Deus a

Deus tibi totum est. Si esuris, panis tibi est; si sitis, aqua tibi est; si in tenebris es, lumen tibi est; si nudus es, immortalitate tibi uestis est.

Augustinus super Iohannem sermone XIX.

Varia
Fons primus
[Back to top]

Deus b

O uera summa suauitas, omni suauitate dulcior, sed non carni et sanguini, omni luce clarior, omni secreto interior, omni honore sublimior, sed non sublimibus in se!

Augustinus libro VI. confessionum.

Varia
Fontes proximus et primus
cf. Abstinencia c
[Back to top]

Deus c

O eterna ueritas et uera caritas et cara eternitas! Tu es Deus meus ubi suspiro die ac nocte.

Augustinus libro VII. confessionum.

Varia
Fons primus
[Back to top]

Deus d

Deus medicamentum est non sano, regula est prauo, lux est tenebrato, habitacio est deserto.

Augustinus de caritate.

Varia
Fons primus
[Back to top]

Deus e

Deus uera et summa uita in quo et a quo et per quem beata sunt que beata sunt omnia. Deus a quo auerti cadere, in quem conuerti resurgere, in quo manere consistere est. Deus a quo exire mori, et in quem redire reuiuiscere, et in quo habitare uiuere est. Deus quem nemo amittit nisi deceptus, quem nemo querit nisi admonitus, quem nemo inuenit nisi purgatus.

Augustinus in soliloquiis.

Varia
Fons primus
[Back to top]

Deus f

Deus est in se ipso sicut alpha et omega, in mundo sicut rector et auctor, in angelis sicut sapor et decor, in ecclesia sicut paterfamilias in domo, in anima sicut sponsus in thalamo, in iustis sicut adiutor et protector, in reprobis sicut pauor et horror.

Augustinus super illud: Pater noster qui es in celis.

Varia
Fontes proximus et primus
[Back to top]

Deus g

Quicquid michi preter Deum est, dulce non est; quicquid michi uult dare Dominus meus, auferat totum et se michi det.

Augustinus super Psalmum XXVI.

Varia
Fons primus
[Back to top]

Deus h

Non est quo fugias a Deo irato nisi ad Deum placatum.

Augustinus super Psalmum LXXIIII.

Varia
Fons primus
cf. Misericordia c
[Back to top]

Deus i

Deus totus oculus est quia omnia uidet; totus manus est quia omnia operatur; totus pes est quia ubique est.

Augustinus epistola CXXXVI.

Varia
Fons primus
[Back to top]

Deus k

Non in loco Deus uidetur sed mundo corde, nec corporalibus oculis Deus queritur, nec circumscribitur uisu, nec tactu tenetur, nec auditur affatu, nec sentitur incessu. Et cum absens est, uidetur; et cum presens est, non uidetur.

Ambrosius super Lucam libro I.

Varia
Fons primus
[Back to top]

Deus l

Creator omnium Deus Pater omnipotens ubique est, et ubique totus est in parte non est quoniam ubique est. Et tunc minus inuenitur quando is qui ubique totus est in parte queritur.

Gregorius libro II. moralium.

Varia
Fons primus
[Back to top]

Deus m

Nusquam deest et tamen ab iniquorum cogitacionibus longe est, nec tamen ibi deest ubi longe est quoniam ubi non est per graciam, adest per uindictam. Deus ubique presens est et uix inueniri potest, stantem sequimur et apprehendere non ualemus.

Gregorius ibidem et in omelia VIII. super Ezechielem.

Varia
Fons primus
[Back to top]

Deus n

Ponamus ante oculos que sit illa Dei natura que tenet omnia, implet omnia, complectitur omnia, superexcedit omnia, sustinet omnia. Nequaquam autem Deus ex una parte sustinet atque alia superexcedit, neque ex alia parte implet atque ex alia parte circumplectitur, sed circumplectendo implet, implendo circumplectitur, sustinendo superexcedit, superexcedendo sustinet; sine inquietudine superius regens, sine latitudine inferius sustinens; interius sine extenuacione penetrans, exterius sine extensione circumdans. Est itaque inferior et superior sine loco, est amplus sine latitudine, est subtilis sine extenuacione; et qui per molem corporis nusquam est, per incircumscriptam substanciam suam nusquam deest.

Gregorius super Ezechielem ibidem.

Varia
Fontes primi
[Back to top]

Deus o

Deus manet intra omnia, ipse extra omnia, ipse supra omnia, ipse infra omnia. Superior est per potenciam, inferior per sustentacionem, exterior per magnitudinem, interior per subtilitatem. Sursum regens, deorsum continens, extra circumdans, interius penetrans.

Gregorius ibidem et in moralibus.

Varia
Fons primus
[Back to top]

Deus p

Pene omne quod de Deo dicitur, eo ipso iam indignum est quo potuit dici. Nam cuius laudi non sufficit obstupescens consciencia, quando sufficiet loquens lingua?

