Liberalitas a

Liberalitas est motus quidam animi faciens et approbans liberas largiciones sine spe retribucionis.

Augustinus de diffinicionibus.

Varia
Fons nondum repertus
[Back to top]

Liberalitas b

Dandum est quod nec tibi nec alteri noceat, et cum negaueris quod petit, indicanda est iusticia ut non eum inanem dimittas. Et aliquando melius aliquid dabis etiam cum iniuste petentem correxeris.

Augustinus de sermone Domini in monte.

Varia
Fontes proximus et primus
[Back to top]

Liberalitas c

Vberior est nummus e paruo quam thesaurus e maximo, quia non tantum quod detur sed quantum resideat perpenditur. Nemo plus tribuit quam qui sibi nichil reliquit.

Ambrosius libro I. de uiduis.

Varia
Fons primus
[Back to top]

Liberalitas d

Non solum queritur quantum sed et de quanto et quo animo detur.

Ambrosius super epistolam ad Corinthios.

Varia
Fons primus
[Back to top]

Liberalitas e

Dominus non uult simul effundi opes sed dispensari, nisi forte ut Eliseus boues suos occidit et pauperes pauit ex eo quod habuit ut nulla cura teneretur domestica.

Ambrosius libro I. de officiis.

Varia
Fons primus

[Back to top]

Liberalitas f

Si adiuues eum qui possessiones aliorum eripere conatur, non probatur largitas. Nec illa perfecta est liberalitas, si iactancie causa magis quam misericordie largiaris.

Ambrosius libro I. de officiis.

Varia
Fons primus
[Back to top]

Liberalitas g

Non probatur liberalitas uel largitas, si quod alteri largitur alteri quis extorqueat, si iniuste querat et iuste dispensandum putat.

Ambrosius de officiis libro I.

Varia
Fons primus
[Back to top]

Liberalitas h

Perfecta est liberalitas ubi silencio quis tegit opus suum et necessitatibus singulorum occulte subuenit quem laudat os pauperis et non labia sua. Denique perfecta liberalitas fide, causa, loco, tempore commendatur ut primum operis circa domesticos fidei.

Ambrosius ibidem.

Varia
Fons primus
[Back to top]

Liberalitas i

Est alia probanda liberalitas ut proximos seminis tui non despicias, si egere cognoscas. Melius enim est ut ipse subuenias tuis quibus pudor est ab aliis sumptum deposcere aut alicui postulare subsidium necessitati.

Ibidem.

Varia
Fons primus
Fons primus 1550 edition
[Back to top]

Liberalitas k

Est duplex liberalitas: una que subsidio rei adiuuat, id est usu pecunie; altera que operum collacione inpenditur que multo frequenter splendidior multoque preclarior. Quanto utilius regem pharaonem sanctus Ioseph consilio prudencie iuuit quam si contulisset pecuniam! Pecunia enim unius ciuitatis non redimeret ubertatem, prospiciencia uero tocius Egypti per quinquennium famem repulit.

Ambrosius ibidem.

Varia
Fons primus
[Back to top]

Liberalitas l

Quicquid ex affectu puro ac sincero promitur, hoc est decorum: non superfluas edificaciones aggredi, non pretermittere necessarias.

Ambrosius ibidem.

Varia
Fons primus
[Back to top]

Liberalitas m

Considera ne Christi substanciam inprudenter effundas, id est ne immoderato iudicio rem pauperum tribuas non pauperibus et secundum dictum prudentissimi uiri liberalitate liberalitas pereat.

Ieronymus ad Paulinum.

Varia
Fons primus
[Back to top]

Liberalitas n

Liberalitas non cumulacione patrimonii sed largitatis diffinitur affectu.

Ieronymus libro de uiduis.

Varia
Fons primus
[Back to top]

Liberalitas o

In ipsa autem liberalitate modus adhibendus est rerum et personarum: rerum ut non omnia uni sed singulis quedam prestentur ut pluribus prodesse possimus, iuxta illud prophete: dispersit dedit pauperibus; personarum ut primum iustis, deinde peccatoribus quibus tamen prohibemur dare, non quia homines sunt sed quia peccatores.

Gregorius in epistola.

Varia
Fons primus
[Back to top]

Liberalitas p

Quibusdam inopiam ferre non ualentibus tolerabilius est minus tribuere quam post largitatem suam ex inopie angustia murmurare.

Gregorius XIX. moralium.

Varia
Fons primus
[Back to top]

Liberalitas q

Nunquam est uacua manus a munere, si archa cordis repleta est bona uoluntate.

Ibidem.

