Timor a

Quando timore pene non amore iusticie fit bonum, nondum bene fit bonum, nec fit in corde quod fieri uidetur in opere, quando mallet homo non facere, si posset impune.

Augustinus contra Pelagium libro II.

Varia
Fons primus
[Back to top]

Timor b

Quid times hominem homo in Dei sinu positus? Tu de illius sinu noli cadere; quicquid ibi passus fueris ad salutem ualebit, non ad perniciem.

Augustinus de uerbis Domini.

Varia
Fons primus
[Back to top]

Timor c

Timor presens securitatem generat sempiternam. Time eum qui super omnes est et hominem non formidabis.

Augustinus super Psalmos.

Varia
Fons nondum repertus
[Back to top]

Timor d

Timor Dei corrigit; timor hominum differt actionem, sed uoluntatem non aufert, et auidiores reddit ad crimen quos aliquando suspendit a crimine.

Ieronymus super Mattheum.

Varia
Fons primus
[Back to top]

Timor e

Qui timet Deum nichil negligit. Timere Deum est nulla que facienda sunt bona preterire.

Gregorius libro I. moralium.

Varia
Fons primus
[Back to top]

Timor f

In uia Dei a timore incipitur ut ad fortitudinem ueniatur. Nam sicut in uia seculi audacia fortitudinem, ita in uia Dei audacia debilitatem parit; et sicut in uia seculi timor debilitatem, ita in uia Dei timor fortitudinem gignit.

Gregorius ibidem libro V.

Varia
Fons primus
[Back to top]

Timor g

Cum quis timore adhuc bona agit, a malo penitus non recessit quia eo ipso peccat quo peccare uellet, si inulte potuisset.

Gregorius ibidem libro I.

Varia
Fons primus
[Back to top]

Timor h

Nullum genus mortis bono et recte uiuenti homini metuendum est.

Gregorius.

Varia
Fons primus
[Back to top]

Timor i

Si adhuc a praua actione formidata pena prohibet, profecto formidantis animum nulla spiritus libertas tenet. Nam et si penam non metueret, culpam proculdubio perpetraret.

Gregorius in pastorali.

Varia
Fons primus
[Back to top]

Timor k

Ignorat itaque graciam libertatis quem ligat seruitus timoris.

Gregorius ibidem.

Varia
Fons primus
[Back to top]

Timor l

Cum ex peccato presens pena metuitur, et annexa Dei facies non amatur. Timor ex timore est, non ex humilitate.

Gregorius super illud Iob III.: Quare non in uulua mortuus.

Varia
Fons primus
[Back to top]

Timor m

Noueris te ut Deum timeas; noueris ipsum ut et ipsum diligas. In uno iniciaris ad sapienciam, in altero consummaris quia inicium salutis timor Domini et plenitudo legis est caritas. Quemadmodum ex noticia tui uenit in te timor Dei atque ex Dei noticia Dei itidem amor, sic econtrario de ignorancia tui superbia ac de Dei ignorancia uenit desperacio.

Bernardus super Cantica sermone XXXVII.

Varia
Fons primus
[Back to top]

Timor n

Deum time et mandata eius obserua; hoc est omnis homo. Ergo si hoc est omnis homo, absque hoc nichil homo.

Bernardus ibidem sermone XX.

Varia
Fons primus
[Back to top]

Timor o

Fugit ouis tremebunda ueniente lupo, abscondit se columba tremens ancipitre uiso, de cauerna mus exire non audet esuriens ambiente cato, et tu uidens furem currebas cum eo?

Bernardus in epistola ad Fulconem.

Varia
Fons primus
[Back to top]

Timor p

Facile deuiat a iusticia qui in causis non Deum sed homines pertimescit. Hic timor peccandi facultatem differre potest, uoluntatem auferre non potest. Solus est Dei timor qui mentes corrigit, fugat crimina, innocenciam seruat, perpetem tribuit facultatem.

Crisostomus in sermone de Iohanne Baptista.

