Virtus a

In hac uita uirtus non est nisi diligere quod diligendum est; id diligere prudencia est, nullis inde auerti molestiis fortitudo est, nullis illecebris temperacia est, nulla superbia iusticia est.

Augustinus in epistola ad Macedonium.

Varia
Fons primus
[Back to top]

Virtus b

Virtus eo pluris existimanda est quod plura contempnit. Magne uirtutis est cum felicitate luctari; magne felicitatis est a felicitate non uinci.

Augustinus in quodam sermone.

Varia
Fontes primi
[Back to top]

Virtus c

Mens non potest habere regnum uirtutum nisi prius excusserit iugum uiciorum.

Augustinus ibidem.

Varia
Fons primus
[Back to top]

Virtus d

Aduerte uirtutes quattuor in uno facto. Fuit prudencia Deo credere, nec filii graciam anteferre auctoris precepto; fuit iusticia acceptum reddere; fuit fortitudinis appetitum racione cohibere; accedat et quarta uirtus temperancia. Tenebat intus et pietatis modum et execucionis ordinem. Denique dum sacrificio necessaria uehit, dum ignem adolet, dum filium ligat, dum gladium educit; hoc immolandi ordine meruit ut filium reseruaret.

Ambrosius de officiis de immolacione Abrahe.

Varia
Fons primus
[Back to top]

Virtus e

Non uirtus est non posse peccare, sed nolle atque ita tenere perseueranciam uoluntatis, ut uoluntas infanciam, usus imitetur naturam.

Ambrosius super Lucam.

Varia
Fons primus
[Back to top]

Virtus f

Qui deficit sibi ut uirtuti adhereat, amittit quod suum est, accipit quod eternum est.

Ambrosius super Beati immaculati.

Varia
Fons primus
[Back to top]

Virtus g

Nulla sine labore uirtus quia labor processus est uirtutis.

Ambrosius ibidem.

Varia
Fons primus
[Back to top]

Virtus h

Bonus circuitus est si iusticia querit, prudencia inuenit, fortitudo uendicat, temperancia possidet; ut iusticia sit in affectu, prudencia in intellectu, fortitudo in effectu, temperancia in usu.

Ambrosius de officiis.

Varia
Fons primus
[Back to top]

Virtus i

Nescit uirtus mensuram gracie nec contempta referre quod acceperit, uult cumulare quod sumpserit, ne inferior sit beneficio, licet equetur officio.

Ambrosius super Lucam.

Varia
Fons primus
[Back to top]

Virtus k

Omnes uirtutes sibi herent ut qui una caruerit, omnibus careat; qui ergo unam habet, omnes habet.

Ieronymus in quadam epistola.

Varia
Fontes proximus et primi
[Back to top]

Virtus l

Philosophus gloria animalis et popularis aure mancipium totam simul sarcinam deposuit, et tu te putas in uirtutum culmine positum, si partem ex toto offeras? Te ipsum uult Dominus.

Ieronymus ibidem.

Varia
Fons primus
[Back to top]

Virtus m

Sicut quibusdam uisum est ut de primis quattuor uirtutibus loquar: prudencia, temperancia, fortitudine atque iusticia; quanto perfecte sunt singule, tanto sibi sunt coniuncte. Disiuncte autem perfecte esse nequaquam possunt quia nec prudencia uera est que iusta, temperans et fortis non est; nec temperancia perfecta que fortis, iusta et prudens non est; nec fortitudo integra que prudens, temperans et iusta non est; nec iusticia uera que prudens, fortis et temperans non est.

Gregorius libro XXII. moralium.

Varia
Fons primus
[Back to top]

Virtus n

Mensuretur perfectorum fidelium uita per quadrum, et tantum habeat spiritualis atrii latus unum, quantum latera singula, quia unusquisque tantum prudens est quantum temperans, fortis et iustus, tantum temperans quantum prudens, iustus et fortis fuerit, et cetera.

Gregorius omelia X. secunde partis super Ezechielem.

Varia
Fons primus
[Back to top]

Virtus o

Quid est uirtus nisi medicamentum? Et quid est uicium nisi uulnus? Quia ergo nos ubi de medicamento uulnus facimus, facit Deus de uulnere medicamentum ut qui uirtute percutimur, uicio curemur.

Gregorius in moralibus.

Varia
Fons primus
[Back to top]

Virtus p

Non est ad uirtutem ulla talis exhortacio, qualis est peccatorum recordacio.

Crisostomus super Hebreos sermone XXIII.

Varia
Fons primus
[Back to top]

Virtus q

Sicut uirtus onerosa est uicio, ita uirtutis amico uiciosa est amara uoluptas.

Prosper de uita contemplatiua libro II.

Varia
Fons primus
[Back to top]

Virtus r

Ethicam scripserunt gencium philosophi, in qua quasi membra quedam uirtutum de corpore bonitatis truncata pinxerunt, sed membra uirtutum uiua esse non possunt sine corpore caritatis Dei.

Hugo de scripturis sacris.