Varia
Fons primus
[Back to top]

Liberalitas r

Nulli paruus est census cui magnus est animus, nec de rei familiaris modo mensura pendet pietatis. Maiora quidem sunt inpendia diuitum et minora mediocrum, sed nec discrepat fructus operum ubi non deest affectus operancium.

Leo papa in apparicione Domini.

Varia
Fons primus
[Back to top]

Liberalitas s

Si non est omnium equalis facultas, debet esse par pietas quoniam fidelium largitas non de muneris pensatur pondere, sed de beniuolencie quantitate.

Ibidem.

Varia
Fons primus
[Back to top]

Liberalitas t

Semper illi quod largiatur occurrit cui bene uelle non deficit.

Leo papa ibidem.

Varia
Fons primus
[Back to top]

Liberalitas u

Honestius est rem negare quam longos terminos dare quia minus decipitur cui celeriter negatur. Vnde res ad multam instanciam exhibita cara uidetur emptione. Gratius est donum quod uenit ante preces.

Cassiodorus in epistola.

Varia
Fontes proximus et primus
cf. Beneficiencia at & Peticio k & Promissio b
[Back to top]

Liberalitas x

Parua ex uoto offerentis magna fiunt munera; consumunt autem actorem suum beneficia que constiterint extorta.

Valerius in sermone.

Varia
Fons primus
[Back to top]

Liberalitas y

Tunc solum preciosa est pecunia quando usu largiendi desinit possideri.

Boecius de consolacione.

Varia
Fons primus
[Back to top]

Liberalitas z

Quemadmodum seua et acerbissima crudelitas est que trahit penam, et misericordie genus est cito occidere, ita maior est muneris gracia quo minus diu pependit. Sicut in telis eadem ferri uis est sed in infinitum interest utrum excusso lacerto torqueantur an remissa manu effluant, ita idem quod datur sed interest quomodo detur, scilicet an tarde, an cito.

Seneca libro I. de beneficiis.

Varia
Fons primus
[Back to top]

Liberalitas ab

Omnis benignitas properat et proprium est libenter facientis cito facere; qui tarde et diem de die trahens profuit, non ex animo fecit. Itaque duas res maximas perdidit: et tempus et argumentum amice uoluntatis.

Ibidem.

Varia
Fons primus
[Back to top]

Liberalitas ac

Non nunquam magis nos obligat qui dedit parua magnifice, qui regum opes equauit animo, qui exiguum tribuit sed libenter, qui paupertatis sue oblitus est dum meam respicit, qui occasionem qua prodesset quesiuit.

Ibidem.

Varia
Fons primus
[Back to top]

Liberalitas ad

Multoque gratius uenit quod facili quam quod plena manu datur. Exiguum est quod in me contulit sed amplius non potuit. Ac hic quod dedit magnum est sed dubitauit, sed distulit, sed cum daret gemuit, sed superbe dedit, sed circumtulit ambicioni dedit, non michi.

Seneca ibidem.

Varia
Fons primus
[Back to top]

Liberalitas ae

Non refert quid sit quod datur nisi a uolente uolenti. A quibus ergo accipiemus? Vt breuiter tibi respondeam, ab hiis quibus dedisse uideamur.

Seneca ibidem.

Varia
Fons primus
[Back to top]

______________________________

Vnum bene positum beneficium multorum amissorum solatur dampna. Beneficium est beniuola actio tribuens gaudium capiensque tribuendo et in id quod facit prona et sponte sua parata.

Seneca ibidem.

Varia
Fons primus
[Back to top]

Liberalitas af

Caue ne beneficium maius sit facultate tua. Inest enim in tali liberalitate cupiditas rapiendi ut ad largiendum suppetant copie. Sequntur enim talem largicionem rapine. Cum enim dando egere ceperint, alienis bonis manus inferre coguntur, et maiora odia eorum assecuntur quibus ademerunt quam fauores eorum quibus dederunt.

Seneca ibidem.

Varia
Fontes proximus et primus
[Back to top]

Liberalitas ag

Officium liberalitatis est omni petenti dare, deos imitari. Si deos imitaris, da eciam ingratis. Nam et sceleratis sol oritur et piratis patent maria. Dii rerum omnium optimi actores ignorantibus beneficia dare incipiunt, ingratis perseuerant. Non cessant dii beneficia congerere, unam sortiti intencionem, scilicet prodesse. Imitemur illos; demus eciam si multa in irritum data sunt. Ingratus est; non fecit michi iniuriam sed sibi. Nam gratum semper beneficium delectat, ingratum semel.

Seneca ibidem.