Varia
Fons primus
[Back to top]

Timor q

Principium nostre salutis sapiencieque secundum scripturas timor Domini est. De timore Domini nascitur compunctio salutaris; de compunctione cordis procedit abrenunciacio, id est nuditas et contemptus omnium facultatum; de nuditate humilitas procreatur; de humilitate mortificacio uoluptatum generatur; de uoluptatum mortificacione extirpantur atque marcescunt uniuersa uicia; de uiciorum expulsione uirtutes fructificant atque succrescunt; de uirtutum pululacione puritas cordis acquiritur; per cordis puritatem apostolice caritatis perfectio possidetur.

Vetus est beati Antonii sentencia. Iohannes Cassianus de institutis monachorum libro IIII.

Varia
Fons primus
[Back to top]

Timor r

Si amor Dei te tenere non potest, saltim teneat et terreat timor iudicii, metus gehenne, laquei mortis, dolores inferni, ignis urens, uermis corrodens, sulphur fetens, flamma tartarea et omnia mala.

Hugo libro III. de anima.

Varia
Fons primus
[Back to top]

Timor s

Breuis et plena commonicio qua Domino amabili de timore seruitur. Nam sicut remissa securitas culpas admittit, ita timor desiderabilis delicta semper excludit.

Cassiodorus super Psalmum II.: Seruite Domino in timore.

Varia
Fons primus
[Back to top]

Timor t

Humanus timor diffidenciam tribuit, diuinus autem spei firmamenta concendit.

Cassiodorus super Psalmum XXIIII.: Firmamentum est Dominus timentibus et cetera.

Varia
Fons primus
[Back to top]

Timor u

Qui Deum bene timet et amat, qui bene amat et timet; res ille in celesti deuocione sociate sunt.

Idem super Psalmum XXXII.

Varia
Fons primus
[Back to top]

Timor x

Cum audis quod Dominus tuus dulcis est, attende quid diligas; cum audis rectus, attende quid timeas ut amore et timore Dei excitatus, legem eius custodias.

Cassiodorus super illud Psalmorum: Dulcis et rectus Dominus.

Varia
Fons primus
[Back to top]

Timor y

Desines timere, si sperare desieris. Spem metus sequitur. Nec miror ista sic ire; utrumque pendentis animi est, utrumque futuri expectacione sollicitum. Maxima autem utriusque causa est quod non ad presencia aptamur sed cogitaciones in longinqua premittimus. Itaque prouidencia, maximum bonum condicionis humane, in malum uersa est. Fere pericula que uident fugiunt cum effugere secure sunt.

Seneca XIII. epistola.

Varia
Fons primus
[Back to top]

Timor z

Nos et uenturo torquemur et preterito. Multa bona nostra nobis nocent. Timoris tormentum memoria reducit, prouidencia anticipat. Nemo tantum presentibus miser est.

Seneca ibidem.

Varia
Fons primus
[Back to top]

Timor ab

Plura sunt que nos terrent quam premunt et sepius opinione laboramus quam re. Cito accedimus opinioni et sic uertimus terga quemadmodum illi quos puluis motus fuga peccorum exuit castris aut quos aliqua fabula sine auctore conterruit. Nescio quomodo uana perturbant. Vera enim modum suum habent. Verisimile est aliquid futurum mali; non statim uerum est. Quam multa inexpectata uenerunt! Quam multa expectata nunquam comparuerunt!

Seneca ibidem.

Varia
Fons primus
[Back to top]

Timor ac

Nulli tam perniciosi, tam irreuocabiles sicut limphatici metus sunt. Ceteri enim sine racione, hii sine mente sunt. Spem ac metum examina, et quociens incerta erunt omnia, tibi faue. Dicet aliquis: fortasse non ueniet quod times. Tu dic: quid, si ueniet, uidebimus utrum uincat; fortasse pro me uenit et mors ista uitam honestabit.

Seneca ibidem.