Varia
Fons primus
[Back to top]

Virtus s

Virtus regna, urbes, prouincias temperat; fert leges, colit amicicias, inter propinquos liberosque dispensat officia, modo arto fine circumdatur paupertatis exilii orbitatis; non tamen minor est si ex altiore fastigio in priuatum, ex regio in humilem subducitur, ex publico, ex spacioso iure in angustias domus uel anguli cohit.

Seneca LXXV. epistola.

Varia
Fons primus
[Back to top]

Virtus t

Errare michi uidetur qui dixit: Gracior est pulcro ueniens e corpore uirtus. Non enim ullo honestamento eget, ipsa magnum sui est decus et corpus suum consecrat. Potest ex casa uir magnus exire, potest et ex deformi humilique corpusculo formosus animus ac liber et magnus.

Seneca LXVII. epistola.

Varia
Fons primus
[Back to top]

Virtus u

Eque laudabilis uirtus est in corpore ualido ac libero posita quam in morbido ac uincto. Ergo ob tuam uirtutem non magis laudabilis si corpus tuum integrum fortuna prestitit, quam si ex aliqua parte mutilatum. Alioquin hoc erit ex seruorum habitu dominum estimare. Omnia enim ista in que dominium casus exercet serua sunt. Pecunia, corpus et honores inbecilla sunt fluida, mortalia, possessiones incerte.

[auctor non nominatus in manuscriptis]

Varia
Fons primus
[Back to top]

Virtus x

Si huc usque peruenis ut magis diligas integrum omnibus membris et illesum quam debilem et luscum; paulatim fastidium tuum eo usque procedet ut e duobus eque iustis ac prudentibus comatum et crispum malis. Sed quis unquam censuram inter suos agit ut filium sanum quam egrum magis diligat procerum et excelsum quam breuem aut modicum?

Seneca LXVII. epistola.

Varia
Fons primus
[Back to top]

Virtus y

Nulla possessio, nulla uis auri et argenti pluris quam uirtus estimanda est.

Seneca in epistola.

Varia
Fons primus
[Back to top]

Virtus z

Vnusquisque commendat uirtutem in qua uiget et reprehendit uicium in quo non deliquit.

Seneca ibidem.

Varia
Fons nondum repertus
[Back to top]

Virtus ab

Omnia beneficia in luce se collocari uolunt, sed tamen nullum theatrum uirtuti consciencia maius est.

Seneca ibidem.

Varia
Fons primus
[Back to top]

Virtus ac

Vnum hominis bonum ipsa uirtus est que inter hanc fortunam et illam superba incedit cum magno utriusque contemptu. Virtus rectorem ducemque desiderat, sed sine magistro uicia discuntur.

Seneca.

Varia
Fontes primi
[Back to top]

Virtus ad

Nulli non uirtus et uiuo et mortuo retulit graciam si illam bona secutus est fide.

Seneca LXXX. epistola.

Varia
Fons primus
[Back to top]

Virtus ae

Virtutem materia non mutat nec peiorem facit dura ac difficilis, nec meliorem ylaris et leta.

Seneca LXVII. epistola.

Varia
Fons primus
[Back to top]

Virtus af

Quemadmodum minuta lumina claritas solis obscurat; sic dolores, molestias, iniurias uirtus magnitudine sua elidit atque opprimit, nec magis ullam portionem habent incommoda, cum in uirtutem inciderint quam in mari nimbus.

Seneca ibidem.

Varia
Fons primus
[Back to top]

Virtus ag

Pone ex una parte uirum bonum diuiciis habundantem ex alia nichil habentem sed in se omnia bene disponentem, uterque eque uir bonus erit eciam si fortuna dispari utetur.

Seneca ibidem.

Varia
Fons primus
[Back to top]

Virtus ah

Nulli preclusa est uirtus; omnibus patet, omnes admittit, omnes inuitat; non eligit domum, non censum, nudo homine contenta est.

Seneca ibidem.

Varia
Fons primus
[Back to top]

Virtus ai

Ille bonus artifex est qui de omni materia facit optimum quod fieri possit. Phideas statuarum artifex non tantum ex ebore statuas sciebat facere, sed meliora ex ere. Et si marmor illi adesset, similiter et de illo faceret; si uiliorem materiam obtulisses, ex illa fecisset quale optimum fieri posset. Sic inquit sapiens: Si licebit uirtutem in diuiciis explicabit, si minus in paupertate; quamcumque fortunam acceperit, aliquid memorabile ex illa efficiet.

Seneca LXXXIX. epistola.

Varia
Fons primus
[Back to top]

Virtus ak

Scias eum multis uirtutibus habundare qui alienas amat.

Seneca in prouerbiis.

Varia
Fons primus
[Back to top]

Ubi

Bonum a
Discrecio b
Diuicie z
Fortitudo r
Gloria mala q
Gratitudo l
Homo y
Honor b
Humilitas o
Innocencia g
Mors ct
Philosophia g
Prosperitas c
Tribulatio ah
Tristicia g
Vicium d, Vicium e

Varia