Voluntas a

Mala uoluntate uel sola quisque miser efficitur, sed miserior potestate qua desiderium male uoluntatis impletur.

Augustinus libro XIII. de trinitate.

Varia
Fons primus
[Back to top]

Voluntas b

Cum se uoluntas relicto superiore ad inferiora conuertit, efficitur mala, non quia malum est quo se conuertit, sed quia peruersa est ipsa conuersio.

Augustinus de ciuitate Dei libro XII.

Varia
Fons primus
[Back to top]

Voluntas c

Nemo querat efficientem causam uoluntatis male. Non enim est efficiens sed deficiens quia nec effectio sed defectio.

Augustinus ibidem.

Varia
Fons primus
[Back to top]

Voluntas d

Iusticia Dei est aliquando ut sanus sis, aliquando ut egrotes. Si quando sanus es, dulcis est uoluntas Dei; et quando egrotas, amara est uoluntas Dei. Non recto corde es. Quare? Quia non uis dirigere uoluntatem tuam ad uoluntatem Dei, sed Dei uis curuare ad tuam. Illa recta est, sed tu curuus. Voluntas tua corrigenda est ad illam, non illa curuanda est ad te, et rectum habebis cor.

Augustinus super Psalmum XXXV.

Varia
Fons primus
[Back to top]

Voluntas e

Quia Deus cor querit, cor inspicit, intus testis est, iudex, approbator, adiutor, coronator; sufficit ut offeras uoluntatem. Cum potes, ore confitere ad salutem; cum autem non potes, corde crede ad iustitiam; corde laudas, corde benedicis, corde in ara consciencie uictimas sacras imponis; et respondetur tibi: Pax in terra hominibus bone uoluntatis.

Augustinus super Psalmum CXXXIIII.

Varia
Fons primus
[Back to top]

Voluntas f

Nichil omnino tam facile est bone uoluntati quam ipsa sibi, et hec sufficit Deo.

Augustinus.

Varia
Fons primus
cf. Voluntas p
[Back to top]

Voluntas g

Quicquid uis et non potes, factum Deus computat.

Augustinus super Psalmum LVII.

Varia
Fons primus
[Back to top]

Voluntas h

Voluntas auersa ab incommutabili bono et conuersa ad proprium bonum aut ad exterius aut ad inferius peccat. Ad proprium conuertitur cum sue potestatis uult esse, ad exterius cum aliorum propria uel quecumque ad se non pertinent cognoscere studet, ad inferius cum uoluptatem corporis diligit.

Augustinus libro de libero arbitrio.

Varia
Fons primus
[Back to top]

Voluntas i

Voluntas nichil habet nisi ex se iudicatur, nec quidem tardum ingenium, nec labilis memoria, nec inquietus appetitus, nec sensus obtusus, nec uita languens reum per se statuerunt hominem, sicut nec contraria innocentem, et hoc non ob aliud, nisi quia hec necessarie ac preter uoluntatem posse prouenire probantur.

Augustinus libro de libero arbitrio.

Varia
Fons primus
Fons primus et 1550 edition
cf. Voluntas ad
[Back to top]

Voluntas k

Si cui non contingat facultas concubendi cum uxore aliena, planum tamen sit aliquo modo cupere, et si potestas detur esse facturum, non minus est reus quam si in ipso facto deprehenderetur.

Augustinus libro de libero arbitrio et ponitur de penitencia distinctione I.

Varia
Fontes proximus et primus
[Back to top]

Voluntas l

Si propterea non facis furtum quia times ne uidearis, intus in corde fecisti; furti reus teneris et nil tulisti.

Augustinus ibidem.

Varia
Fontes proximus et primus
[Back to top]

Voluntas m

Bona uoluntas est qua appetimus recte honesteque uiuere et ad summam sapienciam peruenire.

Augustinus de uera religione.

Varia
Fons primus
[Back to top]

Voluntas n

Nichil mirum si miseri homines non adipiscuntur quod uolunt, id est beatam uitam. Illud enim cui comes est et sine quo nemo ea dignus est, recte scilicet uiuere non itidem uolunt. Hec eterna lex incommutabili stabilitate firmauit ut in uoluntate meritum sit, in bonitate autem miseria premium atque supplicium.

