Humilitas a

Discite a me non mundum fabricare, non cuncta uisibilia et inuisibilia creare, non in ipso mundo miracula facere et mortuos suscitare, sed quoniam mitis sum et humilis corde. Cogitas magnam fabricam constituere celsitudinis de fundamento prius cogita humilitatis.

Augustinus de uerbis Domini.

Varia
Fons primus
[Back to top]

______________________________

Omnes delectat celsitudo, sed humilitas gradus est. Quid tendis pedem ultra te? Cadere uis non ascendere; a gradu incipe et ascendisti.

Augustinus de uerbis Domini.

Varia
Fons primus
[Back to top]

Humilitas b

O medicinam omnibus consulentem, omnia tumencia comprimentem, omnia tabescencia reficientem, omnia superflua resecantem, omnia deprauata corrigentem! Que superbia sanari potest, si humilitate filii Dei non sanatur? Que auaricia sanari potest, si paupertate filii Dei non sanatur? Que iracundia sanari potest, si paciencia filii Dei non sanatur?

Augustinus ibidem.

Varia
Fons primus
[Back to top]

Humilitas c

Non aliam tibi ad capescendam et obtinendam ueritatis uiam munias, quam que munita est ab illo, qui gressuum nostrorum tanquam Deus uidit infirmitatem. Ea autem prima est humilitas, secunda humilitas, tercia humilitas et, quociens interrogares, hoc dicerem. Alludens dicto cuiusdam petentis a quodam philosopho, quod esset melius in rethorica respondens: prima eloquencia, secunda eloquencia, tercia eloquencia, et sic et cetera.

Augustinus in epistola ad Dyascorum.

Varia
Fons primus
[Back to top]

Humilitas d

Excelsa est patria, humilis est uia. Ergo qui querit patriam, quid recusat uiam?

Augustinus super Iohannem.

Varia
Fons primus
[Back to top]

Humilitas e

Qui paupertate contentus est non est contentus iniuria, et qui potest ferre uerberum penas exagitatur uerbo contumelie, et qui potest administraciones contempnere, dolet sibi aliquem honorificencia esse prelatum. Grande est in omnibus tenere humilitatis mensuras.

Ambrosius super Psalmos.

Varia
Fons primus
[Back to top]

Humilitas f

Bona humilitas, que nichil appetendo totum quod contempnit, adipiscitur.

Ambrosius ibidem.

Varia
Fons primus
[Back to top]

Humilitas g

Nichil excelsius humilitate, que quasi superior nescit extolli, quia nemo id affectat, quod infra se iudicat.

Ambrosius super Lucam libro VII.

Varia
Fons primus
[Back to top]

Humilitas h

Quisquis cupit diuinitatis tenere fastigia, humilitatis yma sectetur. Quicumque uult fratrem preuenire regnando, prius illum preueniat obsequendo, sicut ait Apostolus: Honore inuicem preuenientes. Vincat eum officiis, ut possit uincere sanctitate. Si enim te non lesit frater, obsequium meretur ut diligas; quod si forsitan lesit, magis obsequium meretur ut uincas. Hec enim nostre Christianitatis summa est, ut amantibus uicissitudinem ledentibus pacienciam rependamus. Qui ergo fuerit pacientior ad iniuriam, potentior constituetur in regno.

Ambrosius in sermone quodam.

Varia
Fons primus
[Back to top]

Humilitas i

Non indocta humilitas, sed que habeat sui modestiam et scienciam, laudatur. Scio humiliari, id est in quo loco, qua moderacione, quo fine, in quo officio, in quo munere. Nesciuit phariseus humiliari, ideo deiectus est.

Ambrosius libro de officiis.

