Laus a

Laus humana non appeti a sapiente sed subsequi debet sapientem et recte facientem ut illi proficiant qui eciam imitari possunt quod laudant.

Augustinus libro de sermone Domini in monte.

Varia
Fons primus
[Back to top]

Laus b

Securitas laudis in laude Dei est. Ibi laudator securus est, ubi non timet ne de laudato erubescat.

Augustinus super Psalmos.

Varia
Fons primus
[Back to top]

Laus c

Bonum laudare non laudato, sed laudantibus prodest.

Augustinus super Iohannem.

Varia
Fons primus
[Back to top]

Laus d

Ibi est a uanitate remota laudatio, ubi eciam uituperatio ab offensione secura est.

Augustinus ad Diascorum.

Varia
Fons primus
[Back to top]

Laus e

Non amoris laudis uires sentit nisi qui ei bellum indixerit quia et si cuiquam facile est laude carere dum denegatur, difficile est ea non delectari cum offertur.

Augustinus ibidem.

Varia
Fons primus
Laus h & Laus s
[Back to top]

Laus f

Non prohibet uideri ut Deus laudetur, sed uideri ut ipsi laudentur.

Augustinus super illud Matthei V.: Ne iustitiam uestram faciatis.

Varia
Fons primus
[Back to top]

Laus g

Hanc opinionem faciliter praesumptam queso deponas tuumque animum quamuis erga me beniuolentissimum soluas atque exuas ac de me michi magis quam ulli alteri credas.

Augustinus II. epistola ad Volusianum.

Varia
Fons primus
[Back to top]

Laus h

Nemo huius hostis, scilicet laudis, uires sentit nisi qui ei bellum indixerit quia et si cuiquam facile est laude carere dum denegatur, difficile est tamen ea non delectari cum offertur.

Augustinus in quadam epistola.

Varia
Fons primus
Laus e & Laus s
[Back to top]

Laus i

Nec ualde gaudere debemus quando laudamur, nec contristari quando uituperamur, quia nec dampnare iniuria nec coronare potest laus aliena.

Augustinus ibidem.

Varia
Fons primus
[Back to top]

Laus k

Quid est quod dicis, ego diues, ille pauper? Sarcinam tuam commemoras, pondus tuum laudas. Taceat laudes tuas qui miserationes tuas non considerat.

Augustinus de doctrina Christiana.

Varia
Fontes primi
[Back to top]

Laus l

Esse humilem est nolle laudari in se. Qui ergo in se laudari appetit, superbus esse conuincitur.

Augustinus super Psalmum V.

Varia
Fons primus
[Back to top]

Laus m

Apulegius auditoribus suis admirantibus doctrinam commendabat, non auiditate consequende laudis, sed caritate seminande ueritatis.

Augustinus super Genesim.

Varia
Fons primus
[Back to top]

Laus n

Laudamur mendaciter, delectamur inaniter; et uani sunt qui laudantur et mendaces qui laudant. Alii laudantur et ficti sunt, alii laudant quod putant et falsi sunt, alii utrorumque preconiis gloriantur et uani sunt.

Augustinus in quadam epistola.

Varia
Fons primus
[Back to top]

Laus o

Dicit sermo diuinus ne laudaueris hominem in uita sua, tanquam si diceret: Lauda post mortem, magnifica post consumationem. Duplici tamen ex causa utilius est hominum magis memorie laudem dare quam uite ut illo potissimum tempore merita sanctitatis extollas, quando nec laudantem adulatio nocet, nec laudatum elatio temptet. Lauda ergo post periculum, predica securum; lauda nauigantis felicitatem, sed cum peruenerit ad portum; lauda ducis uirtutem, sed cum perductus est ad triumphum. Quis autem diues possit hic sine trepidatione laudari qui et de preterito meminit se habere quod doleat et de futuro uidet sibi superesse quod timeat?

Ambrosius in natali sancti Eusebii.

Varia
Fons primus
[Back to top]

Laus p

Plures in hoc ipso placere cupiunt quod placere contempnunt, et mirum in modum laus dum uitatur, appetitur.

Ieronymus in epistola ad Sardanianum.

Varia
Fons primus
[Back to top]

Laus q

Vilium satis hominum est et suam laudem querencium alios uiles facere quia alterius uituperatione se laudari putant, et qui suo merito placere non possunt, placere uolunt in comparatione peiorum.

