Castitas et continencia a

Castitas est uirtus sub iugo racionis impetum libidinis refrenans.

Augustinus de diffinicionibus.

Varia
Fons primus
[Back to top]

Castitas et continencia b

Castitas est per edomitas uiciorum furias munda et honesta tocius corporis habitudo.

Augustinus ibidem.

Varia
Fons primus
[Back to top]

Castitas et continencia c

Proposito animi permanente per quod eciam corpus sanctificari meruit, nec ipsi corpori aufert sanctitatem uiolencia libidinis aliene quam seruat perseuerancia continencie sancte.

Augustinus in libro de bono coniugali.

Varia
Fons primus
[Back to top]

Castitas et continencia d

In coniugali uinculo si pudicicia conseruatur, dampnacio non timetur. Sed in uirginali et uiduali continencia excellencia muneris amplioris expetitur qua expetita et electa et uoti debito oblata iam non solum nupcias capescere, sed eciam si non nubant, nubere uelle dampnabile est.
,br> Augustinus de continencia uiduali.

Varia
Fons primus
[Back to top]

Castitas et continencia e

Sicut bonum erat quod Martha faciebat occupata circa ministerium sanctorum sed melius quod Maria audiens uerbum Dei, ita eciam bonum Sussanne in castitate coniugali laudamus, sed bonum uidue Anne et magis Marie uirginis anteponimus.

Augustinus de bono coniugali.

Varia
Fontes proximus et primus
[Back to top]

Castitas et continencia f

Pudicicia res est animi, uirginitas corporis; denique illa integra in anima permanente, potest ista de corpore uiolenter auferri, et cum ista integra manet corpori, potest illa in animo lasciua uoluntate corrumpi.

Augustinus contra Iulianum libro IIII.

Varia
Fons primus
[Back to top]

Castitas et continencia g

Non dicatis uos habere animos pudicos si habeatis oculos impudicos quia impudicus oculus impudici cordis est nuncius.

Augustinus de communi uita clericorum.

Varia
Fons primus
[Back to top]

Castitas et continencia h

Audeo dicere superbis continentibus expedit cadere ut in eo ipso in quo se extollunt humilientur. Quid enim prodest cui est continencia si dominetur superbia?

Augustinus sermone LIIII. super Mattheum.

Varia
Fons primus
[Back to top]

Castitas et continencia i

Inter omnia certamina Christianorum duriora sunt prelia castitatis, nam ibi continua pugna et rarior uictoria. Rara enim concordia forme atque pudicicie; rara auis in terris nigra similima cygno.

Augustinus in sermone.

Varia
Fontes primi
[Back to top]

Castitas et continencia k

Vbi necessitas imponitur castitati, auctoritas datur libidini; itaque nec casta est que metu cogitur, nec honesta que mercede conducitur.

Ambrosius de uirginitate.

Varia
Fons primus
[Back to top]

Castitas et continencia l

Quacumque uirtute polleas, quibuscumque operibus niteas; si cingulo castitatis careas, omnia per terram trahes.

Ieronymus in epistola.

Varia
Fons nondum repertus
[Back to top]

Castitas et continencia m

Cum de ipsa continencia mens elacione tangitur, plerumque omnipotens Deus superbiam deserens, hanc in immundiciam operis cadere permittit. Nulla enim est castitas carnis quam non commendat humilitas mentis.

Gregorius in moralibus.

Varia
Fons primus
[Back to top]

Castitas et continencia n

Differunt quidem inter se homo pudicus et angelus sed felicitate non uirtute. Sed etsi illius castitas felicior, huius tamen fortior esse cognoscitur. Castitas sine caritate lampas est sine oleo; subtrahe oleum lampas non lucet; tolle caritatem, castitas non placet.

Bernardus in epistola.

Varia
Fontes primus
[Back to top]

Castitas et continencia o

Vtinam qui continere non ualent, celibatui se darent ne urerentur. Esset proculdubio melius nubere quam uri, et saluari in humili gradu quam in sublimitate cleri deterius uiuere.

Bernardus ibidem.

Varia
Fons primus
[Back to top]

Castitas et continencia p

Quidam in iuuentute luxuriose uiuentes, in senectute continentes fieri delectantur, et tunc eligunt seruire castitati quando libido eos seruos habere contempsit. Nequaquam in senectute continentes uocandi sunt qui in iuuentute luxuriose uixerunt. Tales non habent premium quia laboris certamen non habuerunt. Eos enim expectat gloria in quibus fuerunt gloriosa certamina.

Ysidorus libro II. de summo bono capitulo XXXI.

Varia
Fons primus
cf. Doctrina siue doctor au
[Back to top]

Castitas et continencia q

Sex sunt que incorruptam conseruant castitatem, scilicet sobrietas, operacio, asperitas cultus, inhibicio sensuum, caritas sermonis cum honestate, euitacio oportunitatis et persone et loci et temporis.

Crisostomus super Mattheum.

Varia
Fons nondum repertus
[Back to top]

Castitas et continencia r

Pudicicia est ornamentum nobilium, exaltacio humilium, nobilitas ignobilium, pulcritudo uilium, solamen merencium, augmentum omnis pulcritudinis, decus religionis, minoracio criminum, multiplicacio meritorum, creatoris omnium Dei amica.

Cyprianus de XII abusionibus.

Varia
Fons primus
[Back to top]

Castitas et continencia s

Expertis uiciorum illecebris difficilius quam incognitis caremus, et minoris laboris est incognitam carnis cauere uoluptatem quam reicere iam cognitam.

Beda super Esdram libro IIII.

Varia
Fons primus
[Back to top]

Castitas et continencia t

Maius miraculum est de propria carne fomitem eradicare luxurie quam expellere immundos spiritus de corporibus alienis.

In collacionibus patrum, collacione Nestoracis.

Varia
Fons primus
[Back to top]

Castitas et continencia u

Maior est uirtus ac sublimior gracia internam libidinem carnis extinguere quam nequicias demonum extrinsecus irruentes signo Domini ac uirtutis altissime potencia subiugare.

Ibidem.

Varia
Fons primus
[Back to top]

Castitas et continencia x

Pudicicia est uirtus non solum impetum libidinis cohercens, sed eciam signa cohibens.

Tullius.

Varia
Fons primus
[Back to top]

Castitas et continencia y

Hac mediocritatis linea continenciam obseruabis ut nec uoluptati deditus, prodigus et luxuriosus appareas, nec auara tenacitate sordidus aut obscurus existas.

Seneca de IIII uirtutibus.

Varia
Fons primus
[Back to top]

Ubi

Caro q
CONIUGIUM
Periculum c
Sanctitas c
Superbia t
VIRGINITAS

Varia