Vicium a

Tibi non tantum expellenda sunt uicia quam refellenda. Quid utique facilius est non suscipere quam suscepta semel deponere; nec eorum tanta dulcedo est ut ea debeamus preferre uirtutibus, cum nec in omnibus sit delectacionis illecebra et a plerisque eciam ea que uidentur dulcissima respuantur.

Ieronymus ad Demetriadem uirginem.

Varia
Fons primus
[Back to top]

Vicium b

Duo sunt ex omnibus uicia que maxime homines decipiunt sui uoluptate, gula scilicet ac libido, quos deponere eo difficilius est, quo eis uti dulcius et hec uicia tam molesta tamque delectacione sui periculosa, ita a multis calcari uidimus ut tota etate sua uirgines permanserint in sua abstinencia, ut de illis taceam qui post deliciarum longum luxum et inueteratum usum libidinis et castitati ac temperancie se dederunt, et utriusque uicium contraria sibi uirtute mutauerunt. Aliorum uiciorum est longe diuersa racio que cum nichil iocunditatis sed multum amaritudinis habunt, que cum ad uitandum sint faciliora, raro tamen a quibus uitentur inuenies.

Ieronymus ibidem.

Varia
Fons primus
[Back to top]

Vicium c

Quid, oro te, inuido delectacionis prestat inuidia? Quid alter ab odio mercedis accipit? Quid iracundo furor suus confert? Similiter curre per singula et inuenies tot anime tormenta quot uicia que utique eo facilius uinci possunt, quo nulla nos illiciunt uoluptate.

Ieronymus ibidem.

Varia
Fons primus
[Back to top]

Vicium d

Summa tibi sciencia, summa noticia sit, uicia uirtutesque distinguere; que quamquam semper contraria sibi sint, aliqua tamen ex eis tanta iunguntur similitudine ut discerni omnino uix possint.

Ieronymus ibidem.

Varia
Fons primus
[Back to top]

Vicium e

Quam superbiam libertatis loco ducunt, adulacionem pro humilitate suscipiunt, maliciam prudencie amplectuntur uice, et stulticie simplicitatis nomen imponunt, ac fallaci ac pessima similitudine decepti uiciis pro uirtutibus gloriantur.

Ieronymus ibidem.

Varia
Fons primus
[Back to top]

Vicium f

Sunt quedam uicia quasi per quandam cognacionem sibi propinqua, sicut dissolucio spiritus, appetitus gule et immundicia luxurie, multiloquium, fallacia atque periurium. Ex dissolucione spiritus mens ad ingluuiem uentris rapitur, et dum cibis uenter extenditur, ad luxuriam caro trahitur. Ex multiloquio fallacia generatur quia difficile est ut qui multa loquitur non eciam menciatur, et sepe mendacium eciam periurio tegitur ut ante humana iudicia ueletur.

Gregorius super Ezechielem omelia XII.

Varia
Fons primus
[Back to top]

Vicium g

Si forti nos studio contra uiciorum incentiua stringimus, ipsa eciam uicia ad usum uirtutis immutamus. Non nullos namque ira possidet, sed hanc ad defensionem iusticie in uoce libere auctoritatis immutant. Non nullos fortitudo carnis illecebrat; sed dum exercendis piis operibus corpus subdunt, unde iniquitatis stimulum passi sunt, inde pietatis lucra mereantur.

Gregorius libro III. moralium.

Varia
Fons primus
[Back to top]

Vicium h

Quamuis per omne uicium quod perpetratur humano cordi antiqui hostis uirus infunditur; in hac tamen nequicia tota sua uiscera serpens concutit et imprimende malicie pestem uomit.

Gregorius libro V. moralium.

Varia
Fons primus
[Back to top]

Vicium i

Prima uicia decepte menti quasi sub quadam ratione se ingerunt, sed que sequuntur dum mentem ad omnem insaniam protrahunt, quasi bestiali clamore mentem confundunt.

Gregorius XXXI. moralium.

Varia
Fontes proximus et primus
[Back to top]

Vicium k

Capitalia uicia tanta sibi coniunctione coniunguntur, ut non nisi unum de altero proferatur. Prima namque superbie soboles inanis est gloria quia dum oppressam mentem corruperit, mox inuidiam gignit, quia nimirum dum uani nominis potenciam appetit ne quis hanc alius adipisci ualeat tabescit. Inuidia iram generat quia quanto interno liuoris uulnere animus sauciatur, tanto eciam mansuetudo transquillitatis amittitur. Ex ira tristicia oritur quia turbata mens quo inordinate se concutit, eo addiciendo confundit. Tristicia ad auariciam deriuatur quia dum confusum cor bonum leticie in semetipso intus amiserit, unde consolari debeat foras querit, et tanto magis exteriora bona adipisci desiderat, quanto gaudium non habet ad quod intrinsecus recurrat.

Gregorius libro XXXI. moralium.

Varia
Fontes proximus et primus
[Back to top]

Vicium l

Vicium est affectus naturalis preter ordinem et supra mensuram: ordinem transgrediens quando mouetur ad ea que non debet, mensuram excedens quando mouetur plusquam debet.

Hugo.

Varia
Fons primus
[Back to top]

Vicium m

Iniqua uia est que nos perducit ad uicia, recta uero uirtutum que nobis indulgenciam tribuit ad salutem.

Cassiodorus super illud Psalmorum: Omnem uiam iniquam.

Varia
Fons primus
[Back to top]

Vicium n

Multum prodest uicia sua proiecisse si cum alienis rixandum est.

Seneca XXII. epistola.

Varia
Fons primus
[Back to top]

Vicium o

Vicia te mercede sollicitant; auaricia pecuniam promittit, luxuria multas ac uarias uoluptates, ambicio purpuram et plausum et ex hoc potenciam et quicquid potencia potest.

Seneca LIX. epistola.

Varia
Fons primus
[Back to top]

Vicium p

In uicia alter alterum trudimus; quomodo ad salutem reuocari potest, quem nullus retrahit et populus impellit?

Seneca XLI. epistola.

Varia
Fons primus
[Back to top]

Vicium q

Cum uicia prosunt, peccat qui recte facit; naturale uicium est negligi quod commune est.

Seneca in prouerbiis.

Varia
Fontes primi
[Back to top]

Ubi

CONSUETUDO
Fraus b
Potestas b
Virtus c, Virtus o, Virtus z

Varia