Ieronymus in epistola.

Varia
Fontes proximus et primus
[Back to top]

Laus r

Caue ne hominum rumusculos acceperis; caue ne offensam Dei populorum laude commutes.

Ieronymus ad Nepocianum.

Varia
Fons primus
[Back to top]

Laus s

Si uere laudabilem esse cupis, laudes hominum ne requiras quia quamuis alicui sit facile laudem non curare dum negatur, est tamen difficile ea non delectari cum offertur.

Ieronymus ad Cellanciam.

Varia
Fontes primi
Laus e & Laus h
[Back to top]

Laus t

Sepe bono operi dum laus humana obuiat, mentem operantis immutat que quamuis quesita non fuerat, tamen oblata delectat.

Gregorius in moralibus.

Varia
Fons primus
[Back to top]

Laus u

Pene omne quod de Deo dicitur, eo ipso iam indignum est quod potuit dici. Nam cuius laudi non sufficit obstupescens consciencia, quomodo sufficit loquens lingua?

Gregorius ibidem.

Varia
Fons primus
[Back to top]

Laus x

Laus sua iustos cruciat, iniquos exultat. Sed iustos dum cruciat, purgat; iniquos dum letificat, reprobos monstrat.

Gregorius ibidem.

Varia
Fons primus
[Back to top]

Laus y

Cum per accepta bona reprobi in sua laude se eleuant, ipsis muneribus contra largitorem pugnant. Inde quippe contra dantem superbiunt, unde ei amplius humiles esse debuerunt.

Gregorius libro VIII. moralium.

Varia
Fons primus
[Back to top]

Laus z

Qui inchoate uirtutis ab humano ore laudem receperit, quasi plantati ligni ante tempus pomum comedit.

Gregorius ibidem.

Varia
Fons primus
[Back to top]

Laus ab

Quo arbor altius ad superiora surrexerit, eo uim uentorum uehemencius sentit quia quo plus quisque in bona opera attollitur, eo ampliori ab ore laudancium flatu fatigatur.

Gregorius libro XXII. moralium.

Varia
Fons primus
[Back to top]

Laus ac

Valde perfectorum est sic ostenso opere auctoris gloriam querere ut de illata laude nesciat priuata exultatione gaudere.

Gregorius in moralibus.

Varia
Fons primus
[Back to top]

Laus ad

Quasi latrunculus est appetitus laudis humane qui recto itinere gradientibus ex latere iungitur ut ex occultis educto gladio gradiencium uita trucidatur.

Gregorius ibidem.

Varia
Fons primus
[Back to top]

Laus ae

Nescit laudem cum suppetit fugere qui ad hanc didiscit cum deesset hanelare.

Gregorius in pastorali.

Varia
Fons primus
[Back to top]

Laus af

Cum enim pro recto opere laus transitoria queritur, eterna retributione res digna uili precio uenundatur.

Gregorius ibidem.

Varia
Fons primus
[Back to top]

Laus ag

Quisquis laudis concupiscencias calcare iam sufficit, edificationis fraudem perpetrat, si bona que egit occultat.

Gregorius in pastorali.

Varia
Fons primus
[Back to top]

Laus ah

Laus in nobis referatur ad ipsum laudabilium uniuersorum auctorem et largitorem, non ficte quemadmodum ab ypocritis, non sola consuetudine sicut a secularibus, sed nec necessitate quidem ut iumenta ferendis oneribus applicantur, sed sicut decet sanctos sinceritate fida, deuotione solicita, ylaritate grata, sed non dissoluta.

Bernardus super Cantica.

Varia
Fons primus
[Back to top]

Laus ai

Extrema demencia est nulla imminente necessitate rerum et necessitate uiolenta propriis laudibus uelle decorari. Non est hoc secundum Deum loqui; iudicium est pocius istud insanie. Hoc enim omnem nobis mercedem euacuat.

Crisostomus de laudibus Pauli omelia V.

Varia
Fons primus
[Back to top]

Laus ak

Non laudatur de fide leprosus quia in lege doctus; hic alienigena scilicet centurio laudatur quia legis ignarus. In modico enim sermone sapiencie plus laudatur rusticus quam in magno philosophus; et puer, si aliquid dixerit sapienter, laudatur ubi perfectior non auditur.

