Misericordia a

Misericordia est animi condolentis affectus cum additamento beneficii ut compaciamur proximo et largiamur de proprio.

Augustinus de diffinitionibus.

Varia
Fons nondum repertus
[Back to top]

Misericordia b

Nichil ad misericordiam sic inclinat quam proprii periculi cogitatio.

Augustinus ad Galatas.

Varia
Fons primus
[Back to top]

Misericordia c

Non est quo fugias a Deo irato nisi ad Deum placatum.

Augustinus super Psalmum LXXIIII.

Varia
Fons primus
[Back to top]

Misericordia d

Beati illi qui subueniunt miseris quoniam eis rependitur ut per misericordem Dominum de miseria liberentur. Nam id ipsum uidetur iustum ut qui a potentiore adiuuari uult, adiuuet inferiorem in quo est ipse potentior.

Augustinus de sermone Domini.

Varia
Fons primus
[Back to top]

Misericordia e

Melius est ut nullus sit miser quam ut tu facias misericordiam. Qui enim ut faciat misericordiam optat esse miseros, crudelem habet misericordiam; quomodo si medicus ut exerceat artem suam, optat esse multos egrotos, crudelis est medicina.

Augustinus super Psalmos.

Varia
Fons primus
[Back to top]

______________________________

Misericordia est aliene miserie in nostro corde compassio qua utique, si possemus, subuenire compellimur.

Augustinus IX. de ciuitate Dei.

Varia
Fontes proximus et primus
[Back to top]

Misericordia f

Longe melius et humanius et piorum sensibus accommodacius in Cesaris laude locutus est ubi ait: Nulla de uirtutibus tuis nec admirabilior nec gracior misericordia est.

Augustinus ibidem.

Varia
Fontes proximus et primus
[Back to top]

Misericordia g

Multo misericordius operatur quis circa animas infirmorum qui bone fame seruorum Dei consulit quam erga corporum egrotancium qui panem esurientibus tribuit.

Augustinus de opere monachorum.

Varia
Fons primus
[Back to top]

Misericordia h

Ne omisso iudicio sis eciam pauperi in mala causa misericors cuius, si parcis sacello, percutis cor; et tanto nequiorem reddes, quanto iustum sibi fouere uidet.

Augustinus libro Psalmorum.

Varia
Fontes proximus et primus
[Back to top]

Misericordia i

Omnis summa discipline Christiane in misericordia et pietate est. Quam aliquis sequens, si lubricum carnis patitur, sine dubio uapulabit.

Ambrosius super illud ad Thimotheum IIII.: Pietas ad omnia utilis est.

Varia
Fontes proximus et primi
[Back to top]

Misericordia k

Misericordia largior ubi fides promptior. Nichil tam commendat Christianum quam miseratio caritatis.

Ambrosius de officiis.

Varia
Fontes primi
[Back to top]

Misericordia l

Vasa sacramentorum uendere opus est ut quis fide scincera et perspicaci prudencia misericordie munus impleat. Sane, si in sua aliquis deriuat emolumenta, crimen est; si uero pauperibus erogat, captiuum redimat, misericordia est.

Ambrosius de officiis.

Varia
Fons primus
cf. Abstinencia d
[Back to top]

Misericordia m

Non memini me legisse mala morte mortuum qui libenter opera pietatis exercuit. Habet enim multos intercessores et impossibile est multorum preces non exaudiri.

Ieronymus in epistola ad Nepocianum.

Varia
Fons primus
[Back to top]

Misericordia n

Natura hominum prona est ad clemenciam et in alieno peccato sui quisque miseretur.

Ieronymus in epistola.

Varia
Fons primus
[Back to top]

Misericordia o

Misericordia affectio est que nec uoluntate cohercetur, nec rationi subicitur, sed ipsas pias mentes ad compassionem dolencium necessario cogit affectu, ita ut eciam si peccatum esset misereri, et si multum uellem, non possem tamen non misereri. Est timor plus humilis fructuosus qui cuilibet quantumlibet peccatori facile misericordiam promeretur. Talis timor generat, nutrit et seruat humilitatem, mansuetudinem, pacienciam et longanimitatem.

Ieronymus in epistola.

Varia
Fontes primi
[Back to top]

Misericordia p

Misericordia a misero corde uocata est eo quod unusquisque intuetur quempiam miserum, et ei compaciens de dolore animus tangitur. Ipse cor miserum facit ut eum ad miseria liberet cui intendit.

Gregorius in moralibus.

Varia
Fons primus
[Back to top]

Misericordia q

Respicere inopem, exaudire precem, largiri stipem, prebere defensionem, atque pro eiusdem defensione pauperis aduersantis cuiuslibet inimicicias non timere, magna mentis latitudo est.

Gregorius omelia V.