Gregorius libro XX. moralium.

Varia
Fontes proximus et primus
cf. Laus v
[Back to top]

Deus q

Non parum apprehendisti, si hoc tibi de Deo compertum sit, quod nusquam sit qui non clauditur loco, et nusquam non sit qui non excluditur loco.

Bernardus de consideracione libro V.

Varia
Fons primus
[Back to top]

Deus r

Deus non partibus constat ut corpus, non affectibus distat ut anima, non formis substat ut omne quod factum est. Nunquid uerendum ne cogitacio transuolet illum? Quantumcumque in altum proficiat ultra est. Infra quod homo cogitare possit, altissimum querere, ridiculum est; statuere ipsum. Vltra non citra querendus est.

Bernardus ibidem.

Varia
Fons primus
[Back to top]

Deus s

Quam diues es in misericordia, quam magnificus in iusticia, quam munificus in gracia, Domine Deus noster! Non est qui similis sit tibi: munerator copiosissime, remunerator equissime, liberator piissime; gratis respicis humiles, iuste iudicas innocentes, misericorditer eciam saluas peccatores.

Bernardus sermone LVII.

Varia
Fons primus
[Back to top]

Deus t

Quid est Deus? Longitudo, latitudo, sublimitas, profundum. Longitudo propter eternitatem, latitudo proper caritatem, sublimitas propter maiestatem, profundum propter sapienciam. Deus amat ut caritas, nouit ut ueritas, sedet ut equitas, dominatur ut maiestas, regit ut principium, tuetur ut salus, operatur ut uirtus, reuelatur ut lux, assistit ut pietas. Que omnia faciunt et angeli, facimus et nos, sed longe inferiori modo, non utique bono quod sumus sed quod participamus.

Bernardus de consideracione.

Varia
Fons primus
[Back to top]

Deus u

Vnusquisque quod pre ceteris colit quod super omnia miratur et diligit, hoc ei Deus est. Si quid illud est quod in dilectionis lance preponderat, hoc tibi Deus est.

Origenes super Iudicum omelia II.

Varia
Fons nondum repertus
[Back to top]

Deus x

Dominus nec splene ridet, nec uultu subsannat. Ira ergo Dei uocatur retribucio peccatorum. Nam motus diuinitas beata non patitur que semper eadem eterna atque immobilis perseuerat. Sed ista conuersio humane conuenit fragilitati ut de leto quis tristis, de placato iracundus, de beniuolo reddatur offensus.

Cassiodorus super illud Psalmi II.: Tunc loquetur ad eos in ira sua.

Varia
Fons primus
[Back to top]

Deus y

Cum diligimus Dominum omnia in ipso reperimus. Vnus est qui queritur sed in quo omnia continentur. O lucrum mirabile! O compendium singulare! Cur nos per diuersa fatigamus? Ad ipsum ergo unanimiter festinemus post quem cuncta bona ultra non querimus sed tenemus.

Cassiodorus super illud Psalmi: Inquirentes Dominum non deficient.

Varia
Fons primus
[Back to top]

Deus z

Virtus inexplicabilis, pietas incomprehensibilis, sapiencia ineffabilis cuius uera diffinicio est finem in sanctis laudibus non habere.

Cassiodorus super illud Psalmi: Magnus Dominus et laudabilis nimis.

Varia
Fons primus
[Back to top]

Deus ab

Sicut enim nullum est momentum quo homo non utatur uel fruatur Dei bonitate et misericordia, sic nullum debet esse momentum quo eum presentem non habeat in memoria. Omne tempus in quo de Deo non cogitas, hoc te computa perdiddisse.

Hugo libro I. de claustro anime.

Varia
Fons primus
[Back to top]

Deus ac

Deus est splendor nunquam deficiens, uita indefesse non moriens, fons semper scaturiens, seminale uite seminarium, sapiencie principale principium, iniciale bonitatis inicium.

Alanus de conquestione nature.

Varia
Fons primus
[Back to top]

Deus ad

Prope Deus est, tecum est, intus est. Ita dico, Lucili: sacer intra nos spiritus sedet, malorum bonorumque nostrorum obseruator et custos. Hic prout a nobis tractatus est, ita nos ipse tractat. Bonus uero uir sine Deo nemo est.

Seneca in epistola.

Varia
Fons primus
[Back to top]

Ubi

Amor f, Amor g, Amor ab, Amor ac, Amor ay, Amor bg, Amor bi, Amor bl, Amor bm
Anima b
Beatitudo a, Beatitudo f,
Cogitacio n
Consideracio ad
Conuersacio a,Conuersacio b, Conuersacio c, Conuersacio d, Conuersacio t
Creacio a, Creacio c
Curiositas q, Curiosistas s
Dilectio a, Dilecito d, Dilectio r
Gloria eterna s, Gloria eterna t
Laus u
Misericordia c
Passio y
QUERERE
Sapiencia c
Scriptura d
TRINITAS

Varia