Beneficiencia siue beneficium a

Beneficium est beniuola actio tribuens captansque gaudium tribuendo id quod agit.

Augustinus de diffinicionibus.

Varia
Fons primus
cf. Liberalitas ae (2)
[Back to top]

Beneficiencia siue beneficium b

Ante Dei oculos nunquam est uacua manus a munere si archa cordis repleta est bona uoluntate.

Augustinus omelia V. super Iohannem.

Varia
Fons primus
cf. Munus c
[Back to top]

Beneficiencia siue beneficium c

Nescit uirtus mensuram gracie nec contenta referre quod acceperit; sed uult cumulare quod sumpserit nec inferior sit beneficio licet equetur officio.

Ambrosius super Lucam.

Varia
Fons primus
cf. Virtus i
[Back to top]

Beneficiencia siue beneficium d

In beneficio conferendo plus animus quam census operatur; magis preponderat beniuolencia quam possibilitas reddendi muneris.

Ambrosius de officiis.

Varia
Fons primus
[Back to top]

Beneficiencia siue beneficium e

Graciam principis uoluntas nuda non asserit, nec beneficium dici potest quod nulla utilitate sentitur.

Cassiodorus libro II. epistolarum, epistola XXVIII.

Varia
Fons primus
[Back to top]

Beneficiencia siue beneficium f

Pietate plenum est peregrinam gentem publicis beneficiis obligare et non tantum compatriotas ad substancie lucra admittere quantum ipsos quoque aduenas inuitare.

Cassiodorus libro V., epistola IX.

Varia
Fons primus
[Back to top]

Beneficiencia siue beneficium g

Imperiti et omnino inutiles elegantioribus beneficiis et officiis ampliantur, diuicie accumulantur diuitibus; et non est qui respiciat pauperem et mendicum. Heliseus uasa uacua implebat et deficientibus oleum dedit. Hodie uero contempnuntur uasa uacua et plena super implentur, ligna in siluas et aquae in maria deferuntur. Arenti terre aqua subtrahitur et flumina que non indigent irrigantur.

Petrus Rauennas in quodam sermone.

Varia
Fons primus
cf. Exactio c
[Back to top]

Beneficiencia siue beneficium h

Fabius Verrucossus beneficium ab homine duro aspere datum panem lapidosum uocabat, quem esurienti accipere necessarium sit etsi accerbum.

Seneca de beneficiis.

Varia
Fons primus
[Back to top]

Beneficiencia siue beneficium i

Sunt enim quidam nimis grati qui aliquid incommodi prestare solent hiis quibus obligati sunt ut probent affectum beneficii memorem. Horum animus similis est prauo amore flagrantibus. Illi enim amice sue optant exilium ut fugientem comitentur, optant inopiam ut magis desideranti donent, optant morbum ut assideant, et quicquid optaret inimicus amantes uouent. Fere idem exitus est odii et amoris insani, sed nequicia est ut extrahas mergere, euertere ut suscites, includere ut emittas. Non enim beneficium iniurie finis, nec unquam id detraxisse meritum est, quod ipse qui detraxit intulerat.
Seneca ibidem.

Varia
Fontes proximus et primus
[Back to top]

Beneficiencia siue beneficium k

Multum interest utrum quis beneficium nobis det sua causa an sua et nostra. Ille qui totus ad se spectat et nobis prodest quia aliter sibi prodesse non potest, eo michi loco habendus uidetur, quo qui pecori suo pabulum prospicit. Si me in consorcium admisit, si duos cogitauit, ingratus sum et iniustus nisi gaudeo hoc illi profuisse quod proderat michi. Summe malignitatis est non uocare beneficium nisi quod dantem aliquo incommodo afficit.

Seneca libro VI. de beneficiis.

Varia
Fontes proximus et primus
[Back to top]

Beneficiencia siue beneficium l

Si indigenciam ei optares cuius nullum beneficium haberes, inhumanum erat uotum. Quanto inhumanius ei optas cui beneficium debes!