Varia
Fons primus
[Back to top]

Misericordia r

Sunt quidam misericordes de hiis que ad ipsos non pertinent; qui scandalizantur quod non datur omnibus habundanter, sic tamen ut ipsi ne in modico quidem grauentur; qui si misericordes essent de suo facere deberent misericordiam, si non possent de terrena substancia, de uoluntate bona darent eis; qui contra eos fortasse peccare uidentur, darent dulce signum, uerbum bonum quod est super datum optimum ut eorum mentes ad penitenciam prouocarent. Denique hiis omnibus quos esse in peccato cognoscerent, compassionem impenderent et oracionem. Alioquin misericordia illorum nulla est, et misericordiam consequuntur nullam.

Bernardus sermone IIII.

Varia
Fons primus
[Back to top]

Misericordia s

Septem in me uideo misericordias Domini quas et uos ipsi facile inuenietis in uobis. Prima est quod a multis peccatis adhuc in seculo positum custodiuit; prima quidem non inter omnes quas michi impendit, sed prima inter has septem. Quis enim non uideat quod sicut in multa cecidi, sic et in alia poteram cecidisse peccata, nisi Omnipotentis pietas conseruasset? Fateor et fatebor, nisi quia Dominus adiuuit me, paulominus cecidisset in omne peccatum anima mea.

Bernardus sermone LXXXVIII.

Varia
Fons primus
[Back to top]

Misericordia t

Secunda miseratio que non poterit explicari sermone quam benigna, quam libera, quam gratuita; ego peccabam et tu dissimulabas; non continebam a sceleribus et tu abstinebas a uerberibus. Prolongabam ego multo tempore iniquitatem et tu, Domine, pietatem tuam.

Bernardus ibidem.

Varia
Fons primus
[Back to top]

Misericordia u

Tercia: quod uisitauit cor meum et immutauit ut amara fierent que male dulcia prius erant.

Bernardus ibidem.

Varia
Fons primus
[Back to top]

Misericordia x

Quarta: quod penitentem misericorditer suscepisti ut in eorum numero inuenirer de quibus Psalmum: Beati quorum remisse sunt iniquitates et cetera.

Ibidem.

Varia
Fons primus
[Back to top]

Misericordia y

Quinta: per quam michi continendi deinceps et emendacius uiuendi prestitisti uirtutem ne recidiuum paterer, et esset nouissimus error peior priore. Postquam in hiis quinque miserationibus a malo liberaueris, in duabus aliis bona largiris. Hee due sunt gracia promerendi, quam uidelicet munus bone conuersationis indulges, et spes optinendi qua donas homini indigno et peccatori de tua tociens experta bonitate usque ad celestia speranda presumere.

Ibidem.

Varia
Fons primus
[Back to top]

Misericordia z

Magne misericordie quatuor filie, scilicet amissio amaritudinis, subtractio oportunitatis, uirtus resistendi et sanitas affectionis.

Bernardus in sermone.

Varia
Fons primus
[Back to top]

Misericordia ab

A nouissimis incepit quia qui ante Christum fuerunt, quasi ex operibus iustificati fuerunt, gentes autem ex misericordia; unde misericordia incipit a nouissimis, iusticia a maximis.

Crisostomus Mattheum XX.

Varia
Fons primus
[Back to top]

Misericordia ac

Deus tristatur non de sua iniuria sed de nostra perditione. Sicut rex benignus audiens criminosas personas, lege quidem compellente ipse mortis sentenciam dictat aduersus eas, tamen misericordia instigante lacrimas fundet super ipsas et uult eas adiuuare et non potest contradicente sibi iusticia quoniam misericordia tunc est uere misericordia, si sic facta sit ut iusticia per eam condempnetur. Si autem contempta iusticia misericordia obseruetur, ipsa misericordia non est misericordia sed fatuitas. Iusticia enim sine misericordia non est iusticia sed crudelitas, sicut et misericordia sine iusticia non est misericordia sed fatuitas.

Crisostomus super Mattheum.

Varia
Fons primus
[Back to top]

Misericordia ad

Misericordia est salutis presidium, fidei ornamentum, propiciatio peccatorum. Hec est que iustos probat, sanctos roborat, Dei cultores ostentat.

Crisostomus ibidem.

Varia
Fons primus
[Back to top]

Misericordia ae

Habens intellectum curet omnino ne taceat, habens rerum affluenciam uigilet ne a misericordie largitate torpescat, habens artem qua regitur magno opere studeat ut usum atque utilitatem cum proximo parciatur, habens loquendi locum apud diuitem dampnationem pro retento talento timeat, si non cotidie cum ualet apud diuitem pro pauperibus intercedat.

Rabanus super Mattheum XXV.

Varia
Fontes proximus et primus
[Back to top]

Misericordia af

Qui esurientem pane uerbi reficit et sicientem potu sapiencie refrigerat, qui errantem in domum patris reuocat, qui innocentem protegit, qui infirmum fide assumit et confirmat, qui tribulatione oppresso subuenit compaciendo uel consolando ueram dilectionem adimplet.

Rabanus ibidem.

