Pax a

Pax est serenitas mentis, tranquillitas animi, simplicitas cordis, uinculum amoris, consorcium caritatis. Hec est que simultates tollit, bella compescit, iras comprimit, superbos calcat, humiles amat, discordes sedat, inimicos concordat; cunctis est placida. Nescit extolli, nescit inflari. Hanc qui accepit teneat, qui perdidit repetat, qui amisit exquirat; quoniam qui in eadem non erit inuentus a Patre abdicatur, a Filio exheredatur, nichilominus a Spiritu Sancto alienus efficitur, nec ad hereditatem Domini poterit peruenire, qui testamentum pacis noluerit obseruare.

Augustinus de uerbis Domini CLVIII.

Varia
Fons primus
[Back to top]

Pax b

Concorda cum aduersario tuo. Nescis quando uia finiatur; cum uia finita fuerit, iudex restat et minister et carcer. Ac si seruaueris aduersario tuo bonam uoluntatem et cum eo consenseris, pro iudice inuenies Patrem, pro ministro seuo angelum tollentem in sinu Abrahee, pro carcere paradisum.

Augustinus de uerbis Domini capitulo I.

Varia
Fons primus
[Back to top]

Pax c

Tale bonum est bonum pacis, ut in rebus creatis nichil graciosius solet audiri, nichil delectabilius concupisci, et nichil utilius possideri. Spiritus enim humanus numquam uiuificat membra nisi fuerint unita; sic Spiritus Sanctus numquam uiuificat ecclesie membra nisi fuerint in pace unita.

Augustinus de ciuitate Dei.

Varia
Fons primus
[Back to top]

Pax d

Quisquis uel quod potest arguendo corrigit, uel quod non potest corrigere saluo pacis uinculo excludit, uel quod saluo pacis uinculo excludere non potest, equitate improbat, firmitate supportat; hic est pacificus.

Augustinus contra epistolam Parmeniani libro II.

Varia
Fons primus
[Back to top]

Pax e

Due sunt amice iusticia et pax. Tu forte unam uis et alteram non facis. Nemo enim est qui non uult pacem, sed non omnes uolunt operari iusticiam. Interroga omnes homines: Vis pacem? Vno ore respondet tibi genus humanum: opto, cupio, amo, uolo. Ama iusticiam quia due amice sunt iusticia et pax; ipse se osculantur. Si amicam pacis non amaueris, non te amabit ipsa pax, nec ueniet ad te.

Augustinus super illud Psalmi LXXXIIII.: Iusticia et pax osculate sunt.

Varia
Fons primus
[Back to top]

Pax f

Infelix populus Dei non potest in bono tantam habere concordiam, quantam mali habent in malo.

Ieronymus super Psalmum LXXXII.: Quoniam cogitauerunt unanimiter et cetera.

Varia
Fons primus
[Back to top]

Pax g

Inde nobis cum Deo pax robustior oritur, unde nobis ab aduersariis durior pugna generatur.

Gregorius in moralis.

Varia
Fons primus
[Back to top]

Pax h

Nemo uires suas in pace cognoscit. Si enim bella desunt, uirtutum experimenta non prodeunt.

Gregorius ibidem.

Varia
Fons primus
[Back to top]

Pax i

Si Dei uocantur filii qui pacem faciunt, proculdubio Sathane sunt filii qui confundunt.

Gregorius in pastorali.

Varia
Fons primus
[Back to top]

Pax k

Cum pro re terrena pax a corde cum proximo scinditur, liquido apparet quia res plusquam proximus amatur. Certum est quod minus diligit ereptorem suum qui minus intelligit periculum suum quod euasit, et uile solacium defensoris deputat qui uirtutem aduersarii debilem putat.

Gregorius in omelia.

Varia
Fons primus
[Back to top]

Pax l

Sicut multum nocet si unitas desit bonis, ita ualde est noxium si non desit malis. Si ergo peruersorum nequicia in pace iungitur, profecto eorum malis actibus robur augetur, quia quo sibi in malicia congruunt, eo se robustius bonorum afflictionibus illidunt.

Gregorius in pastorali.

Varia
Fons primus
[Back to top]

Pax m

Melior est talis pugna que Deo proximum facit, quam pax illa que separat a Deo.

Gregorius Nazazenus in apologetico.

Varia
Fons primus
[Back to top]

Pax n

Ne timeas contra caritatem esse, si unius scandalum multorum recompensaueris pace. Melius est enim ut pereat unus quam unitas.

Bernardus in epistola.

Varia
Fons primus
[Back to top]

Pax o

Pax hominibus bone uoluntatis. Non bone sed plane inique uoluntatis est qui nequaquam pace contentus, superbo oculo et insaciabili corde inquietus hanelat ad gloriam mundi, nec pacem perinde retinens, nec gloriam apprehendens.

Bernardus super Cantica.