Seneca libro VI. de beneficiis.

Varia
Fontes proximus et primus
[Back to top]

Beneficiencia siue beneficium m

Sapientis est bene debere beneficia, bene soluere; interdum autem solucio est ipsa confessio.

Seneca LXXXIII. epistola.

Varia
Fons primus
[Back to top]

Beneficiencia siue beneficium n

Post malam segetem serendum est; sepe quicquid perierat assidua infelicis soli sterilitate unius anni restituit ubertas. Nemo habet tam certam in beneficiis manum ut non sepe fallatur.

Seneca ibidem.

Varia
Fons primus
[Back to top]

Beneficiencia siue beneficium o

Post naufragium maria temptantur; nam cuius rei euentus incertus est, id ut aliquando procedat sepe temptandum est.

Ibidem.

Varia
Fons primus
[Back to top]

Beneficiencia siue beneficium p

Sepe enim hoc non potuere diuicie in domum infuse quod opportune dati mille denarii. Multum enim interest an donaueris an succurreris, an seruauerit illum tua libertas an instruxerit. Sepe quod datur exiguum est, quod sequitur ex eo magnum est.

Seneca LXXXIII. epistola.

Varia
Fons primus
[Back to top]

Beneficiencia siue beneficium q

Errat si quis beneficium accipit libencius quam reddit. Hylarior esse debet qui soluit quam qui mutuatur, et lecior esse debet qui ere alieno accepti beneficii exonerat quam qui obligatur.

Seneca ibidem.

Varia
Fons primus
[Back to top]

Beneficiencia siue beneficium r

Si reddere beneficium non aliter quam per speciem iniurie potero, equissimo animo ad honestum consilium per mediam infamiam tendam.

Seneca ibidem.

Varia
Fons primus
[Back to top]

Beneficiencia siue beneficium s

Non potest dari beneficium sapienti cui quicquid datur de suo datur. Quedam amicis dantur, quedam ignotis, et plus est quamuis idem datur. Si ei datur quem a beneficio tuo nosse incipis, ille tribuit auxilia, iste ornamenta.

Seneca III. de beneficiis.

Varia
Fons primus
[Back to top]

Beneficiencia siue beneficium t

Beneficium est quod alienus dat; alienus enim est qui potuit sine reprehensione cessare. Ideo beneficium est quod quis dedit cum illi liceret eciam non dare.

Ibidem.

Varia
Fons primus
[Back to top]

Beneficiencia siue beneficium u

Pena est quod non audet ab ullo beneficium accipere, quod non audet ulli dare.

Ibidem.

Varia
Fons primus
[Back to top]

Beneficiencia siue beneficium x

In beneficio tempus, locum, personam quisque obseruet quia momentis quedam grata et ingrata sunt. Quanto enim acceptius est, si id damus quod quis non habet, quam cuius copia habundat, et quod diu querit nec inuenit, quam quod ubique uisurus est? Illa quoque non erunt sine honore que aut illi nemo alius dedit aut nos nulli alii.

Seneca III. de beneficiis.

Varia
Fons primus
[Back to top]

Beneficiencia siue beneficium y

Michi plus ceteris dedit quamuis idem aliis dedisset quia sine spe recipiendi dedit.

Idem.

Varia
Fons primus
[Back to top]

Beneficiencia siue beneficium z

Hec enim beneficii inter duos lex est: alter statim obliuisci debet dati, alter accepti numquam. Qui dedit beneficium taceat, narrat qui accepit.

Seneca II. de beneficiis.

Varia
Fons primus
[Back to top]

Beneficiencia siue beneficium ab

Tacite danda sunt beneficia ut nota sint solis quibus prosunt. Interdum eciam ipse qui iuuatur fallendus est ut habeat, nec a quo acceperit sciat.

Seneca ibidem.

