Luxuria a

Luxuria non est uicium corporum pulcrorum uel suauium sed anime peruerse amantis corporeas uoluptates neglecta temperancia quo aptamur spiritualibus.

Augustinus XII. de ciuitate Dei.

Varia
Fons primus
[Back to top]

Luxuria b

Cur te in uoluptate tua modo non dilatas cum te quid sequatur ignoras? Acceptum tempus in desideriis perdere non debes quia quam cicius pertranseant nescis. Si enim Deus misceri hominem in uoluptate carnis nollet, in ipso humani generis exordio masculum et feminam non fecisset.

Augustinus libro de conflictu uiciorum.

Varia
Fontes proximus et primus
[Back to top]

Luxuria c

Quanti et quales episcopi et clerici post confessionum et uictoriarum calcata certamina, post magnalia et signa mirabilia usque quaque monstrata noscuntur cum hiis omnibus naufragasse, cum uolunt in naui fragili nauigare? Quantos leones domuit una infirmitas, id est luxuria, delicata que cum sit uilis et misera de magnis efficit predam?

Augustinus de singularitate clericorum.

Varia
Fons primus
cf. Mulier e
[Back to top]

Luxuria d

Commixtio sororum et fratrum quanto fuit antiquior compellente necessitate, tanto postea facta est dampnabilior religione prohibente.

Augustinus XV. de ciuitate Dei.

Varia
Fontes proximus et primi
[Back to top]

Luxuria e

Sicut iniquum est auiditate possidendi transgredi limitem agrorum, ita eciam iniquum est libidine concumbendi subuertere limitem morum.

Augustinus ibidem.

Varia
Fontes proximus et primus
[Back to top]

______________________________

Luxuria inimica Deo, inimica uirtutibus perdit omnem substanciam et ad presens uoluntatem deliniens; futuram non sinit cogitare paupertatem.

Augustinus de doctrina Christiana.

Varia
Fontes proximus et primus
[Back to top]

Luxuria f

Ex uoluntate peruersa facta est libido, et dum seruitur libidini facta est consuetudo, et dum consuetudini non resistitur facta est necessitas.

Augustinus libro confessionum.

Varia
Fons primus
[Back to top]

Luxuria g

Qui luxuriatur uiuens mortuus est, eciam ferreas mentes libido domat que maiorem in uirginibus patitur famem, dum dulcius putant omne quod nesciunt.

Ieronymus in epistola matri et filie.

Varia
Fontes primi
[Back to top]

Luxuria h

O quam acerbus fructus luxurie, amarior felle, crudelior gladio!

Ieronymus in epistola.

Varia
Fons primus
[Back to top]

Luxuria i

Libido enim transacta semper sui relinquit penitudinem et nunquam saciatur et extincta reaccenditur; usu crescit et deficit, nec racioni paret que impetu ducitur.

Ieronymus in quadam epistola.

Varia
Fons primus
[Back to top]

Luxuria k

O ignis infernalis luxuria, cuius materia gula, cuius flamma superbia, cuius scintille praua colloquia, cuius fumus infamia, cuius cinis inopia, cuius finis gehenna!

Ieronymus.

Varia
Fons primus
[Back to top]

Luxuria l

Quelibet alia fuerint bona opera, si luxurie scelus non abluitur, immensitate huius criminis obruuntur.

Gregorius libro XXI. moralium.

Varia
Fons primus
[Back to top]

Luxuria m

Malum luxurie aut cogitacione perpetratur aut opere. Callidus enim aduersarius noster cum ab effectu operis expellitur, secreta cogitacione polluere nititur.

Gregorius ibidem.

Varia
Fons primus
[Back to top]

Luxuria n

Ex quo luxuria semel mentem alicuius occupauerit, uix eum bona desideria cogitare permittit. Sunt enim uiscosa desideria quia ex suggestione oritur cogitacio, ex cogitacione affectio, ex affectione delectacio, ex delectacione consensus, ex consensu operacio, ex operacione consuetudo, ex consuetudine desperacio, ex desperacione peccati defensio, ex defensione gloriacio, ex gloriacione dampnacio.

Gregorius in moralibus.

Varia
Fons nondum repertus
[Back to top]

Luxuria o

Alia est carnis luxuria qua castitatem corrumpimus, alia cordis est qua de castitate gloriamur.

Bernardus in sermone.

