Fontes proximus et primi
[Back to top]

Senectus ad

Nichil turpius quam senex uiuere incipiens.

Seneca epistola XIII.

Varia
Fons primus
[Back to top]

Senectus ae

Numera annos tuos et pudebit eadem uelle que uolueras; moriantur ante te uicia.

Ibidem XXIII.

Varia
Fontes proximus et primi
[Back to top]

Senectus af

Turpis et ridicula res est elementarius senex.

Epistola XXXVI.

Varia
Fons primus
[Back to top]

Senectus ag

Desine eadem uelle senex que uoluisti puer. Hoc opus sit, hoc cogitato. Imponere ueteribus malis finem.

Seneca LXII. epistola.

Varia
Fons primus
[Back to top]

Senectus ah

Monstro similis est auaricia senilis. Quid enim stultius est, ut dici solet, quam uia deficiente augere uiaticum?

Seneca in libro de moribus.

Varia
Fons primus
[Back to top]

Senectus ai

Honestior est qui ad otium senectutem retulit quam qui in ocio inuenit et tunc laborare incipiat.

Seneca ibidem.

Varia
Fons primus
[Back to top]

Senectus ak

Anus cum ludit morti delicias facit. Heu, quam miserum est fieri metuendo senem! Frustra ad senectum uentum est cum repetas adolescenciam. Senectuti familiaris est loquacitas. Thesaurum in sepulcro ponit qui senem heredem facit.

[auctor non nominatus]

Varia
Fons nondum repertus
[Back to top]

Senectus al

Senex facile prouocatur et difficile reuocatur, cito credit et tarde discredit, tenax et cupidus, tristis et querulus, uelox ad loquendum et tardus ad audiendum, laudat antiquos et spernit modernos, uituperat presencia et commendat preterita, suspirat et anxiatur, torpet et infirmatur. Audi poetam: Multa senem circumueniunt incommoda.

Innocencius de uilitate conditionis humane.

Varia
Fons primus
[Back to top]

Ubi

Auaricia r
Castitas p
Consilium l
Conuersio ae
Correctio au
Iuuentus b, Iuuentus d, Iuuentus e, Iuuentus f, Iuuentus g, Iuuentus i
Mors bi, Mors cf, Mors cg
Regimen s
Vita l, Vita u

Varia