Varia
Fons primus
[Back to top]

Beneficiencia siue beneficium ac

Sunt quedam nocitura impetrantibus que non dare sed negare beneficium est. Estimabimus utique utilitatem pocius quam uoluntatem petencium. Nam exorari in perniciem rogancium seua bonitas est. Quemadmodum pulcherrimum opus est eciam inuitos nolentesque seruare, ita rogantibus pestifera largiri blandum et affabile odium est. Pecuniam non dabo quam numeraturum adultere sciam ne in societatem turpis facti aut consilii inueniar, immo si potero reuocabo ne possit quandoque dicere: ille amando me occidit.

Ibidem.

Varia
Fons primus
[Back to top]

Beneficiencia siue beneficium ad

Differunt promissa ne minor sit turba rogancium, quales regie potencie ministri sunt quos delectat potencie sue longum spectaculum, minusque se iudicant posse nisi diu multumque singulis quid possint ostenderint. Nichil confestim, nichil semel faciunt; iniurie illorum precipites, lenta beneficia sunt.
Seneca ibidem.

Varia
Fons primus
[Back to top]

Beneficiencia siue beneficium ae

Nullum tam immansuetum animal quod non cura mitiget et in amorem sui uertat. Leonum ora a magistris impune tractantur; elephantorum feritatem in seruile officium tenet cibus.

Seneca I. de beneficiis.

Varia
Fons primus
[Back to top]

Beneficiencia siue beneficium af

Multum interest inter materiam beneficii et beneficium. Itaque nec aurum nec argentum nec quicquam eorum que a proximis recipiuntur beneficium est sed ipsa tribuentis uoluntas; imperiti autem quod traditur solum uocant beneficium. Imperatoris enim corona et uestis et currus nichil horum honor est sed honoris insigne; sic nec est beneficium quod sub oculis uenit sed uestigium beneficii.

Seneca I. de beneficiis.

Varia
Fons primus
[Back to top]

Beneficiencia siue beneficium ag

Plerique sunt qui beneficia asperitate uerborum et supercilio in odium adducunt, eo sermone usi ea superbia ut impetrasse peniteat.
Seneca ibidem.

Varia
Fons primus
[Back to top]

Beneficiencia siue beneficium ah

Tempore beneficia magna sunt; beneficium est unus in fame panis; beneficium est arentibus siti monstrare fontem. Eo animo quidque debetur quo datur, nec quantum sit sed a quali uoluntate perpenditur. Maius enim aut minus fit, quamuis idem sit tempore, loco, causa.

Ibidem.

Varia
Fons primus
cf. Gratitudo siue graciarum actio z
[Back to top]

Beneficiencia siue beneficium ai

Beneficium illius commodum expectat cui prestatur non nostrum; alioquin nobis illud damus. Itaque multa que summam humanitatem afferunt, precio graciam perdunt. Mercator urbibus prodest, medicus egrotis, mango uenalibus; omnes isti qui ad alienum commodum pro suo ueniunt, non obligant eos quibus prosunt.

Seneca libro IIII. de beneficiis.

Varia
Fons primus
[Back to top]

Beneficiencia siue beneficium ak

Ingratum est beneficium quod diu inter manus dantis hesit, quod quis egre dimittere uisus est et sic dare tanquam sibi eriperetur. Gratissima autem sunt beneficia parata, facilia, occurrencia, ubi nulla mora fuit nisi in accipientis uerecundia.
Seneca ibidem.

Varia
Fons primus
[Back to top]

Beneficiencia siue beneficium al

Optimum est occupare antequam rogemur quia cum homini probo ad rogandum os concurrat et suffundatur rubor, qui hoc tormentum remittit, multiplicat munus suum.

Seneca ibidem.

Varia
Fons primus
[Back to top]

Beneficiencia siue beneficium am

Non tulit gratis qui cum rogasset accepit. Nulla res carius constat quam que precibus empta est. Molestum enim uerbum et onerosum est, demisso uultu dicere: rogo.