Crisostomus super illud Matthei VIII.: Audiens Ihesus miratus est et cetera.

Varia
Fons primus
[Back to top]

Laus al

Iustum est ut bene gerentibus laudis tribuatur assensus. Nam si equorum cursus hominum clamoribus incitatur, et insonancium manibus agitur ut mutis animalibus uelocitas appetatur, quantum inde homines stimulari posse credimus quos ad laudis auiditatem singulariter inuenimus!

Cassiodorus libro I. epistolarum.

Varia
Fons primus
[Back to top]

Laus am

Gloriosis quippe dominis gratiosa sunt preconia quam tributa quia stipendium et tyranno penditur, laudis predicatio autem non nisi bono principi debetur.

Cassiodorus libro II. epistolarum.

Varia
Fons primus
[Back to top]

Laus an

Generosus est; parentes laudas. Diues est; non credo fortune. Validus est; egritudine fatigabitur. Pernix est; abiit in senectutem. Formosus est; expecta parum et non erit.

Apulegius in libro de deo Socratis.

Varia
Fontes proximus et primus
[Back to top]

Laus ao

In homine id quoque laudandum est quod ipsius est. Familiam formosam habet et domum pulchram; multum serit, multum fenerat; nichil horum in ipso est sed circa ipsum. Lauda in illo quod nec eripi potest, nec dari quod proprium hominis est. Queris quid sit? Animus et ratio in animo perfecta. Quid autem est quod ratio hec ab illo exigat? Rem facillimam secundum naturam suam uiuere.

Seneca XLI. epistola.

Varia
Fons primus
[Back to top]

Laus ap

Quid stultius est quam in homine aliena laudare? Quid eo demencius qui ea miratur que ad alium transferri protinus possunt? Nemo gloriari nisi de suo debet.

Seneca ibidem.

Varia
Fons primus
[Back to top]

Laus aq

Lauda parce, uitupera parcius. Similiter enim reprehensibilis est nimia laudatio ut immoderata uituperatio; illa siquidem adulatione, ista malignitate suspecta est. Testimonium ueritati, non amicicie reddas.

Seneca in epistola.

Varia
Fons primus
[Back to top]

Laus ar

Sit tibi tam triste laudari a turpibus quam si lauderis ob turpia. Letior esto quociens displices malis et malorum de te estimationes prauas ueram tibi laudationem ascribe. Sectator enim epularum non de bene uiuente, sed de bene pascente laudabilem profert sentenciam.

Seneca de quattuor uirtutibus et in quadam epistola.

Varia
Fontes primi
cf. Conuicium q
[Back to top]

Laus as

Nolo, nolo laudes me. Nolo dicas: O magnum uirum, contempsit omnia et dampnatis humane uite furoribus fugit! Nichil dampnaui nisi me. Non est quod proficiendi causa uenire ad me uelis. Erras qui hinc aliquid auxilii speras; non medicus sed eger hic habitat. Malo illa cum discesseris dicas: Ego istum bonum hominem putabam et eruditum; erexeram aures: Destitutus sum; nichil uidi, nichil audiui quod concupiscerem ad quod reuerterer. Cum secesseris, non est agendum hoc ut de te homines loquantur, sed ut ipse tecum loquaris. Quid autem loqueris? Quod homines de aliis libentissime faciunt, de te apud te male existima.

Seneca LXIX. epistola.

Varia
Fons primus
[Back to top]

Laus at

Bonum est laudari, sed prestancius est esse laudabilem. Neminem cito laudaueris; neminem cito accusaueris. Vicium est omnia credere; uicium est nichil credere.

Seneca libro de moribus.

Varia
Fons primus
[Back to top]

Laus au

Parua laude dignus est qui tantum miseris antefertur. Lasciuia et laus nunquam habent concordiam. Quam magnum est nolle laudari et esse laudabilem!

Seneca in prouerbiis.

Varia
Fontes primi
[Back to top]

Ubi

ADULACIO
Consciencia a, Consciencia d
Conuicium b, Conuicium i (1), Conuicium i (2)
Deus p
Elemosina r
Eloquencia a
FAMA
FAUOR
Gloria bona d
Honor u
Ieiunium ak
Prelacio ar
Sanctitas t, Sanctitas y, Sanctitas z
Superbia e
Virtus z

Varia