Varia
Fons primus
[Back to top]

Humilitas k

Nichil que est quod nos ita et hominibus gratos et Deo faciat, quam si uite merito magne humilitatis infimi sumus. Humilitatem sequere, non que ostenditur atque simulatur gestu corporis aut fracta uoce uerborum, sed que puro cordis affectu exprimitur. Aliud enim est uirtutem habere, aliud uirtutis similitudinem. Multo illa deformior est superbia, que sub quibusdam humilitatis signis latet. Nescio enim quomodo turpiora sunt uicia, cum uirtutum specie celantur.

Ieronymus ad Cellanciam.

Varia
Fons primus
[Back to top]

Humilitas l

Humilitas sola est obseruatrix custosque uirtutum, et nichil est quod ita Deo gratum faciat et hominibus, quam si uite merito magni, sed humilitate infimi uideamur.

Ieronymus super Mattheum XIX.

Varia
Fons primus
[Back to top]

Humilitas m

Tanto fit quisque uilior Deo, quanto preciosior sibi; tanto preciosior Deo, quanto propter eum uilior sibi.

Gregorius libro XVIII. moralium.

Varia
Fons primus
[Back to top]

Humilitas n

Cum per tentacionem humilitas proficit, prospera est ipsa aduersitas, que mentem ab elacione custodit.

Gregorius libro XXVI. moralium.

Varia
Fons primus
[Back to top]

Humilitas o

Quia origo uirtutis humilitas est, illa in nobis uirtus ueraciter pululat, que in radice propria, id est in humilitate, perdurat. A qua nimirum, si absciditur, arescit, quia uiuificantem se in infimis humorem caritatis perdit.

Gregorius libro XXVII. moralium.

Varia
Fons primus
[Back to top]

Humilitas p

Qui sine humilitate uirtutes congregat, in uentum puluerem portat.

Gregorius in omelia VII.

Varia
Fons primus
[Back to top]

Humilitas q

Certe si nos cuiuspiam seruus rogaret, ut ad eum ire deberemus, protinus nobis nostra superbia in cogitacione tacita responderet, dicens: Non eas quia temetipsum degeneras, honor tuus despicitur, locus uilescit. Ecce de celo uenit qui seruo in terra occurrere non despicit, et tamen humiliari in terra contempnimus qui de terra sumus.

Gregorius omelia XXVIII.

Varia
Fons primus
[Back to top]

Humilitas r

Ecce odor filii mei sicut odor agri pleni. Aliter olet flos uue, quia magna est uirtus et opinio predicatorum, qui inebriant mentes audiencium, aliter flos oliue quia suaue est opus misericordie quod refouet et lucet, aliter flos rose quia mira est fragrancia, que rutilat et redolet ex cruore martirum, aliter flos lilii quia candida uita carnis de incorrupcione uirginitatis, aliter flos uiole quia uirtus humilium, qui ultima loca tenentes per humilitatem se a terra in altum non subleuant, et celestis regni purpuram in mente seruant, aliter redolet spica cum ad maturitatem perducitur, quia bonorum operum perfectio ad sacietatem eorum, qui esuriunt iusticiam preparatur.

Gregorius super Iozechielem.

Varia
Fons primus
[Back to top]

Humilitas s

Humilitas uera est, qua quis de se parua estimat, et bona alterius sine inuidia et liuore commendat.

Gregorius.

Varia
Fons primus
[Back to top]

Humilitas t

Describitur Iob temptacione auctus sed non temptacione prostratus, ut et maiorum uirtus spem nostram foueat, et maiorum casus ad cautelam nos humilitatis attingat. Quatenus dum illa gaudentes subleuant, ista metuentes premunt.

Gregorius in moralibus.

Varia
Fons primus
[Back to top]

Humilitas u

Quisquis nunc sponte sese non humiliat, nequaquam hunc sequens gloria exaltat.

Gregorius libro VIII. moralium.

Varia
Fons primus
[Back to top]

Humilitas x

Perit omne quod agitur, si non in humilitate custoditur.

Ibidem.

Varia
Fons primus
[Back to top]

Humilitas y

Humilitas est uirtus, qua homo uerissima sui cognicione sibimetipsi uilescit.