Seneca ibidem.

Varia
Fontes proximus et primus
[Back to top]

Beneficiencia siue beneficium an

Lacerat animum et premit frequens beneficiorum commemoracio. Demus beneficia non feneremus. Dignus est decipi qui de recipiendo cogitauit cum daret.

Seneca ibidem.

Varia
Fons primus
[Back to top]

Beneficiencia siue beneficium ao

Nullum est tam plenum beneficium quod non uellicare, id est uilificare, malignitas possit; nullum tam angustum quod non bonus interpres extendat.

Seneca ibidem.

Varia
Fons primus
[Back to top]

Beneficiencia siue beneficium ap

Nichil carius estimamus quam beneficium quamdiu petimus, nichil uilius quam cum accepimus. Vnum bene positum beneficium multorum amissorum dampna restaurat.

Seneca ibidem.

Varia
Fons primus
cf. Liberalitas ae (2)
[Back to top]

Beneficiencia siue beneficium aq

Quamuis omni petenti dare debeas, tamen in beneficio spectandi sunt mores eius cui datur et animus erga nos et cohabitacio et uite societas et ad nostras utilitates officia ante collata.

Seneca ibidem.

Varia
Fontes proximus et primus
[Back to top]

Beneficiencia siue beneficium ar

Caue ne beneficium maius sit facultate; sequntur enim talem largicionem rapine ut ad largiendum suppetant copie. Cum enim dando egere ceperint, alienis bonis manus inferre coguntur et maiora odia sequntur eorum quibus ademerunt quam fauores eorum quibus dederunt.

Seneca ibidem.

Varia
Fons primus
cf. Liberalitas af
[Back to top]

Beneficiencia siue beneficium as

Eligo eum qui gratus, non qui redditurus sit. Non beneficium sed fenus est circumspicere; non ubi optime ponas sed ubi questuosissime habeas unde facillime tollas.

Ibidem.

Varia
Fons primus
[Back to top]

Beneficiencia siue beneficium at

Pulchrum sane predicandum beneficium nulla dilacione suspensum, nullis precibus redemptum, nullis meritis comparatum. Gracius enim est donum quod uenit ante preces.

Seneca de beneficiis.

Varia
Fons primus
cf. Liberalitas v
[Back to top]

Beneficiencia siue beneficium au

Beneficium qui dare nescit iniuste petit. Beneficium accipere est libertatem uendere. Beneficia plura recipit qui scit reddere. Beneficium dando accipit qui digno dedit. Beneficium dignis ubi das, omnes obligas. Beneficium qui se dedisse dicit, petit. Beneficium sepe dare, docere est reddere. Inopi beneficium bis dat, qui dat celeriter. Nichil prodest benefacere didicisse, si cesses benefacere.
Seneca in prouerbiis.

Varia
Fons primus
[Back to top]

Beneficiencia siue beneficium ax

Symonides, cum interrogaretur quid inter homines facile consenesceret, respondit: beneficium.

[auctor non nominatus]

Varia
Fons primus
[Back to top]

______________________________

Socrates: plus gaude datis beneficiis quam acceptis. Illa enim glorie hec necessitati uidentur esse subiecta.

[auctor non nominatus]

Varia
Fons primus
[Back to top]

Beneficiencia siue beneficium ay

Zenep cuidam solito apud se cantare petenti mutuam pecuniam, si dedero, inquit, et te et pecuniam perdo.

[auctor non nominatus]

Varia
Fons primus
[Back to top]

Ubi

GRATITUDO
Inimicicia a
INGRATITUDO
Liberalitas u, Liberalitas x, Liberalitas z, Liberalitas ab, Liberalitas ac, Liberalitas ad, Liberalitas ae (1), Liberalitas ae (2), Liberalitas ao, Liberalitas ap
Promissio b, Promissio d, Promissio e
Superbia ah

Varia