Augustinus de libero arbitrio.

Varia
Fons primus
[Back to top]

Voluntas o

Sic homo ab humanis in diuina dirigitur cum uoluntati humane diuina uoluntas preponitur.

Augustinus super Iohannem.

Varia
Fons primus
[Back to top]

Voluntas p

Dilige et quod uis fac. Nichil tam facile bone uoluntati quam ipsa sibi et hoc sufficit Deo.

Augustinus de uerbis Domini.

Varia
Fontes primi
cf. Voluntas f
[Back to top]

Voluntas q

Cum uult non potest quia quando potuit, noluit. Ideo per malum uelle perdidit bonum posse.

Augustinus de uerbis apostolorum Petri et Pauli.

Varia
Fons primus
[Back to top]

Voluntas r

Sola uoluntate miser quisque efficitur, sed miserior cum desiderium male uoluntatis impletur.

Augustinus ibidem.

Varia
Fons primus
[Back to top]

Voluntas s

Volens Deus rationabilem creaturam uoluntarii boni munere et liberi arbitrii potestate dotare ut boni ac mali capax, utrumque naturaliter posset et ad alterum uoluntate deflecteret. Licet quippe nobis eligere, refutare, probare, respuere. Nec est quo magis rationabilis creatura ceteris prefertur, nisi quod cum omnia alia conditionis tantum ac necessitatis bonum habeant, hec sola habet eciam uoluntatis.

Ieronymus ad Demetriadem.

Varia
Fons primus
[Back to top]

Voluntas t

Qui uiderit mulierem ad concupiscendum eam et cetera. Apud Deum cui nota sunt omnia antequam fiant, uoluntas perfecta faciendi pro opere reputatur facti.

Ieronymus ibidem.

Varia
Fons primus
[Back to top]

Voluntas u

Nil offertur Deo diucius bona uoluntate. Voluntas autem bona est, sic proximi aduersa, sicut nostra pertimescere; sic de prosperitate proximi, sicut de nostro profectu gratulari; aliena dampna nostra credere, aliena lucra nostra deputare; amicum non propter mundum sed propter Deum diligere, inimicum eciam amando tollerare; nulli quod pati non uis facere, nulli quod tibi iuste impendi desideras denegare; necessitati proximi iuxta uires concurrere sed prodesse et ultra uires uelle.

Gregorius omelia V. super euangelia.

Varia
Fons primus
[Back to top]

Voluntas x

Cesset uoluntas propria et infernus non erit. In quem enim deseuiet ignis nisi in propriam uoluntatem? Nam propria uoluntas Deum impugnat et aduersus eum extollitur. Ipsa est que paradysum spoliat, infernum ditat, sanguinem Christi euacuat, et ditioni dyaboli mundum subiugat.

Bernardus sermone CXXI.

Varia
Fontes primi
[Back to top]

Voluntas y

Voluntati nec leges imperant, nec principes dominantur. Libera est et maxime si spiritu ducitur quia ubi spiritus, ibi libertas.

Bernardus in quadam epistola.

Varia
Fons primus
[Back to top]

Voluntas z

Sola interdum bona uoluntas sufficit. Cetera non prosunt si sola defuerit, cetera quidem uita, sensus, uel appetitus, nec miserum per se faciunt, nec beatum. Alioquin et arbores ex uita et pecudes eciam ex reliquiis duobus uel miserie possent esse obnoxie, uel ydonee beatitudini quod omnino impossibile est. Communem habentes uitam cum arboribus, sensum uero et appetitum et eque uitam cum pecoribus, id quod dicitur uoluntas nos ab utrisque discernit.

Bernardus libro de libero arbitrio.

Varia
Fons primus
Fons primus et 1550 edition
[Back to top]

Voluntas ab

Voluntas est motus rationalis et sensui presidens et appetitui. Habet sane quocumque se uoluerit, rationem semper comitem, et quodammodo pedissequam, non quod semper ex ratione sed quod nunquam absque ratione moueatur, ita ut multa faciat per ipsam contra ipsam, hoc est per eius quasi ministerium contra eius consilium siue iudicium. Est uero data ratio uoluntati ut instruat illam, non destruat.