Bernardus de duodecim gradibus humilitatis.

Varia
Fons primus
[Back to top]

Humilitas z

Non magnum est esse humilem in abiectione, magna prorsus et rara uirtus humilitas honorata.

Bernardus super Missus est.

Varia
Fons primus
[Back to top]

Humilitas ab

Gloriosa res humilitas, qua ipsa quoque superbia palliare se appetit, ne uilescat.

Bernardus ibidem.

Varia
Fons primus
[Back to top]

Humilitas ac

Cum ex aliis quibusque bonis uirium magis suarum capere soleat incrementum superbia, sola humilitas omnium propugnaculum turrisque uirtutum eius forsitan resistit malicie, obuiat presumptioni.

Bernardus in epistola.

Varia
Fons primus
[Back to top]

Humilitas ad

Bona humilitas, que et in presenti ab huius mordacibus curis mentem facit esse quietam, et a minacibus penis in futuro securam reddit conscienciam. Humiliacio uia est ad humilitatem sicut paciencia ad pacem, sicut lectio ad scienciam. Si ergo uirtutem appetis humilitatis, uiam non refugias humiliacionis. Solus qui uere humilis est, parcit anime sue, qui ne putetur quod non est, semper quantum in se est, uult nesciri quod est.

Bernardus ibidem.

Varia
Fontes primi
[Back to top]

Humilitas ae

Humilis debet esse et uerecunda satisfactio, qua emendatur superba transgressio. Nec sterilis uerecundia grata est, nec humilitas preter ueritatem laudabilis.

Bernardus super Cantica.

Varia
Fontes primi
[Back to top]

Humilitas af

Oportet humiliter sentire de se nitentem ad altiora, ne dum supra se attollitur, cadat a se, nisi in se firmiter per ueram humilitatem fuerit solidatus, quia nisi humilitatis merito maxima minime optinentur.

Bernardus ibidem.

Varia
Fons primus
[Back to top]

Humilitas ag

Cum te humiliari uideris, habeto id signum in bonum omnino argumentum gracie propinquantis. Alii cum rancore humiliantur, alii pacienter, alii et libenter. Primi rei sunt, sequentes innoxii, ultimi iusti.

Bernardus ibidem.

Varia
Fons primus
[Back to top]

Humilitas ah

Est humilitas quam ueritas nobis parit, et non habet calorem, et est humilitas quam caritas format et inflammat. Hec quidem in affectu, illa in cognicione consistit. In eo qui grauiter peccauit, et si amanda, non tamen admiranda humilitas. Sed si quis innocenciam retinet et nichilominus humilitatem iungit, nonne is tibi uidetur geminum anime possidere decorem? Rara auis in terris, aut sanctitatem non perdere, aut humilitatem sanctimonia non excludi; et ideo beata que utramque retinuit.

Bernardus super Cantica sermone XLV.

Varia
Fontes proximus et primus
[Back to top]

Humilitas ai

Fode in te fundamentum humilitatis, et peruenies ad fastigium caritatis. Vis capere celsitudinem Dei? Cape prius humilitatem Christi. Sola est uirtus humilitatis lese caritatis reparacio.

Bernardus in epistolis.

Varia
Fons primus
[Back to top]

Humilitas ak

Nulla splendidior gemma in omni precipue ornatu summi pontificis quam humilitas. Nempe si amittetur illa, uirtutum aggregacio non nisi ruina est.

Bernardus ibidem.

Varia
Fons primus
[Back to top]

Humilitas al

Sola que non solet gloriari, non nouit presumere, contendere non consueuit, graciam inuentura est in oculis pietatis humilitas. Non contendit iudicio, non pretendit iusticiam, qui uero humilis est.

Bernardus in epistola XLII.

Varia
Fons primus
[Back to top]

Humilitas am

Velle esse super omnes uituperabile est. Sustinere autem alterum super se nimis est gloriosum.

