Consolacio a

Consuetudo quasi secunda et quasi affabricata natura dicitur.

Augustinus libro VI. de musica.

Varia
Fons primus
[Back to top]

Consolacio b

Solet recta opinio prauam corrigere consuetudinem et praua opinio rectam deprauare naturam.

Augustinus de doctrina Christiana.

Varia
Fons primus
[Back to top]

Consolacio c

Canem currentem in agro post leporem, si casu transeam et inspecto auertit me fortassis ab aliqua magna cogitacione atque ad se conuertit illa uenacio, et nisi iam michi demonstrata infirmitate mea cito ammoneas, uanus ebesco.

Augustinus X. libro confessionum.

Varia
Fons primus
[Back to top]

Consolacio d

Consolacio mitis debet esse non aspera que magis dolorem leniat; feruorem mitiget quam commocionem excitet.

Ambrosius in libro de Ioseph.

Varia
Fons primus
[Back to top]

Consolacio e

Paupertatem times sed beatos pauperes Christus appellat. Labore terreris, nemo athleta sine sudoribus coronatur. De cibo cogitas sed fides famem non timet. Deus ipse omnium rector ac Dominus cum omni angelorum milicia certamen tuum expectat, tibi contra dyabolum dimicanti parat eternitatis coronam.

Ieronymus in quadam epistola.

Varia
Fontes primi
cf. Tempatio i
[Back to top]

Consolacio f

Non plangam cum Iacob et Dauid filios in lege morituros, sed cum Christo in euangelio suscipiam resurgentes; Iudeorum luctus Christianorum gaudium est. Vnde Moyses moriens plangitur, Iesus absque funere et lacrimis in monte non sepelitur. Ad uesperum demorabitur fletus et ad matutinum leticia.

Ieronymus ad Heliodorum de morte Nepociani presbyteri.

Varia
Fons primus
[Back to top]

Consolacio g

Cum uolumus afflictum quempium a merore suspendere, ordo consolacionis est ut studeamus prius merendo eius luctui concordare. Dolentem non potest consolari qui non concordat dolori, quia eo ipso quo a merentis afflictione discrepat, minus ab illo recipitur cui mentis qualitate separatur. Sed emolliri prius debet animus ut afflicto congruat, congruens inhereat, inherens trahat. Nec ferrum ferro coniungitur si non utrumque exustione ignis liquetur; durum molli non adheret nisi prius eius duricia mollescat. Sic nec iacentem erigimus nisi a rigore nostri status inclinemur quia dum rectitudo stantis a iacente discrepat eum cui condescendere negligit, nequaquam leuat.

Gregorius libro III. moralium.

Varia
Fons primus
[Back to top]

Consolacio h

Magna est consolacio in eo quod displicet quod ordinante illo erga nos agitur, cui non nisi iustum placet.

Gregorius libro II. moralium super illud: Dominus dedit, Dominus abstulit.

Varia
Fons primus
[Back to top]

Consolacio i

Festina consolacio bonorum, consideratus finis malorum. Dum enim ex eorum interitu malum conspiciunt quod euadunt, leue existimant quicquid aduersum in hac uita paciuntur.

Gregorius libro XXI. moralium super illud Iob: Perdicio est iniquo et cetera.

Varia
Fons primus
[Back to top]

Consolacio k

Facilis erit consolacio si inter flagella que patimur, que fecimus ad memoriam delicta reuocamus. Atque hec iam non flagella sed dona esse conspicimus si que carnis delectacione peccamus, carnis dolere purgamus.

Gregorius in registro.

Varia
Fons primus
[Back to top]

Consolacio l

Non sis miser ante tempus cum illa que uelut imminencia expauisti fortasse nunquam uentura sint, certe non uenerunt. Quedam ergo nos magis torquent quam deberent, quedam ante torquent quam debent, quedam torquent cum omnino non debeant, aut augemus dolorem aut fingimus aut preoccupamus. Si enim futurum est, quid iuuat dolori suo occurrere? Satis cito dolebis cum uenerit; interim tibi meliora promitte. Aliquando gladius ab ipsa ceruice reuocatus est, et aliquis carnifici suo superstes fuit.

(auctor non nominatus)

Varia
Fons primus
[Back to top]

Consolacio m

Sepe enim nullis apparentibus signis que mali aliquid prenuncient animus sibi falsas ymagines fingit, aut uerbum aliquod dubie significacionis detorquet in peius, aut maiorem sibi offensam proponit alicuius quam est, et cogitat non quam iratus ille sit, sed quantum liceat irato.

Seneca XIII. epistola.

Varia
Fons primus
[Back to top]

Consolacio n

Quicquid fieri potest quasi futurum. Cogitemus circumcidenda duo sunt: et futuri timor et ueteris incommodi memoria; hoc ad me iam non pertinet, illud nondum. Grata superueniet que non sperabitur hora.

Seneca LXXIX. epistola.

Varia
Fons primus
[Back to top]

Consolacio o

Noli mala tua facere tibi grauiora et te querelis onerare. Leuis dolor est si nil illi opinio adiecerit; econtra si te exhortari ceperis ac dicere, nichil est aut certe exiguum est; duremus; iam desinet, leuem illum dum putas facies. Omnia ex opinione suspensa sunt; tam miser quisque quam credit.

Seneca LXXXVIII. epistola.

Varia
Fons primus
[Back to top]

Consolacio p

Socrates cum ex amicis quemdam grauiter merentem uideret, in arcem perduxit hortatusque est ut per omnes subiectorum edificiorum partes oculos circumferret, quo facto: cogita nunc tecum, inquit, quam multi luctus sub hiis tectis et olim fuerunt hodieque uersentur insequentibus seculis sint habituri, ac mite mortalium incommoda tanquam propria deflere.

Valerius libro VII. de memorabilibus dictis.

Varia
Fons primus
[Back to top]

Consolacio q

Numerum conuiuarum incipere oportet a graciarum numero et progredi ad numerum musarum, id est proficisci a tribus et consistere in nouem, ut non sint pauciores quam tres nec plures quam nouem. Non conuenit enim multos esse eo quod turba est plerumque turbulenta; nec loquaces, inquit, conuiuas nec mutos eligere oportet quia eloquencia in foro, silencium uero non in conuiuio sed in cubilio. Sermones igitur illius temporis habendos non de rebus anxiis, non tortuosis, sed ex quibus ingenium uenustans fiat et amenius et cum quadam uoluptate utiles.

Agellius libro XV.

Varia
Fontes proximus et primus
[Back to top]

Ubi

Amicicia l, Amicicia af
AMISSIO
Consciencia f
Dolor b, Dolor d, Dolor g, Dolor i
Gaudium e
Mors bu, Mors bz
Paupertas o
Sapiencia al
Studium al Timor ab, Timor ac, Timor ad, Timor ae
Tribulacio n, Tribulacio p, Tribulacio z

Varia