Bernardus ibidem.

Varia
Fons primus
[Back to top]

Voluntas ac

Insanis, infantibus, itemque dormientibus nichil quod faciant uel bonum uel malum imputatur quia nimirum sicut sue non sunt compotes rationis, sic nec usum retinent proprie uoluntatis, ac per hoc nec iudicium libertatis. Cum igitur nec uoluntas nec liberum habeat nisi se, merito non iudicatur nisi ex se.

Bernardus ibidem.

Varia
Fons primus
Fons primus et 1550 edition
[Back to top]

Voluntas ad

Siquidem nec tardum ingenium, nec labilis memoria, nec inquietus appetitus, nec sensus obtusus, nec uita languens reum per se faciunt hominem, sic nec contraria innocentem, et hoc non ob aliud nisi quia hec neccesarie ac preter uoluntatem posse prouenire probantur.

Bernardus ibidem.

Varia
Fons primus
cf. Voluntas i
[Back to top]

Voluntas ae

Grande malum propria uoluntas qua fit ut bona tua bona non sint. Quem enim modum sibi ponit humana cupiditas? Nonne qui per usuram acquirit pecuniam modicam, similiter mundum luctari conaretur uniuersum, si non deesset possibilitas, si suppeteret uoluntati facultas?

Bernardus super Cantica sermone LXXII.

Varia
Fontes primi
Fons primus et 1550 edition
[Back to top]

Voluntas af

Dico fiducialiter: nemini qui sit in propria uoluntate posset uniuersus mundus sufficere. Vtinam propria uoluntas rebus istis esset contenta ne in ipsum, horribile dictu, deseuiret auctorem. Omnino enim uellet Deum peccata sua aut uindicare non posse, aut nolle, aut ea nescire. Vult ergo eum non esse Deum que quantum in ipsa est, uult eum aut impotentem, aut iniustum, aut insipientem esse. Crudelis plane et omnino extranea malicia que Dei potenciam, iusticiam, sapienciam perire desiderat. Qui autem uult Deum esse iniustum, uult Deum non esse Deum; et qui desiderat Deum non esse, nonne quantum in se est Deum occidit?

Bernardus ibidem.

Varia
Fontes primi
[Back to top]

Voluntas ag

Voluntas dicta est a uolatu quoniam animus quo uult nimia uolacitate transfertur.

Cassiodorus super Psalmum XIII.

Varia
Fons primus
[Back to top]

Voluntas ah

Inter has utrasque concupiscencias anime uoluntas in mediculio est quodam uituperabiliore consistens, nec uiciorum flagiciis oblectatur, nec uirtutum doloribus acquiescit, sic querens a passionibus temperari carnalibus ut nequaquam uelit dolores necessarios sustinere, sine quibus desideria spiritus nequeunt possideri, absque castigatione carnis castimoniam desiderans optinere, sine uigiliarum labore cordis acquirere puritatem, cum requie carnis spiritualibus exuberare uirtutibus, absque ullius exasperatione conuicii paciencie graciam possidere, humilitatem Christi sine honoris mundani exercere iactura, religionis simplicitatem cum seculari ambitione sectari, Christo cum hominum laude ac fauore seruire, discretionem ueritatis sine cuiuspiam uel tenui offensione proferre, postremo sic uult futura consequi bona ut presencia non amittat.

In collatione Danielis abbatis.

Varia
Fons primus
[Back to top]

Voluntas ai

Valentior enim omni fortuna est uoluntas et in utramque partem ipsa res suas ducit beateque ac misere uite sibi causa est.

Seneca LXXII. epistola.

Varia
Fons primus
[Back to top]

Ubi

Beneficiencia b, Beneficiencia af
INTENTIO
Liberalitas q, Liberalitas t
Miseria b
Obstinatio a
Relinquere e, Relinquere p

Varia