Crisostomus super Mattheum omelia III.

Varia
Fons primus
[Back to top]

Humilitas an

Qui humilis est corde, et indigniorem se aliis arbitratur, nunquam desiderat superior apparere. Primatus enim fugientem se desiderat, desiderantem se horret.

Crisostomus.

Varia
Fons primus
[Back to top]

Humilitas ao

Quisquis gradum proprie celsitudinis amat, humilitatis cultum in moribus diligentissime teneat. Nam qui ab humilitatis operibus recedit, a dignitatis fastigio tumoris pondere cadit.

Crisostomus in suo policraticio libro IIII.

Varia
Fons primus
[Back to top]

Humilitas ap

Discite a me quia mitis sum et humilis corde, et inuenietis requiem animabus uestris. Ecce mel humilitatis cum dulcedine mansuetudinis. Sicut enim mel concordat in confectionibus medicine cum omnibus diuersitatibus specierum, sic ex humilitatis dulcedine condiuntur omnia genera uirtutum.

Hugo libro III. de claustro anime.

Varia
Fons primus
[Back to top]

Humilitas aq

Humilitas est ex intuitu proprie condicionis, uel conditoris, uoluntaria mentis inclinacio.

Hugo.

Varia
Fons primus
[Back to top]

Humilitas ar

Nullo modo poterit in anima nostra uirtutum structura consurgere, nisi prius iactata fuerint uere humilitatis in corde nostro fundamenta, que firmissime collocata perfectionis et caritatis culmen ualeant sustinere.

Iohannes Cassianus libro XII. de spiritu superbie.

Varia
Fons primus
[Back to top]

Humilitas as

Vera discrecio non nisi uera humilitate acquiritur. Cuius humilitatis hec erit prima probacio, si uniuersa non solum que agenda sunt, sed eciam que cogitantur, reseruantur seniorum examini, ut nichil quis suo iudicio credens illorum per omnia diffinicionibus acquiescat, et quid bonum uel malum debeat iudicare, eorum tradicione cognoscat.

In collacionibus patrum collacione Moysi.

Varia
Fons primus
[Back to top]

Humilitas at

Humilitas in paupere grata est, in diuite gloriosa; humilitas inter inimicos blanda, superbia uero inter amicos ingrata. Blanda est et officiosa semper humilitas in amiciciis grata, in contumeliis ociosa. Non extollitur prosperis, non mutatur aduersis, non extorquet seruicium, non requirit uoces adulancium, nisi qui se laudacione nouit indignum.

Valerius episcopus in quodam sermone.

Varia
Fons primus
[Back to top]

Humilitas au

Tria sunt que radicata nutriunt humilitatem, scilicet assiduitas subiectionis, consideracio proprie fragilitatis, et consideracio rei melioris.

Basilius in exameron.

Varia
Fons primus
[Back to top]

Humilitas ax

Erubescant elati, ubi credunt locum habere superbiam, cum celum et terram ab humilitate uideant occupatam.

Cassiodorus super illud Psalmi: Et humilia respicit et cetera.

Varia
Fons primus
[Back to top]

Humilitas ay

Per humilitatem membra Christi sciunt dyaboli uicisse superbiam. Per hanc fideles supra regna proficiunt, per hanc superbia tyrannica superatur, per hanc in eternum martyres coronantur, nec potest dici perfectus, qui hac uirtute est priuatus.

Cassiodorus super illud Psalmi: Humiliatus sum usque quaque.

Varia
Fons primus
[Back to top]

Ubi

Confessio l
Consciencia i
CONSIDERACIO
Contemplacio b
Correctio aq, Correctio ar
Exemplum ac
Honor k
Iuuentus b
Laus l
Maria al
Modestia h
Paupertas t
Periculum c
Predicacio au
Prelacio ar
Sapiencia o
Superbia i, Superbia ak, Superbia ba
Voluntas ah

Varia