Varia
Fons primus
[Back to top]

Timor ad

Quid enim prodest mala accrescere et presens tempus futuri metu perdere? Stultum est quandoque quia sis futurus miser esse iam miserum. Quicquid uereris ne eueniat euentum utique propone et quodcumque est illud malum, tecum ipse metire ac timorem tuum taxa. Intelliges aut non magnum aut non longum esse quod metuis.

Seneca XXIIII. epistola.

Varia
Fons primus
[Back to top]

Timor ae

Numerare eos noli qui tibi metum faciunt. Spiritum tibi tam unus eripiet quam unus dedit.

Seneca XXIX. epistola.

Varia
Fons primus
[Back to top]

Timor af

Stulticia est timore mortis mori. Venit qui occidat exspecta. Quid occupat? Quare suscipis aliene crudelitatis procuracionem? Vtrum inuides carnifici tuo an parcis?

Seneca LXXI. epistola.

Varia
Fons primus
[Back to top]

Timor ag

Quemadmodum aues inanis funde sonus territat, ita nos non ad ictum tantum excitamur, sed ad crepitum; inter suspecta male uiuitur. Infirmus animus antequam malis opprimatur quatitur; presumit illa et ante tempus cadit. Quid autem demencius quam angi futuris nec se tormento reseruare sed accersire sibi miserias et admouere? quas differre oportunum est, si discutere non possit, cito neminem futuro debere torqueri.

Seneca LXXV. epistola.

Varia
Fons primus
[Back to top]

Timor ah

Nemo tam timidus est ut malit semper pendere quam semel cadere.

Seneca XXII. epistola.

Varia
Fons primus
[Back to top]

Timor ai

Quod nimis uolunt miseri, hoc facere credunt. Immo quod metuunt nimis nunquam ammoueri nec tolli putant.

Seneca in epistola.

Varia
Fons primus
[Back to top]

Timor ak

Quemadmodum perniciosior est hostis fugientibus, sic omne fortuitum incommodum magis instat timenti et auerso.

Seneca LXXIX. epistola.

Varia
Fons primus
[Back to top]

Timor al

Qui insidias timet in nullis incidet, nec cito perit ruina qui ruinam timet, et caret periculo qui eciam tutus cauet. Semper enim metuendo sapiens uitat malum. Nam inimicum quamuis humilem docti est metuere iuxta illud: Parua necat morsu spaciosum uipera taurum. A cane non magno sepe tenetur aper. Causa pusilla nocet; sapiens nocencia uitat.

Idem de sentenciis oratorum.

Varia
Fons primus
[Back to top]

Timor am

Multos in summa pericula misit uenturi timor ipse mali. Fortissimus ille est qui promptus metuenda pati. Plura enim sunt que nos terrent quam que premunt, et sepius opinione quam re laboramus.

Ibidem.

Varia
Fontes proximus et primus
[Back to top]

Timor an

Que demencia est fugere cum retroire non possis! Cotidie dampnatur qui semper timet. Res uera est qui a multis timetur, multos timet. Regibus peius est multo quam seruientibus re uera quia isti singulos, illi uniuersos timent.

Seneca in prouerbiis.

Varia
Fontes primi
[Back to top]

Timor ao

Stultum est timere quod uitari non potest. Tutissima res est nil timere preter Deum. Timidum non facit animum nisi reprehensibilis uite consciencia mala.

Seneca ibidem.

Varia
Fontes primi
[Back to top]

Timor ap

Timor sicut modestie cognatus est, ita familiaris est sapienti quia mentem componit et humiliat.

Tullius de tusculanis questionibus.

Varia
Fontes proximus et primus
[Back to top]

Ubi

Auaricia ad (1), Auaricia ad (2), Auaricia ae, Auaricia af
Confidencia b
Consideracio p
Consolacio l, Consolacio m, Consolacio n
Correctio s
Cupiditas ac
Dampnum d
Fortitudo i
Gracia o
Intentio g
Magnanimitas g
Mors l, Mors co, Mors cz, Mors dc
Potestas k, Potestas m, Potestas x, Potestas y
Spes i
Tribulatio r, Tribulatio t
Voluptas f

Varia