Varia
Fons primus
[Back to top]

Pax p

In tantum humane pacis Christus studuit concordie, ut unitatis merito omnia que a Deo precanda sunt impetranda esse confirmet, et ubi duo uel tres pari spiritu et uoluntate collecti sunt, ibi se medium eorum pollicetur futurum.

Ylarius super Mattheum.

Varia
Fons primus
[Back to top]

Pax q

Concordia malorum contraria est bonorum, et sicut optandum est ut boni pacem habeant ad inuicem, ita optandum est ut mali sint discordes. Impeditur enim iter bonorum si unitas non diuiditur malorum.

Ysidorus de summo bono libro III.

Varia
Fons primus
[Back to top]

Pax r

Pax que de ore predicatoris offertur, aut requiescit in domo, si in ea fuerit filius pacis, aut ad eum predicatorem reuertitur tanquam fructus.

Rabanus super illud Matthei X.: Pax uestra ad uos reuertetur.

Varia
Fons primus
[Back to top]

Pax s

Tunc est uera pax hominis et uera libertas, quando et caro animo iudice regitur, et animus Deo preside gubernatur.

Leo in sermone.

Varia
Fons primus
[Back to top]

Pax t

Hec est uera pax a Dei uoluntate non diuidi et in hiis que solius Dei sunt delectari. Quando enim sensualitas nulla parte resistit uoluntati et uoluntas nulla parte contradicit racioni, tunc est serenitas mentis et tunc est regnum Dei.

Leo ibidem.

Varia
Fons primus
[Back to top]

Pax u

False pacis tres sunt species; est enim pax estimata, pax simulata, pax imperata. Dum enim inter seculares pacem querimus, dum discordes ad concordiam reuocamus, estimant seculares quod pacem inter nos habemus, dum in uestimentis ouium foras eximus et intus quasi lupi rapaces gregem simplicem fratrum lacerando dispergimus, pacem simulamus sed non habemus. Dum uero prelati subditis imperant, et eos discipline legibus non coartant, solum modo pacem docent et non tenent. Estimant pacem seculares, simulant peruersi claustrales, imperant et non tenent tepidi pastores. Sic igitur estimatur a nescientibus, simulatur a non habentibus, imperatur a non tenentibus; sed uere pacis tres sunt species, scilicet pax probata, pax confirmata, pax certa.

Hugo de claustro anime libro III., capitulo IX.

Varia
Fons primus
[Back to top]

Pax x

Lingua quandoque pacem predicat sed sepius turbat; cum autem habitus cor et lingua concordant, pacem seruant. Vbi uero lingua dissoluta discurrit, pacem soluit.

Hugo ibidem.

Varia
Fons primus
[Back to top]

Pax y

Pax est concordacium in bono animorum ordinata tranquillitas.

Cassiodorus super Psalmos.

Varia
Fons primus
[Back to top]

Pax z

Pax uera est concordiam habere cum moribus probis et litigare cum uiciis.

Cassiodorus super illud Psalmorum: Et factus est in pace locus eius.

Varia
Fons primus
[Back to top]

Pax ab

Cum enim peccatores uidentur locupletes, multisque dominari populis et in mundo non quod timeant, pacem habere putantur; sed pax ista cum consciencia semper litigat, rixatur intrinsecus, et cum hostem non habeat, secum decertat.

Cassiodorus super Psalmum LXXII.

Varia
Fons primus
[Back to top]

Pax ac

Habeatis unitatem spiritus in uinculo pacis, nec inueniri potest forma expressior conuersacionis angelice quam unitas socialis.

Cassiodorus super Psalmos.

Varia
Fons primus
[Back to top]

Pax ad

In hoc enim gracia regis extollitur et seruatur, si in equitate pacis populum dirigat et in iusticie uigore conseruet. Hec enim est bonarum artium mater decora, hec mortalium genus reparabili successione multiplicans facultates protendit, mores excollit; et tantarum rerum ignarus cognoscitur qui eam minime quesisse sentitur.

Cassiodorus libro I., epistola I.

Varia
Fontes primi
[Back to top]

Pax ae

Decet regalis apicis curam generalitatis custodire concordiam quoniam ad laudem regnantis trahitur si ab omnibus pax ametur. Quid est enim quod principem melius predicet quam quietus populus, concors senatus, et tota res publica morum honestate uestita?

Cassiodorus ibidem epistola XXII.

Varia
Fons primus
[Back to top]

Pax af

Quietissimam uitam agerent homines in terra si hec duo uerba a natura rerum omnium tollerentur: meum et tuum.

Seneca in libro de moribus.

Varia
Fons primus
[Back to top]

Pax ag

Nosti ne igitur quod omne quod est tamdiu manere atque subsistere, quamdiu sit unum sed interire atque dissolui pariter quando unum esse destiterit?

Boecius III. de consolacione.

Varia
Fons primus
[Back to top]

Ubi

Bellum h, Bellum ah
DISCORDIA
Gaudium o
Regimen ah
Solitudo t, Solitudo ab
Temptatio o

Varia