Varia
Fons primus
[Back to top]

Misericordia ag

Misericordia consistit in elemosinis largiendis, in malis tolerandis, in conuiciis remittendis et impericiis corrigendis.

Rabanus ibidem.

Varia
Fons nondum repertus
[Back to top]

Misericordia ah

Misericordie uirtus tanta est ut sine illa cetere, eciam si sint, prodesse non possint. Quamuis enim quis fidelis sit et cautus et sobrius et aliis maioribus ornatus insignibus, si misericors tamen non est, misericordiam non meretur.

Leo papa in sermone de apparitione.

Varia
Fons primus
[Back to top]

Misericordia ai

In illo magno summoque iudicio tanti estimabitur uel largitatis benignitas uel tenacitatis impietas ut pro plenitudine omnium uirtutum et pro summa omnium commissorum et per unum malum illi in ignem mittuntur eternum et per unum bonum isti introducuntur in regnum.

Leo papa ibidem.

Varia
Fons primus
[Back to top]

Misericordia ak

Benigni quippe principis est ad clemencie commodum transilire terminos equitatum quando sola est misericordia cui omnes uirtutes honorabiliter cedere non recusant.

Cassiodorus in epistola.

Varia
Fons primus
[Back to top]

Misericordia al

Egentibus iussum est non diuitibus subueniri. Fundit pocius qui mittit in plenum. Nam illud pocius reconditur quod uasis uacuis congregatur.

Cassiodorus ibidem.

Varia
Fons primus
[Back to top]

Misericordia am

Si nullum penitus indigere contingeret, locum proinde largitas non haberet. Data est prouinciis in regis nostri laude penuria; steriles facti sunt agri ut ubertas domini possit agnosci. Minus esset acceptissimum donum nisi precessisset incommodum.

Ibidem.

Varia
Fons primus
[Back to top]

Misericordia an

Misericordia subsequitur ad custodiam sed precedit ad graciam conferendam. Nam si solum sequeretur, nemo donata perciperet; si tantum precederet, nullus poterat collata seruare. Grauiores enim sunt insidie quas a tergo dyabolus parat, et nisi Domini misericordia subsequatur, facilime fragilitas humana decipitur. Tunc enim quando se aliquis uicium transisse credit, incauta magis ignoratione decipitur.

Cassiodorus super Psalmos.

Varia
Fons primus
[Back to top]

Misericordia ao

Misericors est cum creat quia nullis beneficiis prouocatur ut prestet. Miserator est cum res cadentes sua pietate reconstruit.

Cassiodorus super illud Psalmorum: Misericors et miserator.

Varia
Fons primus
[Back to top]

Misericordia ap

Differunt misericordia et miseratio sicut fons et riuulus. Misericordia enim quasi fons est affectu, miseratio quasi riuulus effectu.

Hugo.

Varia
Fons primus
[Back to top]

Misericordia aq

In regno celi coram omnibus angelis in conuentu resurgencium, quod Abel passus sit, quod mundum seruauit Noe, quod Abraham fidem seruauit, quod Moyses legem tulit, quod Petrus crucem resupinus ascendit, Deus tacet et clamat solum quod pauper comedit, dicens: esuri. Qui enim misericors est, misericordia dignus est.

Petrus Rauennas in quodam sermone exponens illud Matthei XXV.: Esuri et dedistis michi et cetera.

Varia
Fontes primi
[Back to top]

Misericordia ar

Ite, perferte stolam primam. Non dixit: unde uenis? ubi fuisti? ubi sunt que tulisti? quare tantam gloriam in tantam turpitudinem commutasti? sed proferte stolam primam et induite illum. Videtis quia delicta non uidet uis amoris; tardam misericordiam Pater nescit; delicta qui discutit prodit.

Petrus Rauennas in sermone.

Varia
Fons primus
[Back to top]

Misericordia as

Precedentis misericordie beneficium perdidit qui putat esurienti semel sufficere quod donauit. Ille autem ad Dominum integros misericordie fructus premittit a quo pauper nunquam tristis abscedit.

Valerius in quodam sermone.

Varia
Fons primus
[Back to top]

Misericordia at

Misericordia est uicina miserie. Habet enim aliquid trahitque ex ea. Imbecilles oculos esse scias qui ad aliam lippitudinem et ipsi suffunduntur.

Seneca libro de clemencia ad Neronem.

Varia
Fons primus
[Back to top]

Misericordia au

Misericordia au (abest in manuscriptis)

Misericordia ax

Frustra rogatur qui misereri non potest. Grauis tamen pena est quem post facti penitet. Mali causa est qui requirit misericordiam.

Seneca in prouerbiis.

Varia
Fons primus
[Back to top]

Ubi

ADIUTORIUM
Apostoli s
Auaricia k
Bellum u
Beneficiencia f
Caritas l
Christianus a
COMPASSIO
Conuersio e
Correctio n
ELEMOSINA
Excusacio n
HOSPITALITAS
Humilitas r
Ieiunium r, Ieiunium am
Paupertas q
PIETAS
Venia b, Venia s

Varia