Varia
Fontes proximus et primi
[Back to top]

Liberalitas ah

Duo sunt genera largorum, quorum alteri dissipatores, alteri liberales: dissipatores qui epulis et muneribus ystrionum et lenonum pecunias profundunt, quorum memoriam aut breuem aut nullam sunt relicturi; liberales, qui suis facultatibus aut captos a predonibus redimunt, aut amicos in filiarum collacione iuuant, uel in alia re querenda uel augenda.

Seneca ibidem et ponitur de problematibus.

Varia
Fontes proximus et primus
[Back to top]

Liberalitas ai

Refert cuius animi sit qui prestat, non cuius status. Non est gloriosum quod ab inuito et tergiuersante fit; nichil facit uirtus quod necesse est.

Seneca LXXXIII. epistola.

Varia
Fontes primi
[Back to top]

Liberalitas ak

Multi sunt qui non donant sed proiciunt. Non uoco liberalem pecunie sue iratum.

Seneca ibidem.

Varia
Fons primus
[Back to top]

Liberalitas al

Ab Antigono Cinicus petiit talentum; respondit plus esse quam Cinicum deceret petere. Repulsus petiit denarium; respondit minus esse quam quod regem deceret dare. Turpissima huius cauillacio est. Inuenit quomodo neutrum daret. In denario regem, in talento Cinicum respexit cum posset et denarium Cinico dare et talentum tanquam rex.

Seneca libro II. de beneficiis.

Varia
Fons primus
[Back to top]

Liberalitas am

Melius Alexander, cum daret ciuitatem cuidam dicenti non conuenire ciuitatem humili fortune sue, respondit: Non quero quid oporteat te accipere, sed quid deceat me dare.

Ibidem.

Varia
Fontes proximus et primus
[Back to top]

Liberalitas an

Socrati cum multa quique pro suis facultatibus offerrent, Escines pauper auditor ait: Nichil, inquit, dignum te quod tibi dare possem, inuenio et ob hoc solo me pauperem esse sencio, tamen dono tibi unum quod habeo me ipsum. Hoc autem munus rogo qualecumque est boni cogites. Alii enim cum multum tibi darent plus sibi reliquerunt. Sed ego michi de me nichil reliqui. Nemo enim plus tribuit quam qui sibi nichil reliquit. Cui Socrates: Tu, inquit, magnum munus michi das nisi te tam paruo estimas. Habebo itaque cure ut te meliorem tibi reddam quam accepi. Ecce qualiter Escines hoc munere uicit omnem iuuenum opulentorum munificenciam. Vides quomodo animus inuenit liberalitatis materiam eciam inter angustias, neque existimes illum uilem sibi fuisse, quia precium se sui fecit ingeniosus adolescens. Non ergo quanta queque sint sed a quali prospiciendum est.

Ibidem.

Varia
Fontes primi
[Back to top]

Liberalitas ao

Melius puto apud pauperes bonos quam apud diuites magnos collocari beneficium, et reddit racionem. Nam qui locupletes sunt beneficio obligari nolunt, immo cum acceperint beneficium quamuis magnum aut beneficium se prius dedisse arbitrantur, aut aliquid a se expectari suspicantur. Cum uero inopi bono benefacias, spectatum se non suam fortunam putat, et ideo si in contencione res uenerit, sequere Semistodem qui ait de nupciis filie sue consultus: Malo uirum qui pecunia egeat quam pecuniam que uiro.

Seneca de beneficiis.

Varia
Fontes proximus et primus
[Back to top]

Liberalitas ap

Sicut non est liberalis qui sibi donat, nec clemens qui sibi ignoscit, nec misericors qui malis suis tangitur sed qui aliis, ita eciam nemo sibi ipsi beneficium dat, sed nature sue parat que mouet ad refutanda nociua et ad appetenda proficua.

Seneca libro V. de beneficiis.

Varia
Fontes proximus et primi
[Back to top]

Liberalitas aq

Bis est gratum quod opus est, si ultro offeras. Benignus eciam dandi causam cogitat. Cui semper dederis, ubi negas rapere imperas.

Seneca in prouerbiis.

Varia
Fons primus
[Back to top]

Liberalitas ar

Duplex fit bonitas cum accedit celeritas. Minus decipitur cui negatur celerius. Ages sic alienum negocium ut tuum non obliuiscaris, amico ita prodesto ut tibi non noceas.

Seneca ibidem.

Varia
Fontes primi
[Back to top]

Ubi

BENEFICIENCIA
HOSPITALITAS
Parentes b
Paupertas q
Peticio l, Peticio m
Promissio b, Promissio d, Promissio e
Seruicium m

Varia