Varia
Fons primus
[Back to top]

Luxuria p

Luxurie currus quadriga uoluitur uiciorum, ingluuie uidelicet uentris, libidine coitus, mollicie uestium, ocii saporisque resolucione. Trahitur equis eque duobus: prosperitate uite et rerum habundancia; et qui hiis president duo: ignauie torpor et infida securitas.

Bernardus super Cantica.

Varia
Fons primus
[Back to top]

Luxuria q

Vicium libidinis facile ex uacancia et ocio nascitur, nam diffinicio amoris hec est: anime uacantis passio. Ideo dicit poeta: ocia si tollas periere cupidinis artes.

Chrysostomus super Mattheum.

Varia
Fontes primi
[Back to top]

Luxuria r

Tam diu spiritu fornicacionis animam necesse est impugnari, donec se bellum gerere supra uires agnoscat, nec labore uel studio proprio uictoriam optinere se posse nisi Domini fuerit auxilio ac protectione suffulta.

Iohannes Cassianus ex collacione abbatis Moysi.

Varia
Fons primus
[Back to top]

Luxuria s

Breuis est uoluptas fornicacionis sed perpetua pena fornicatoris.

Beda de templo Salomonis.

Varia
Fons primus
[Back to top]

Luxuria t

Luxuria est immoderata carnis petulancia, dulce uenenum, importuna lues, perniciosa pocio, que humanum corpus debilitat et uirilis animi robur eneruat.

Hugo.

Varia
Fons primus
[Back to top]

Luxuria u

Petulancia est ex carnalium cogitationum conceptione tocius corporis pecudialis hebitudo.

Hugo.

Varia
Fontes proximus et primus
[Back to top]

Luxuria x

Venus est illecebrosa uoluptas, adulterina iocunditas que mel habet in ore, fel in corde, aculeum in dorso.

Idem.

Varia
Fons primus
[Back to top]

Luxuria y

O extrema libidinis turpitudo que non solum mentem effeminat, sed corpus eneruat; non solum maculat animam, sed fedat personam! Omne namque peccatum quodcumque fecerit homo extra corpus suum est, qui autem fornicatur in corpus suum peccat. Semper illam precedunt ardor et petulancia, semper comitatur fetor et immundicia, semper secuntur dolor et penitencia.

Innocentius de uilitate condicionis humane.

Varia
Fons primus
[Back to top]

Luxuria z

Quis eius multiplices species enumerare ualeat? Hec enim Pentapolim cum adiacenti regione subuertit, Sychen cum populo interemit; hec filios Iude percussit, Iudeum et Madianithidem pugione transfodit, tribum Beniamin pro uxore Leuite deleuit, filios Hely sacerdotis in bello prostrauit; hec Vriam occidit, Amon interfecit, plurimos lapidauit; hec Ruben maledixit, Sampsonem seduxit, Salomonem peruertit. Verum est ergo quod legitur, propter speciem mulieris multi perierunt.

Innocentius ibidem.

Varia
Fons primus
[Back to top]

Luxuria ab

Blandum malum luxuria quam accusare aliquando facilius est quam uitare, que inuictum Hannibalem armis illecebris suis complexa, uincendum Romano militi tradidit. Illa ducem uigilantissimum, illa exercitum acerrimum dapibus largis habundanti uino, unguentorum flagrancia, ueneris usu lasciuiore ad sompnum et delicias euocauit. Quid hiis ergo uiciis fedius? Quid eciam dampnosius quibus uirtus atteritur, uictorie relanguescunt, sopita gloria in infamiam conuertitur, animi et corporis uires expugnantur, adeo ut nescias an ab hostibus an ab illis capi perniciosius habendum sit?

Valerius libro IX.

Varia
Fons primus
[Back to top]

Luxuria ac

Venus est dolosa et eius corrigia est uaria et quod ex insidiis agit incontinens concupiscencie.

Philosophus VII. ethicorum.

Varia
Fontes proximus et primus
[Back to top]

Ubi

Abstinencia h
Auaricia ad (1), Auaricia ad (2)
Caro q
Castitas p, Castitas s, Castitas t, Castitas u
Concupiscencia a
Ebrietas k, Ebrietas q
Gula l, Gula o
LIBIDO
MULIER
Oratio k
Superbia o, Superbia s, Superbia t, Superbia ap
Vicium b, Vicium f
Voluntas k

Varia